অসম,মধ্যপ্ৰদেশ আৰু ওড়িশাত দক্ষতা বিকাশৰ প্ৰতিশ্ৰুতিৰে বিশেষ পাঠ্যক্ৰম ইণ্ডিয়ান হোটেলছ কোম্পানী লিমিটেডৰ

সমাজৰ বঞ্চিত শ্ৰেণীৰ যুৱচামৰ বাবে নিয়োগৰ সুযোগ মুকলিৰ লক্ষৰে দক্ষতা বিকাশৰ প্ৰতিশ্ৰুতিৰে ভাৰতৰ  কেইখনমান ৰাজ্যত এক বিশেষ পাঠ্যক্ৰম আৰম্ভ কৰিবলৈ অগ্ৰসৰ হৈছে ‘ইণ্ডিয়ান হোটেলছ কোম্পানী লিমিটেড’ ৷ বিভিন্ন সহযোগীৰ সৈতে সহযোগিতা স্থাপন কৰি অসম,মধ্যপ্ৰদেশ আৰু ওড়িশাত ইতিমধ্যে দক্ষতা বিকাশৰ কাৰ্যসূচী আৰম্ভ কৰিছে ‘ইণ্ডিয়ান হোটেলছ কোম্পানীয়ে’ ৷

জানিব পৰা মতে প্ৰতিষ্ঠানটোৱে ইতিমধ্যে টাটা ষ্ট্ৰাইভৰ সহযোগত ভূৱনেশ্বৰ ,ওড়িশাত বহু তৰপীয়া দক্ষতা বিকাশ কেন্দ্ৰ মুকলি কৰিছে ৷ যাৰ যোগেদি শিক্ষাৰ্থী সকলে ভিভাণ্টা ভূৱনেশ্বৰত অন দ্য জব প্ৰশিক্ষণ লাভ কৰি খাদ্য আৰু পানীয় সেৱাত পাঠ্যক্ৰম গ্ৰহণ কৰিছে ৷

উল্লেখযোগ্য যে অসমৰ ৰঙাজানত অৱস্থিত ডনবস্ক’ টেক দক্ষতা বিকাশ কেন্দ্ৰত অসমৰ লগতে চুবুৰীয়া ৰাজ্য নাগালেণ্ডৰ যুৱচামকো এই দক্ষতা বিকাশৰ পাঠ্যক্ৰম প্ৰদান কৰা হৈছে ৷ আনহাতে মধ্যপ্ৰদেশৰ সিন্দৱাড়াৰ আতিথ্যৰ দক্ষতা বিকাশ কেন্দ্ৰইও  টাটা ষ্ট্ৰাইভ আৰু চি.আই.আই.ৰ সহযোগত কুকিং আৰু বেকিঙত বিস্তৃত ভাৱে উদ্যোগীকৰণৰ পাঠ্যক্ৰম আগবঢ়াবলৈ সক্ষম হৈছে ৷