হিন্দু সমাজত তুলসীক সদায় পূজা কৰি অহা হৈছে। বিভিন্ন পূজা-পাৰ্বনত ব্যৱহাৰ কৰা তুলসী পূজাৰ অন্তৰালত অন্তৰ্নিহিত হৈ আছে বহু বৈজ্ঞানিক যুক্তি । তুলসীৰ এনে কিছুমান গুণাগুণৰ বাবেই তুলসীক সদায় পবিত্ৰ জ্ঞান কৰা হ’য়। অসমীয়া সমাজত কাতি বিহুৰ দিনা তুলসীৰ তলত চাকি-বন্তি জ্বলাই তুলসীক পূজা কৰা দেখা যায়।
অৰ্থাৎ অসমীয়া সমাজতো তুলসীৰ স্থান সদায় আগচোতালত। আগচোতাল শুৱনি কৰা এই সৰু গুল্মজাতীয় গছজোপাৰ আছে বহু ৰোগ নিৰাময় কৰিব পৰা গুণ। কিছুমান ৰোগত তুলসী ইমানেই সুফলদায়ক যে অন্য ঔষধ ব্যৱহাৰ নকৰাকৈয়ে আৰোগ্য লাভ কৰিব পাৰি।
সাধাৰণতে তুলসী তিনি প্ৰকাৰৰ পোৱা যায়। ক’লা তুলসী ,বগা তুলসী আৰু বন তুলসী। ইয়াৰে ক’লা আৰু বগা তুলীসৰ ঔষধি গুণ অধিক ।
সাধাৰণতে কফ জাতীয় ৰোগত ক’লা বা বগা তুলসীৰ ৰসে মহাঔষধৰ কাম কৰে। যিসকল লোকে দীৰ্ঘদিন ধৰি কফজাতীয় ৰোগত ভুগি আছে তেওঁলোকে দৈনিক তুলসীৰ ৰস সেৱন কৰিলে এই ৰোগৰ পৰা সম্পূৰ্ণ পৰিত্ৰাণ পাব পাৰে।
তুলসী পাতৰ ৰস উলিয়াই এচামুচ মৌ ৰস আৰু আদাৰ ৰস মিহলাই খালে কফৰ ৰোগ সম্পূৰ্ণ নিৰ্মূল হ’য়। বিশেষকৈ সৰু সৰু ল’ৰা-ছোৱালীৰ চৰ্দি ,কাহ, জ্বৰ আনকি শৌচ কচা কৰা, বমি আদি তো তুলসীৰ ৰসে অমৃতৰ দৰে কাম কৰে।
ডাঙৰেও দৈনিক পুৱাৰ চাহকাপত তুলসীৰ পাত, আদা , তেজপাত, জালুক আদি দি সেৱন কৰিলে জ্বৰ,পানী লগা বা কফৰ পৰা বাচি থাকিব পাৰে।
ইয়াৰোপৰি তেজৰ দোষ বা কুষ্ঠাদি আদি ৰোগৰ বাবেও তুলসী বৰ উপকাৰী। কোনো কাৰণত কাণৰ বিষ হলে তুলসী পাতৰ ৰস গৰম কৰি অলপ ঠাণ্ডা হলে কেইটোপালমান কাণত দি দিলে কাণৰ বিষৰ পৰাও উপশম পাব পাৰি।
আনকি খৰ-খজুৱতি বা মুখত দাগ পৰিলেও তুলসীৰ পাত পিহি লগালে খৰ-খজুৱতি ভাল হোৱাৰ লগতে মুখৰ দাগসমূহ নাইকীয়া হৈ চালখন মসৃণ কৰি উজ্জ্বল কৰি তোলে ।
ইয়াৰোপৰি চকু ৰঙা পৰা বা চকু ফুলি উঠা ৰোগতো তুলসীৰ ৰস এক,দুই টোপাল দিলে উপশম হ’য়। ক’লা বা বগা তুলসীৰ উপৰিও বন তুলসীৰ পাতৰ ৰসেও কফ নিৰাময় আৰু বেদনাৰ উপশম কৰিব পাৰে।
বিশেষকৈ তিৰোতাৰ সন্তান প্ৰসৱ হোৱাৰ পিছত কিবা কাৰণত বেদনা আহিলে বন তুলসীৰ পাতৰ ৰসে সেই বেদনা নিৰাময় কৰিব পাৰে। উল্লেখ্য যে, বৰ্তমান ক’ভিড সৃষ্ট এই জটিল পৰিস্থিতিত ক’ভিডৰ পৰা বাচি থাকিবলৈ একাংশ আয়ুৰ্বেদিক চিকিৎসকে দৈনিক চাহৰ লগত দুখিলা তুলসী পাত দি খোৱাৰ পৰামৰ্শ আগবঢ়াইছে।
আনকি পূৰ্বজ সকলে খাদ্য গ্ৰহণ কৰাৰ পিছত তুলসী পাত চোৱাই খাবলৈ কয়। যিহেতু তুলসীয়ে হজম হোৱাটো সহায় কৰে। বৈজ্ঞানিক দৃষ্টিকোণেৰে তুলসীৰ এনেবোৰ ঔষধি গুণৰ বাবেই হয়তো তুলসীক সদায় পবিত্ৰ জ্ঞান কৰি অহা দেখা যায়।
