চিবিআইৰ তদন্ত চলাই থকা মণিপুৰৰ হিংসা সম্পৰ্কীয় গোচৰসমূহৰ শুনানি অসমৰ গুৱাহাটীস্থিত আদালতত গ্ৰহণ কৰিবলৈ শুকুৰবাৰে নিৰ্দেশ দিয়ে উচ্চতম ন্যায়ালয়ে। মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বত এখন বিচাৰপীঠে সেই গোচৰসমূহৰ বিচাৰৰ বাবে গুৱাহাটী উচ্চ ন্যায়ালয়ৰ মুখ্য ন্যায়াধীশক নিম্ন আদালত মনোনীত কৰাৰ দায়িত্ব প্ৰদান কৰে। উচ্চতম ন্যায়ালয়ে কয় যে গ্ৰেপ্তাৰ হোৱা লোকসকলৰ জিম্মা, হিংসাৰ অভিযোগত অভিযুক্ত ব্যক্তি আৰু সাক্ষীসকলৰ শুনানিও গুৱাহাটীত অনুষ্ঠিত হ’ব।
অৱশ্যে শাৰীৰিক উপস্থিতিৰ লগতে ভাৰ্চুৱেল শুনানিও চলি থাকিব পাৰে বুলি উচ্চতম ন্যায়ালয়ে সদৰী কৰিছে । ইয়াৰ বাবে মণিপুৰ চৰকাৰক প্ৰয়োজনীয় ইণ্টাৰনেট সেৱা প্ৰদান কৰিবলৈ নিৰ্দেশ দিয়া হৈছে। প্ৰসংগক্ৰমে উল্লেখ কৰিব পাৰি যে যোৱা ২০ জুলাইত মণিপুৰৰ কাংপকপিত দুগৰাকী মহিলাক নগ্ন কৰি ৰাজপথত পেৰেড কৰাৰ ভিডিঅ’ আৰু দলীয় ধৰ্ষণৰ অভিযোগক লৈ তীব্ৰ প্ৰতিক্ৰিয়াৰ সৃষ্টি হৈছিল ৷ ইয়াৰ পিছতে যোৱা ৮ আগষ্টত মণিপুৰৰ হিংসাৰ তদন্ত আৰু হিংসাৰ বলি হোৱা লোকসকলৰ সাহায্য আৰু পুনৰ সংস্থাপনৰ ওপৰত নজৰ ৰাখিবলৈ মুখ্য ন্যায়াধীশ চন্দ্ৰচুড়ৰ বিচাৰপীঠে উচ্চ ন্যায়ালয়ৰ তিনিগৰাকী অৱসৰপ্ৰাপ্ত মহিলা ন্যায়াধীশৰ এখন সমিতি গঠন কৰে ৷
এটৰ্নী জেনেৰেলে কেন্দ্ৰৰ হৈ উচ্চতম ন্যায়ালয়ত কয় যে চিবিআইয়ে কাংপকপি কাণ্ডকে ধৰি মহিলাৰ বিৰুদ্ধে হোৱা অপৰাধৰ ১১টা গোচৰৰ তদন্ত কৰি আছে। ইয়াৰ পিছতে উচ্চতম ন্যায়ালয়ে নিৰ্দেশ দিছিল যে ৰাজ্যৰ বাহিৰৰ পৰা অহা পাঁচজন ডিএছপি পৰ্যায়ৰ বিষয়াই চিবিআইৰ তদন্ত নিৰীক্ষণ কৰিব। তেওঁলোকৰ ওপৰত থাকিব অৱসৰপ্ৰাপ্ত আই পি এছ বিষয়া দত্তত্ৰেয় পদছালগীকাৰ। একে সময়তে উচ্চতম ন্যায়ালয়ে কয় যে মণিপুৰত সংঘটিত হিংসাত্মক ঘটনাৰ তদন্তৰ সৈতে জড়িত ৪২টা বিশেষ তদন্তকাৰী দল (এছ আই টি)ক অন্য ৰাজ্যৰ ডি আই জি ৰেংকৰ আৰক্ষী বিষয়াই নিৰীক্ষণ কৰিব। এজন ডিআইজিয়ে ছটা এছআইটি নিৰীক্ষণ কৰিব ৷
চলিত মাহত চিবিআইয়ে মণিপুৰত সংঘটিত হিংসাত্মক ঘটনাৰ তদন্তৰ বাবে ২৯গৰাকী মহিলা বিষয়াসহ ৫৩গৰাকী বিষয়াৰ ‘দল’ গঠন কৰে। তদন্তকাৰী দলটোত ডি আই জি পৰ্যায়ৰ তিনিগৰাকী মহিলা বিষয়াক ‘পৰ্যবেক্ষক’ হিচাপে অন্তৰ্ভুক্ত কৰা হৈছে। ইয়াৰ উপৰিও ডেপুটি ছুপাৰ ৰেংকৰ অতিৰিক্ত দুগৰাকী ছুপাৰ আৰু ছয়গৰাকী মহিলা বিষয়াও আছে। সমগ্ৰ তদন্ত প্ৰক্ৰিয়াৰ তদাৰক কৰিব চিবিআইৰ যুটীয়া সঞ্চালক ঘনশ্যাম উপাধ্যায়ে। সংস্থাটোৰ এক সূত্ৰই জনোৱা মতে, চিবিআইৰ ইতিহাসত কেতিয়াও কোনো ঘটনাৰ তদন্তৰ বাবে ইমান বৃহৎ সংখ্যক বিষয়া নিয়োগ কৰা হোৱা নাই।
