পানীত হাঁহ নচৰা অৱস্থা দিবা-নৈশ বাছ চালক সকলৰঃ চৰকাৰৰ নাই কোনো সদিচ্ছা

ক’ভিড সৃষ্ট পৰিৱেশে অন্যান্য বহু উদ্যোগৰ দৰে পৰিবহণ উদ্যোগো স্থবিৰ কৰি তুলিছে। বিশেষকৈ আন্তঃজিলা যাতায়তৰ বন্ধে বাছ চালক তথা কৰ্মচাৰীসকলৰ জীৱন-জীৱিকালৈ চূড়ান্ত প্ৰত্যাহ্বান কঢ়িয়াই আনিছে। 

অসম চৰকাৰে সময়ে সময়ে নতুন এছ অ’ পি প্ৰকাশ কৰি আহিছে যদিও বাছ চালক তথা বাছৰ কৰ্মচাৰীসকলৰ প্ৰতি কোনো ধৰণৰ সদিচ্ছা প্ৰকাশ কৰা নাই বুলি অভিযোগ উত্থাপিত হৈছে। মঙ্গলবাৰে স্বাস্থ্য মন্ত্ৰী কেশৱ মহন্তই নতুন এছ অ’ পি প্ৰকাশৰ জৰিয়তে আন্তঃজিলা যাতায়তৰ ক্ষেত্ৰত কিছু পৰিমাণে শিথিলতা আনিলে যদিও চৰ্ত সাপেক্ষে আন্তঃজিলা যাতায়ত খুলি দিয়াৰ পৰিপ্ৰেক্ষিতত আশ্বস্ত হ’ব পৰা নাই বাছ চালক তথা বাছৰ কৰ্মচাৰীসকল।

চৰকাৰৰ এই পদক্ষেপৰ পাছত গুৱাহাটীৰ আই এছ বি টি ত বাছৰ চালক তথা কৰ্মচাৰীসকলৰ প্ৰতিবাদে পৰিবেশ উত্তাল কৰি তোলা দেখা গ’ল।এই সন্দৰ্ভত বুধবাৰে গুৱাহাটীৰ আই এছ বি টি ত দিবা নৈশ বাছ চালক সকলৰ এখন সংবাদ মেল অনুষ্ঠিত হয়।

সংবাদ মেলত বাছ চালক তথা “লাইফ অফ এ ড্ৰাইভাৰ, কেবিনৰ ইপাৰে” গ্ৰন্থখনৰ জৰিয়তে অভিলেখ সৃষ্টি কৰা ৰূপম দত্তই বাছ চালক সকলৰ বাবে চৰকাৰে কোনো সিদ্ধান্ত গ্ৰহণ নকৰাৰ বাবে অসন্তুষ্টি প্ৰকাশ কৰে।

ৰূপম দত্তই অসমৰ মুখ্যমন্ত্ৰীগৰাকীক এগৰাকী অতি দক্ষ মন্ত্ৰী বুলি প্ৰশংসা কৰাৰ লগতে মুখ্যমন্ত্ৰী হিমন্ত বিশ্ব শৰ্মাক চালক সকলৰ সুবিধা হোৱাকৈ বিশেষ ব্যৱস্থা গ্ৰহণ কৰিবলৈ অনুৰোধ জনায়। মঙ্গলবাৰৰ দিনটোত চালক-কৰ্মচাৰী সকলে আই এছ বি টি ৰ পৰিবেশ উত্তপ্ত কৰি তোলাৰ বাবে সংবাদ মেলখনৰ জৰিয়তে ক্ষমা বিচাৰে।

সংবাদ মেলত এক গুৰুত্বপূৰ্ণ মন্তব্য কৰি ৰূপম দত্তই কয় যে, “আমাক ৰাজনৈতিক পৰিৱেশৰ পৰা আঁতৰত ৰাখক, আমি অকল ভোট দিবলৈ হে যাও। আমি যেতিয়া শুই থাকো সকলোবোৰ মানুহ সাৰে থাকে, আৰু আমি যেতিয়া সাৰে থাকো সকলো শুই থাকে। গতিকে বাছ চালকসকলৰ পৃথিৱীখন সম্পূৰ্ণ বেলেগ”।

মুখ্যমন্ত্ৰী হিমন্ত বিশ্ব শৰ্মাই যি ক’ব তাকে কৰিবলৈ চালক-কৰ্মচাৰীসকল প্ৰস্তুত বুলি সংবাদ মেলত দত্তই উল্লেখ কৰে। দৰকাৰ হলে মুখ্যমন্ত্ৰীগৰাকীৰ ঘৰত শ্ৰমদান কৰিবলৈও প্ৰস্তুত বুলি জানিবলৈ দিয়ে।

মঙ্গলবাৰে বাছ চালকসকলৰ পৰিয়ালসমূহৰ অৱস্থাৰ কথা বৰ্ণনা কৰি ৰূপম দত্তই কৈছিল যে, এছ অ’ পি ঘোষণাৰ জৰিয়তে আন্তঃজিলা যাতায়ত খুলি দিব বুলি এদিন আগতে বাছ চালকসকলে নিজৰ নিজৰ বহি থকা গাড়ীবোৰ মেৰামতি কৰি গন্তব্য স্থানলৈ যাবলৈ আগ্ৰহেৰে অপেক্ষা কৰিছিল। একাংশ যাত্ৰীয়ে ইতিমধ্যে বাছৰ আসনো আগতীয়াকৈ বুকিং কৰিছিল।

তেনেস্থলত এছ অ’ পি খনত বাছ চলাচলৰ কোনো নতুন নিৰ্দেশনা নথকাত স্বাভাৱিকতে বাছ চালকসকল মৰ্মাহত হৈ পৰিছে। ৰূপম দত্তই সংবাদ মাধ্যমৰ আগত মন্তব্য কৰিছিল যে ক’ৰনাতকৈ তেওঁলোকে ভোককহে ভয় কৰে।

পৰিয়াল চলাব নোৱাৰিলে বাধ্য হৈ ট্ৰেইনৰ আগত পৰি মৰিব লাগিব বুলি মন্তব্য প্ৰকাশ কৰি বাছ চালকসকলে তেওঁলোকৰ তথা পৰিয়ালৰ কথা চিন্তা কৰি চৰকাৰক এক ফলপ্ৰসু সিদ্ধান্ত গ্ৰহণ কৰিবলৈ আহ্বান জনায়।