কোষ্ঠ কাঠিন্যত ভোগা লোকক এই সমস্যাৰ পৰা পৰিত্ৰাণ পাবলৈ ত্ৰিফলা খাবলৈ উপদেশ দিয়া হয়। আয়ুৰ্বেদ শাস্ত্ৰত ত্ৰিফলাৰ গুৰুত্ব অপৰিসীম। বিভিন্ন ৰোগ ব্যাধিৰ পৰা হাত সাৰি থাকিবলৈ ত্ৰিফলা খোৱা হয়। আমলখি , শিলিখা আৰু ভোমোৰা এই তিনিবিধ ফল শুকাই গুড়ি কৰি একেলগে মিহলাই ত্ৰিফলা প্ৰস্তুত কৰা হয়। গেচ , অম্বল , কোষ্ঠকাঠিন্যৰ দৰে পেটৰ বিভিন্ন সমস্যা আৰু কলেষ্টেৰল নিয়ন্ত্ৰণত সহায় কৰে ত্ৰিফলাই। ইমান উপকাৰী গুণ থকা সত্বেও বহুতে ক’ব খোজে ত্ৰিফলা বেছি খোৱা ঠিক নহয় কাৰণ এই মিশ্ৰণত প্ৰাকৃতিক ভাৱে এনে কিছুমান উপাদান থাকে যিবোৰ বেছিকৈ খালে শাৰীৰিক সমস্যা হ’ব পাৰে। ত্ৰিফলাৰ পৰা আমাৰ কি উপকাৰ আৰু অপকাৰ হয় জানোঁ আহকচোন আমাৰ এই প্ৰতিবেদন যোগে —–
আমলখি ভিটামিন চি’ আৰু এণ্টি-অক্সিডেণ্টৰে ভৰপৃৰ। আমলখিয়ে পেটৰ সমস্যা দূৰ কৰাৰ লগতে শৰীৰত জমা হোৱা টক্সিন জাতীয় পদাৰ্থ বাহিৰ কৰি দিয়ে। ইয়াৰ উপৰি আমলখি খালে শৰীৰৰ ৰোগ প্ৰতিৰোধ ক্ষমতা বৃদ্ধি পায়।
শিলিখাতো এণ্টি-অক্সিডেণ্ট প্ৰচুৰ পৰিমাণে থাকে। পেট সুস্থ ৰাখিবলৈ শিলিখা খোৱা অতি উপকাৰী।
ভোমোৰাই কলেষ্টেৰল নিয়ন্ত্ৰণত সহায় কৰে। তাৰোপৰি ভোমোৰা খালে পেশী শক্তিশালী আৰু হাড় মজবুত কৰিব পাৰে।
ত্ৰিফলাৰ তিনিওবিধ ফলে উপকাৰী গুণেৰে ভৰা যদিও বহুতৰ মতে ত্ৰিফলা বেছি খোৱা ঠিক নহয় কাৰণ এই মিশ্ৰণটোত থকা প্ৰাকৃতিক উপাদান সমূহে পেটৰ সমস্যা কৰিব পাৰে। ডায়েৰীয়াৰ সমস্যাত ভূগিব পাৰে বা অন্তঃসত্বা বা স্তনপান কৰোৱা মহিলাই ত্ৰিফলা খালে শাৰীৰিক সমস্যা দেখা দিব পাৰে।
বহুতো উপকাৰী গুণেৰে ভৰপূৰ ত্ৰিফলা পৰিমিত পৰিমাণে খোৱা প্ৰয়োজনীয়। ৰাতিপুৱা একেবাৰে খালি পেটত বা ৰাতি আহাৰ গ্ৰহণ কৰাৰ পিছত ত্ৰিফলা নাখাই দুবাৰ আহাৰ গ্ৰহণ কৰাৰ মাজৰ সময় ছোৱাত ত্ৰিফলা খোৱা উচিত।
