অসমীয়াৰ অতি আদৰৰ কোমল চাউলৰ জলপান খাই ভাল পাই নিশ্চয় আপুনিও। কোমল চাউলৰ বিষয়ে জানো আহকচোন

সময়ৰ লগে লগে আজি আমাৰ খাদ্যাভ্যাসৰ ভালেখিনি পৰিৱৰ্তন হৈছে। অত্যাধিক কেলৰি ঘনীভূত , উচ্চ চৰ্বীযুক্ত আৰু মাত্ৰাধিক চুগাৰ থকা খাদ্য ফাষ্ট-ফুড বা জাঙ্ক-ফুড প্ৰায় সকলো ঠাইতে পোৱা যায় আৰু সকলোৰে প্ৰিয়। এই খাদ্যবোৰ নিয়মিত ভাবে খোৱাটো স্বাস্থ্যৰ বাবে অপকাৰী। প্ৰয়োজনতকৈ অধিক কেলৰি গ্ৰহণ কৰাৰ পাছত কেলৰিখিনি যদি আমি উলিয়াই দিব নোৱাৰোঁ তেনেহলে অতিৰিক্ত কেলৰি খিনি চৰ্বী হিচাপে আমাৰ শৰীৰত জমা হৈ মেদবহুলতাৰ সৃষ্টি কৰে আৰু আমি বহুতো ৰোগৰ স্বীকাৰ হ’ব পাৰোঁ।
অসমীয়া সমাজত প্ৰচলিত কোমল চাউল , ভজা চাউল , সান্দহ , চিৰা , পিঠাগুড়ি আদি অতি সুস্বাদু জলপান সমূহ অতি পুৰণি দিনৰে পৰা সকলোৰে সমাদৃত হৈ আহিছে।
কোমল চাউলক ‘যাদুকৰী চাউল’ বুলিও জনা যায়। কোমল চাউলক সিজাব নালাগে। পানীত কিছু সময় তিয়াই থলে খাব পৰা হৈ যায় বাবে ইয়াক কোমল চাউল বোলে। চকোৱা বা কোমল ধান , নানিয়া ধান আদিৰেহে কোমল চাউল বনাব পাৰি। যি কোনো চাউলৰ পৰা কোমল চাউল প্ৰস্তুত কৰিব নোঁৱাৰি। প্ৰথমত ধান খিনি কেৰাহিত সিজোৱা হয় । ধান ফাটি ভিতৰৰ চাউল ভাত হৈ যাব লাগে। তাৰ পিছত সিজোৱা ধান খিনি চোকা ৰদত শুকুৱাব লাগে। এদিনতে শুকুৱা চাউলহে উকৃষ্ট কোমল চাউল হয়।
এই কোমল চাউল গাখীৰ , দৈ , ক্ৰিম আৰু গুৰ বা চেনীৰ লগত খাবলৈ অতি সোৱাদময়। কিছুমানে আকৌ বিশেষকৈ কৃষক সকলে নিমখ , মিঠাতেল , পিঁয়াজ , জলকীয়া আদিৰেও খায়। এইদৰে খোৱা কোমল চাউলৰ সোৱাদ অতুলনীয়। পুষ্টিগুণৰ ফালৰ পৰা কোমল চাউল অতি উৎকৃষ্ট জলপান। কোমল চাউল খালে আমাৰ বহুত সময়লৈ ভোক নালাগে গতিকে কমকৈ খাব বিচৰা সকলৰ কাৰণে কোমল চাউল অতি লাভদায়ক। ডায়েবেটিছ , হাই প্ৰেছাৰ , অতিৰিক্ত কলেষ্টৰেল আদিৰ বাবে কোমল চাউল উপকাৰী জলপান।
কোমল চাউল অসমীয়াৰ অতি মৰমৰ বিহুৰ প্ৰধান জলপান। এই পুষ্টিকৰ সোৱাদময় কোমল চাউলক আমি জলপান হিচাপে ব্যৱহাৰ কৰিলে বহুতো বেমাৰৰ পৰা হাত সাৰি সুস্থ শৰীৰে আনন্দ মনেৰে নিৰোগী হৈ থাকিব নিশ্চয় পাৰিম।