অৱসৰৰ দিনবোৰত সকলোৱে নিজৰ পৰিয়ালৰ সৈতে ক’ৰবালৈ যোৱাৰ পৰিকল্পনা কৰে আৰু বিশেষকৈ যেতিয়াই বন্ধ থাকে কিছুমান বচা বচা ঠাইলৈ নিজৰ আপোন জনৰ সৈতে ফুৰিবলৈ যায় ৷
ভাৰতৰ অন্যতম ৰাজ্য মধ্যপ্ৰদেশ এনে এখন ৰাজ্য য’ত এনে বহু ঠাই আছে যি ঠাইলৈ এবাৰ ভ্ৰমণ কৰিবলৈ যোৱাৰ ইচ্ছা হয়তো প্ৰতিজন ভাৰতীয়ৰে থাকে । য’ত বহুতো দুঃসাহসিক অভিযান কৰিব পৰা ঠাইৰ লগতে ৰোমান্টিক ঠায়ো আছে আৰু যি ঠাইলৈ গ’লে ইয়াৰ ইতিহাসৰ বিষয়ে বহুকথা জানিব পাৰি।
খাজুৰাহো ৰাজ্যখনৰ এনে এখন ঠাই যি সমগ্ৰ বিশ্বতে বিখ্যাত আৰু সমগ্ৰ বিশ্বৰ বিভিন্ন প্ৰান্তৰপৰা মানুহ ইয়ালৈ ফুৰিবলৈ আহে। খাজুৰাহোৰ মন্দিৰত থকা কামসূত্ৰৰ ৰহস্যময় জগতখনে মানুহক আকৰ্ষণ কৰে। যি মধ্যপ্ৰদেশৰ ছাটাৰপুৰ জিলাৰ এখন সৰু গাঁৱত অৱস্থিত ।
পাচমৰহি এনে এখন আকৰ্ষণীয় ঠাই য’ত শীতকালত এক ৰোমান্টিক সময় উদযাপনৰ বাবে যাব পাৰে সকলো । হোছাংগাবাদ জিলাত অৱস্থিত ই অতি সুন্দৰ পাহাৰীয়া ষ্টেচন। ইয়াৰ একাধিক জলপ্ৰপাত, ছানচেট পইণ্ট, ধূপগড় ভ্ৰমণৰ বাবে সুন্দৰ ঠাই।
নিজৰ সংগীৰ সৈতে দুঃসাহসিক ভ্ৰমণলৈ যাব বিচাৰে কানহা ৰাষ্ট্ৰীয় উদ্যান এক উপযুক্ত ঠাই। মণ্ডল জিলাত অৱস্থিত এই উদ্যানত আছে বহুতো বিলুপ্ত প্ৰজাতিৰ প্ৰাণী । আনহাতে সূৰ্যাস্ত, চৰাই আৰু বাঘ হ’ল ইয়াত উপভোগ কৰিবলগীয়া অন্যতম আকৰ্ষণ।
ঝাঁচীৰ পৰা ১৬ কিলোমিটাৰ নিলগত বেতোৱা নদীৰ কাষত অৱস্থিত অৰ্ছা অতি সুন্দৰ ঠাই। শনিবাৰ-দেওবাৰে নিজৰ সংগীৰ সৈতে ইয়ালৈ যাব পাৰে আপুনিও। চিচাৰ মহল, ফুলবাগ, ৰায় প্ৰবীণ মহল, জাহাংগীৰ মহল আদি ইয়াৰ বহুকেইটা আকৰ্ষণীয় কেন্দ্ৰ।
ওমকাৰেশ্বৰ-মধ্যপ্ৰদেশৰ ভূমিত দুটা জ্যোতিৰ্লিংগ নিৰ্মাণ কৰা হৈছে। ইয়াৰে এভাগ হৈছে ওমকাৰেশ্বৰ। তীৰ্থস্থান হোৱাৰ উপৰিও ইয়াত প্ৰাকৃতিক সৌন্দৰ্য্য আৰু ইতিহাস সম্বলিত বহুতো কথা দেখা যায়।
ইন্দোৰ ভাৰতৰ ভিতৰতে আটাইতকৈ পৰিষ্কাৰ চহৰ। পৰিষ্কাৰ-পৰিচ্ছন্ন এই চহৰৰ খাদ্য, বুলিয়নৰ বজাৰ আৰু ইয়াৰ বজাৰ-সমাৰ পৰ্য্যটক সকলৰ আকৰ্ষণ।
কেৱল এইয়াই নহয় ,মধ্যপ্ৰদেশত আৰু বহুকেইখন আকৰ্ষণীয় ঠাই আছে য’ত প্ৰতিদিনেই পৰ্য্যটকৰ সোঁত বয় ৷ বিশেষকৈ ৰাজধানী চহৰ ভূপাল ইয়াৰ অন্যতম এক আকৰ্ষণ ৷
