বুধবাৰে শিৱসাগৰ আৰক্ষীৰ এক বিশেষ অভিযানত দূৰ্ধষ অপৰাধী তথা গাড়ী চুৰ বুবু কোঁৱৰৰ মৃত্যু হয়।
শিৱসাগৰৰ গেলেকীৰ আৰক্ষী থানাৰ অন্তৰ্গত দেওপানীত আৰক্ষীৰে হোৱা সংঘৰ্ষত নিহত হয় বুবু কোঁৱৰ।
সমগ্ৰ ৰাজ্যৰ বিভিন্ন আৰক্ষী থানাত চল্লিশটাতকৈ অধিক হত্যাকাণ্ডৰ গোচৰত অভিযুক্ত আছিল বুবু কোঁৱৰ।
শিৱসাগৰ জিলাৰ আমগুৰিৰ কংগ্ৰেছী নেতা হেমন্ত বৰুৱাৰ হত্যাকণ্ডৰ লগত জড়িত আছিল এই বুবু কোঁৱৰ।
হত্যা, গাড়ীচুৰি,অবৈধ অস্ত্ৰৰ ব্যৱসায়, ড্ৰাগচ সৰবহৰাহ, নাৰী সৰবৰাহকে ধৰি বিভিন্ন অপৰাধত জড়িত আছিল এই কুখ্যাত বুবু কোঁৱৰ।
শিৱসাগৰ জিলা আৰক্ষী অধীক্ষক ৰাকেশ ৰোচনে জনোৱা মতে, শিৱসাগৰ আৰক্ষীয়ে এক গোপন সূত্ৰৰ পৰা তথ্য লাভ কৰিছিল যে বুবু কোঁৱৰে গেলেকীৰ দেওপানী সংৰক্ষিত বনাঞ্চলত অবৈধ অস্ত্ৰ আৰু ড্ৰাগচ সৰবৰাহৰ বাবে আহিব।
সেই তথ্য মতে আবেলিৰে পৰা শিৱসাগৰ আৰক্ষীৰ এটা দলে অঞ্চলটোত তালাচী চলাইছিল।
ঠিক সেই সময়তে স্কুটিত অহা দুজন ব্যক্তিক আৰক্ষীয়ে ৰ’বলৈ কোৱাত স্কুটি আৰোহী দুজনে আৰক্ষীলৈ লক্ষ্য কৰি গুলিবৰ্ষণ কৰে আৰু প্ৰত্যুত্তৰত আৰক্ষীয়ে গুলিচালনা কৰাত গুৰুতৰভাৱে আহত হয় বুবু কোঁৱৰ।
লগে লগে তেওঁক গেলেকী অসামৰিক চিকিৎসালয়লৈ অনা হয় যদিও চিকিৎসকে মৃত ঘোষণা কৰে বুবু কোঁৱৰক।
আৰক্ষীয়ে বুবু কোঁৱৰৰ পৰা এটা পিষ্টল, কেইবা জাই গুলি, নগদ ধন, দুটা মোবাইল ফোনৰ লগতে ড্ৰাগচ ভৰ্তি বহু কেইটা কন্টেইনাৰ উদ্ধাৰ কৰে।
ইপিনে আৰক্ষীৰ চকুত ধুলি দি বুবু কোঁৱৰৰ আন জন সহযোগী পলাই যাবলৈ সক্ষম হয়।
বৰ্তমান বুবু কোঁৱৰৰ মৃতদেহ শিৱসাগৰ অসামৰিক চিকিৎসালয়ত মৰণোত্তৰ পৰীক্ষাৰ বাবে ৰখা হৈছে।
