ৰাষ্ট্ৰীয় পৰ্যায়ৰ টিভি চেনেল কালাৰ্চত (Colors TV)ত সম্প্ৰচাৰ হ’বলগীয়া এখন বহু প্ৰত্যাশিত ধাৰাবাহিক হৈছে “নীমা ডেনজংপা” (Nima Denzongpa) । ধাৰাবাহিকখনত নাম ভূমিকাত অভিনয় কৰিছে অসমৰ অভিনেত্ৰী সুৰভি দাসে। উক্ত ধাৰাবাহিকখনত উত্তৰ-পূৰ্বাঞ্চলৰ অন্তৰ্গত চিকিমৰ এগৰাকী যুৱতীয়ে সুদূৰ মুম্বাইলৈ গৈ কিদৰে বিভিন্ন অসুবিধাৰ সন্মুখীন হ’ব লগীয়া হৈছে সেই কথা প্ৰকাশ কৰা হ’ব।
বিগত মাহৰ ২৮ তাৰিখে ধাৰাবাহিকখনৰ প্ৰথমটো প্ৰ’ম’ ছ’চিয়েল মিডিয়াত মুকলি কৰি দিয়া হৈছিল।
উত্তৰ-পূৰ্বাঞ্চলৰ লোকসকলে ভাৰতৰ আন ঠাইত সময়ে সময়ে কিদৰে বিভিন্ন অসুবিধাৰ সন্মুখীন হ’বলগীয়া হয় , সেই বিষয়ে ধাৰাবাহিকখনে উপস্থাপন কৰিবলৈ চেষ্টা কৰিব বুলি প্ৰ’ম’টোৰ পৰাই বুজা যায়। ইতিমধ্যে ধাৰাবাহিক খনৰ আৰু দুই- তিনিটা প্ৰ’ম’ ছ’চিয়েল মিডিয়াত মুকলি কৰি দিয়া হৈছে।
উল্লেখযোগ্য যে সুৰভি দাস অসমৰ নৱপ্ৰজন্মৰ এগৰাকী প্ৰতিভাৱান অভিনেত্ৰী। অভিনয় জগতত তেঁও প্ৰথম ভুমুকি মাৰিছিল অসমীয়া টিভি চেনেল ৰং ৰ “পৰিনীতা” নামৰ ধাৰাবাহিক খনৰ জৰিয়তে। ইয়াৰ উপৰিও তেঁও অসমীয়া ভাষাত আন কেইবাখনো ধাৰাবাহিক, চুটি ছবি আৰু গানত অভিনয় কৰিছে।
মনত বহুতো সৰু সৰু আশা পুহি ৰখা এই অসমীয়া যুৱতীগৰাকীয়ে ৰাষ্ট্ৰীয় পৰ্যায়ৰ এটা টিভি চেনেলৰ ধাৰাবাহিকখনত অভিনয় কৰিবলৈ পাই নিজৰ মনৰ ভাৱ ছ’চিয়েল মিডিয়াৰ জৰিয়তে ব্যক্ত কৰিছে। তেঁও সমগ্ৰ অসমবাসীৰ আৰ্শীবাদ কামনা কৰি লিখিছে যে- “সপোন বোৰ দেখিছিলো কেতিয়াবা সঁচা হব বুলি , কিন্তু এনেকৈ যে ভগৱানে উপহাৰ দিব ভবাই নাছিলোঁ। শুনিছিলো কিবা এটা বস্তু মনৰ পৰা বিচাৰিলে তাক পোৱা যায় আজি অনুভৱ কৰিছো।মৰম আৰু আশীৰ্বাদ কৰিব।সদায় চেষ্টা কৰি যাম ।জয় আই অসম । ”
উল্লেখ্য যে আগষ্ট মাহৰ ২৩ তাৰিখৰ পৰা কালাৰ্চ চেনেলত সম্প্ৰচাৰ হ’ব “নীমা ডেনজংপা”।
