কেবিনেট বৈঠকৰ গুৰুত্বপূৰ্ণ সিদ্ধান্তঃ ২০ ছেপ্তেম্বৰৰ পৰা আৰম্ভ হ’ব দশম শ্ৰেণীৰ পাঠদান

বৃহস্পতিবাৰে অনুষ্ঠিত অসম মন্ত্ৰীসভাৰ সাপ্তাহিক কেবিনেট বৈঠকত দশম শ্ৰেণীৰ পাঠদান পুনৰ আৰম্ভ, কৰম পৰৱৰ দিনা চৰকাৰী বন্ধ ঘোষণা, গঁড়ৰ খৰ্গৰ ৰাজহুৱা দহন, কৃষকক সকাহ প্ৰদানৰ বাবে উন্নয়নমূলক পদক্ষেপকে ধৰি কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয়।

মুখ্যমন্ত্ৰী ড° হিমন্ত বিশ্ব শৰ্মাই জনোৱা অনুসৰি সকলো হাইস্কুল, হাই মাদ্ৰাছা, আৱাসিক বিদ্যালয়, চৰকাৰী আৰু বেচৰকাৰী দিবা ব’ৰ্ডিং স্কুলৰ দশম শ্ৰেণীৰ পাঠদান ২০ ছেপ্তেম্বৰ ২০২১ৰ পৰা পুনৰ আৰম্ভ কৰাত অনুমোদন প্ৰদান কৰা হৈছে। এই সন্দৰ্ভত ছাত্ৰ-ছাত্ৰী তথা কৰ্তৃপক্ষৰ স্বাস্থ্যৰ প্ৰতি লক্ষ্য ৰাখি শিক্ষানুষ্ঠান কৰ্তৃপক্ষৰ দ্বাৰা সকলো কৰ্মচাৰীৰে সম্পূৰ্ণ টিকাকৰণ নিশ্চিতকৰণ কৰিবলৈ নিৰ্দেশ প্ৰদান কৰা হৈছে।

গঁড়ৰ খৰ্গৰ লগত জড়িত ভ্ৰান্ত ধাৰণাসমূহ আঁতৰ কৰাৰ লগতে সজাগতা সৃষ্টিৰ লক্ষ্যৰে এক বৃহৎ ঘোষণা কৰা হৈছে। ঘোষণা অনুসৰি ৰাজ্যিক কোষাগাৰত থকা ২,৬২৩ টা খৰ্গৰ ভিতৰত ২,৪৭৯ টা খৰ্গৰ ৰাজহুৱা দহন কাৰ্যসূচী হাতত লোৱা হ’ব। আনহাতে ৯৪ টা গঁড়ৰ খৰ্গ ঐতিহ্য হিচাপে সংৰক্ষণ কৰাৰ লগতে আদালতত গোচৰাধীন হৈ থকা ৫০ টা খৰ্গও সংৰক্ষণ কৰা হ’ব। 

নিম্ন আয়ৰ লোকসকলক সকাহ প্ৰদানৰ লক্ষ্যৰে গুৱাহাটী পৌৰ নিগমে ৰিক্সা আৰু ৰিক্সা চালকৰ অনুজ্ঞাপত্ৰ আইন, ১৯৭৬ৰ উপবিধি প্ৰত্যাহাৰ কৰি গুৱাহাটী মহানগৰীত চলাচল কৰা ৰিক্সা, ঠেলা, হাতেৰে চলোৱা ঠেলাৰ বাণিজ্যিক ব্যৱহৃত অনুজ্ঞাপত্ৰ প্ৰত্যাহাৰ কৰা হ’ব। পঞ্জীয়নৰ ক্ষেত্ৰত আধাৰ সংযোগী অনলাইন পঞ্জীয়ন ব্যৱস্থাৰ বাবে গুৱাহাটী পৌৰ নিগমে অন্বেষণ কৰিব।

শস্য বীমা প্ৰিমিয়াম পৰিশোধৰ দিশত প্ৰধানমন্ত্ৰী ফচল বীমা যোজনাৰ অধীনত ৩৭৯ কোটি টকা ধাৰ্য কৰা হৈছে। এই পদক্ষেপে ৰাজ্যখনৰ লক্ষাধিক কৃষকক লাভান্বিত কৰিব বুলি আশা প্ৰকাশ কৰিছে কেবিনেট বৈঠকে।

অসম বীজ নিগম লিমিটেডৰ অধীনত ১২ খন ফাৰ্মৰ চাৰিসীমাত কাঁটা তাঁৰৰ বেৰ নিৰ্মাণৰ লগতে আন্তঃগাঁথনি উন্নয়নত অনুমোদন প্ৰদান কৰে সাপ্তাহিক কেবিনেটে। অসম বীজ নিগম লিমিটেডৰ অধীনৰ হৰ্টিকালচাৰ নাৰ্ছাৰী, গুৱাহাটী আৰু উলুবাৰী নাৰ্ছাৰীৰ বিকাশত অনুমোদন জনাই ইয়াক অত্যাধুনিক নাৰ্ছাৰীলৈ ৰূপান্তৰ কৰাৰ পৰিকল্পনা কৰা হৈছে।

কৃষি বিভাগৰ কাম-কাজসমূহ অধিক দক্ষতাৰে পৰিচালনা কৰাৰ ক্ষেত্ৰত সহায়ক হোৱাকৈ কৃষি বিষয়াসকলৰ পদোন্নতিৰ ক্ষেত্ৰত যোগ্যতা অৰ্জনকাৰী সেৱা শিথিলকৰণৰ সিদ্ধান্ত গ্ৰহণ কৰা হয়। আনহাতে আন্তঃগাঁথনি সম্পৰ্কীয় প্ৰকল্প ৰূপায়ণৰ লক্ষ্যৰে অসম আন্তঃগাঁথনি পুঁজি সংস্থাৰ বাবে ২৫০ কোটি টকাৰ অনুমোদন জনাই কেবিনেটে।

কেবিনেটৰ উল্লেখযোগ্য সিদ্ধান্তৰ ভিতৰত চাহ জনগোষ্ঠীয় লোকসকলৰ কৰম পৰৱ উপলক্ষে ১৭ ছেপ্তেম্বৰ দিনটো চৰকাৰী বন্ধ হিচাপে ঘোষণা। লোক নিৰ্মাণ, গৃহ আৰু ৰাষ্ট্ৰীয় ঘাইপথ বিভাগৰ অধীনত মুখ্য অভিযন্তা, স্বাস্থ্য আৰু শিক্ষাৰ এটা পদবী সৃষ্টিৰ সিদ্ধান্ত গ্ৰহণ কৰা হয়। এই পদক্ষেপে লোক নিৰ্মাণ বিভাগৰ স্বাস্থ্য আৰু শিক্ষা সম্পৰ্কীয় বিভিন্ন উন্নয়নমূলক কাম-কাজসমূহ অধিক ক্ষিপ্ৰতৰ কৰি তুলিব বুলি আশা কৰা হৈছে।