জম্মু-কাশ্মীৰত অব্যাহত আছে সেনা- উগ্ৰবাদীৰ সংঘর্ষ ৷ শনিবাৰে জম্মু-কাশ্মীৰৰ শ্ব’পিয়ান জিলাত নিৰাপত্তাৰক্ষীৰ সৈতে হোৱা সংঘৰ্ষত দুজন উগ্ৰপন্থী নিহত হয় ৷ এই কথা সদৰী কৰিছে ৰাজ্যখনৰ আৰক্ষীয়ে ৷
প্ৰাপ্ত তথ্য অনুসৰি দক্ষিণ কাশ্মীৰৰ শ্ব’পিয়ানৰ চৌগাম অঞ্চলত উগ্ৰপন্থীয়ে আশ্ৰয় লৈ থকাৰ বিষয়ে তথ্য লাভ কৰাৰ পিছত নিৰাপত্তাৰক্ষীয়ে সমগ্ৰ অঞ্চলটো ঘেৰাও কৰাৰ লগতে তালাচী অভিযান আৰম্ভ কৰে।ইয়াৰ লগে লগে অঞ্চলটোত লুকাই থকা উগ্ৰপন্থীসকলে নিৰাপত্তাৰক্ষীসকলক লক্ষ্য কৰি গুলীচালনা কৰিবলৈ আৰম্ভ কৰে ৷ ইয়াৰ প্ৰত্যুত্তৰত নিৰাপত্তাৰক্ষীয়েও গুলীচালনা কৰে ৷ যাৰ ফলত দুজন উগ্ৰপন্থী নিহত হয় ৷ বর্তমানেও অঞ্চলটোত নিৰাপত্তাৰক্ষীয়ে অভিযান অব্যাহত ৰাখিছে ৷
