উচ্চতম ন্যায়ালয়ৰ নিৰ্দেশঃ সকলো ৰাজ্যিক কাৰাগাৰত নিশ্চিত কৰক ইণ্টাৰনেটৰ সুবিধা

উচ্চতম ন্যায়ালয়ে বৃহস্পতিবাৰে প্ৰতিখন ৰাজ্যৰ মুখ্য সচিবক প্ৰতিখন কাৰাগাৰতে পৰ্যাপ্ত গতিত ইণ্টাৰনেটৰ উপলব্ধতা নিশ্চিত কৰিবলৈ নিৰ্দেশ দিয়ে। যোগাযোগত পলম হোৱাৰ বাবে জামিন মঞ্জুৰ কৰাৰ পিছতো বন্দীসকলক মুক্ত কৰিব নোৱাৰাৰ অভিযোগত এই নিৰ্দেশনা জাৰি কৰা হৈছে।

মুখ্য ন্যায়াধীশ এন ভি ৰমনাৰ অধ্যক্ষতাত গঢ় লৈ উঠা এখন বিচাৰপীঠে কয় যে যোগাযোগত পলম হোৱাৰ বাবে আদালতে জামিনৰ আদেশ প্ৰদান কৰাৰ পিছতো মুকলি নোহোৱা কাৰাগাৰৰ বন্দীসকলৰ দুৰ্দশাৰ বিষয়ে তেওঁলোক চিন্তিত। আদালতৰ আদেশসমূহ ক্ষীপ্ৰতাৰে প্ৰেৰণ কৰাৰ বাবে তথ্য আৰু যোগাযোগ প্ৰযুক্তিৰ সঁজুলি ব্যৱহাৰ কৰাৰ সময় আহি পৰিছে বুলিও বিচাৰপীঠে উল্লেখ কৰে।

চুও মটুৰ বিষয় এটা গ্ৰহণ কৰি আদালতে উল্লেখ কৰে যে কাৰাগাৰত ইণ্টাৰনেটৰ সুবিধা উপলব্ধ নোহোৱা সন্দৰ্ভত ১৯ খন ৰাজ্যই এক প্ৰতিবেদন দাখিল কৰিছে। অৰুণাচল প্ৰদেশ, নাগালেণ্ড, অসম আৰু মিজোৰাম ৰাজ্যসমূহে ইণ্টাৰনেট সংযোগ উপলব্ধ নোহোৱা বা আংশিকভাৱে উপলব্ধ হোৱাৰ বিষয়ে অৱগত কৰে।

আদালতে ৰাজ্যসমূহক ইণ্টাৰনেট উপলব্ধ নোহোৱা ঠাইবোৰত ইণ্টাৰনেটৰ সুবিধা প্ৰদানৰ বাবে প্ৰয়োজনীয় পদক্ষেপ ল’বলৈ নিৰ্দেশ দিয়ে। অৱশ্যে এই ব্যৱস্থা উপলদ্ধ নোহোৱালৈকে ফাষ্টাৰ (ইলেক্ট্ৰনিক ৰেকৰ্ডৰ দ্ৰুত আৰু সুৰক্ষিত ট্ৰেন্সমিচন) প্ৰণালীৰ অধীনত ৰাজ্য চৰকাৰৰ নোডেল বিষয়াসকলৰ জৰিয়তে যোগাযোগ কৰিবলৈ নিৰ্দেশ দিয়ে।

আদালতে ৰাষ্ট্ৰীয় তথ্য কেন্দ্ৰৰ সঞ্চালক প্ৰধান, সকলো ৰাজ্য আৰু কেন্দ্ৰীয় শাসিত অঞ্চলৰ সচিব (গৃহ) আৰু সকলো ৰাজ্যৰ কাৰাগাৰৰ সঞ্চালক প্ৰধানক ‘ফাষ্টাৰ’ প্ৰণালীৰ মসৃণ আৰু সফল ৰূপায়ণ নিশ্চিত কৰিবলৈ নিৰ্দেশ দিয়ে। ন্যায়াধীশ এল নাগেশ্বৰ ৰাও আৰু সূৰ্য কান্তক লৈ গঠিত বিচাৰপীঠে কৰ্তৃপক্ষক শীৰ্ষ আদালতৰ আদেশৰ ই-প্ৰমাণিত প্ৰতিলিপিটো ফাষ্টাৰ প্ৰণালীৰ জৰিয়তে তেওঁলোকক জনোৱা স্বীকৃত প্ৰতিলিপিটো চিনাক্ত কৰিবলৈ নিৰ্দেশ দিছিল।

১৬ জুলাইত শীৰ্ষ আদালতে চুও মটুৰ প্ৰক্ৰিয়া আৰম্ভ কৰে আৰু জামিন সম্পৰ্কীয় আদেশৰ যোগাযোগৰ লেহেম গতিত বিৰক্তি প্ৰকাশ কৰে। কিয়নো ইয়াৰ ফলত নাগৰিকসকলৰ স্বাধীনতাৰ মৌলিক অধিকাৰ খৰ্ব হয়। বিচাৰপীঠে সংশ্লিষ্ট সকলোকে দ্ৰুত আৰু সুৰক্ষিত ভাৱে আদালতৰ আদেশ প্ৰেৰণত বিপ্লৱ আনিবলৈ এক প্ৰক্ৰিয়া আৰম্ভ কৰাৰ নিৰ্দেশ দিয়ে।

আদালতৰ চেক্ৰেটেৰী জেনেৰেল সঞ্জীৱ এছ কালগাঁওকাৰে দাখিল কৰা এক প্ৰতিবেদনত কোৱা হৈছে যে ফাষ্টাৰ প্ৰণালীয়ে কৰ্তব্যধাৰীসকলৰ মাজত সুৰক্ষিত যোগাযোগ মাধ্যম প্ৰদান কৰাৰ প্ৰস্তাৱ দিছে। ইয়াত কোৱা হৈছে যে দুই কাৰক প্ৰমাণীকৰণে ইমেইল ডমেইনত কৰ্তৃত্বপ্ৰাপ্ত ব্যৱহাৰকাৰীৰ প্ৰৱেশাধিকাৰ অধিক নিশ্চিত কৰিব। স্বয়ংক্ৰিয় বিতৰণ অধিসূচনাই নিশ্চিত কৰিব যে ইমেইলটো প্ৰাপ্ত ব্যক্তিক সঠিকভাৱে বিতৰণ কৰা হৈছে।

লগতে কোৱা হয় যে, প্ৰমাণীকৰণ প্ৰণালী সৃষ্টি কৰাৰ বাবে ন্যায়িক ৰেকৰ্ডৰ প্ৰতিটো পৃষ্ঠাত ভিন্ন কিউ আৰ কোড সংযোজিত কৰাৰ প্ৰস্তাৱ দিয়া হৈছে। যি সংযোজনে ব্যৱহাৰকাৰীক উচ্চতম ন্যায়ালয়ৰ ৱেবছাইটলৈ লৈ যাব য’ত প্ৰক্ৰিয়া বা আদেশৰ প্ৰাসঙ্গিক ৰেকৰ্ড প্ৰমাণীকৰণৰ বাবে আপলোড কৰা হৈছে।