‘মিছাইল মেন অৱ ইণ্ডিয়া’ হিচাপে জনাজাত ভাৰতৰ একাদশ ৰাষ্ট্ৰপতি ড০ এ পি জে আব্দুল কালামৰ আজি সপ্তম মৃত্যু বাৰ্ষিকী ৷ ভাৰতৰ প্ৰতিৰক্ষা আৰু মহাকাশ গৱেষণা বিকাশত গুৰুত্বপূৰ্ণ ভূমিকা পালন কৰা এজন মহান পথদ্ৰষ্টা হিচাপে তেওঁক সদায়েই স্মৰণ কৰে সমগ্ৰ ভাৰতবাসীয়ে ।
এইজনা মহান ব্যক্তিৰ জন্ম হৈছিল ১৯৩১ চনৰ ১৫ অক্টোবৰত ৷ আনহাতে ২০১৫চনৰ ২৭ জুলাইত শ্বিলঙৰ ইণ্ডিয়ান ইনষ্টিটিউট অৱ মেনেজমেণ্টত বক্তৃতা দি থাকোতে তেওঁ শেষ নিশ্বাস ত্যাগ কৰে।
অভুল পাকিৰ জৈনুলাবদিন আব্দুল কালাম এজন ভাৰতীয় এৰোস্পেচ বিজ্ঞানী আছিল যি ২০০২ চনৰ পৰা ২০০৭ চনলৈ ভাৰতৰ একাদশ ৰাষ্ট্ৰপতি হিচাপে কাৰ্যনিৰ্বাহ কৰিছিল। তেওঁ জন্ম গ্ৰহণ কৰিছিল আৰু ডাঙৰ দীঘল হৈছিল তামিলনাডুৰ ৰামেশ্বৰমত ৷ তেওঁ আছিল পদাৰ্থ বিজ্ঞান আৰু এৰোস্পেচৰ ছাত্ৰ ।
এ পি জে আব্দুল কালামে পৰৱৰ্তী চাৰি দশক মুখ্যতঃ প্ৰতিৰক্ষা গৱেষণা আৰু উন্নয়ন সংস্থা (ডিআৰডিঅ’) আৰু ভাৰতীয় মহাকাশ গৱেষণা সংস্থা (ইছৰো)ত এজন বিজ্ঞানী আৰু বিজ্ঞান প্ৰশাসক হিচাপে অতিবাহিত কৰিছিল । তেওঁ ভাৰতৰ অসামৰিক মহাকাশ কাৰ্যসূচী আৰু সামৰিক ক্ষেপণাস্ত্ৰ বিকাশৰ প্ৰচেষ্টাতো ঘনিষ্ঠভাৱে জড়িত আছিল।
জানোচোন আহক ভাৰতৰ একাদশ ৰাষ্ট্ৰপতি গৰাকীৰ বিষয়ে কিছু আকৰ্ষণীয় তথ্য
১/ ভাৰতৰ একাদশ ৰাষ্ট্ৰপতি হৈ থকা সময়ছোৱাত এ পি জে আব্দুল কালামৰ বাসগৃহত নাছিল টিভি । তেওঁৰ কিছুমান ব্যক্তিগত সম্পত্তিৰ ভিতৰত আছিল মাত্ৰ কিতাপ, কিছুমান কাপোৰ, বীণা, চিডি প্লেয়াৰ আৰু এটা লেপটপ
২/ পোখৰণ-২ পাৰমাণৱিক পৰীক্ষাত অপৰিহাৰ্য ভূমিকা পালন কৰাৰ পিছত এ পি জে আব্দুল কালামে ভাৰতৰ আগশাৰীৰ পাৰমাণৱিক বিজ্ঞানী হিচাপে আত্মপ্ৰকাশ কৰে।
৩/ ১৯৯২-১৯৯৯ চনত এ পি জে আব্দুল কালামে ভাৰতৰ প্ৰধানমন্ত্ৰীৰ মুখ্য বৈজ্ঞানিক উপদেষ্টা হিচাপে কাৰ্যনিৰ্বাহ কৰিছিল।
৪/ এ পি জে আব্দুল কালাম সদায় লিখাৰ আগ্ৰহী আছিল। তেওঁ তেওঁৰ জীৱনকালত প্ৰায় ১৮ খন কিতাপ, চাৰিটা গান আৰু ২২ টা কবিতা ৰচনা কৰিছিল।
৫/ কালামে ভাৰতীয় আৰু আন্তঃৰাষ্ট্ৰীয় ৪০ খন বিশ্ববিদ্যালয়ৰ পৰা সন্মানীয় ডক্টৰেট ডিগ্ৰী লাভ কৰিছিল।
৬/এ পি জে কালাম ভাৰতৰ প্ৰথম স্নাতক ৰাষ্ট্ৰপতি আছিল।
৭/ তেওঁৰ পৰিয়ালৰ ভৰণপোষণৰ বাবে ১০ বছৰ বয়সতে বাতৰি কাকত বিক্ৰী কৰা আৰম্ভ কৰিছিল।
৮/ এ পি জে আব্দুল কালামে ভাৰতৰ প্ৰথম উপগ্ৰহ উৎক্ষেপণ বাহন এছএলভি তৃতীয়ৰ সৃষ্টিৰ তদাৰক কৰিছিল যাক ৰোহিণী উপগ্ৰহক পৃথিৱীৰ চাৰিওফালে কক্ষপথত স্থাপন কৰিবলৈ ব্যৱহাৰ কৰা হৈছিল।
৯/ এ পি জে আব্দুল কালামে ১৯৮১ চনত সন্মানীয় পদ্মভূষণ, ১৯৯০চনত পদ্ম বিভূষণ, আৰু ১৯৯৭চনত ভাৰতৰ সৰ্বোচ্চ অসামৰিক সন্মান ভাৰত ৰত্ন লাভ কৰে।
১০/ গ্ৰাম্য ভাৰতত স্বাস্থ্যসেৱাৰ সুবিধা বৃদ্ধিৰ লক্ষ্যৰে লোৱা পদক্ষেপসমূহতো কালামে অৰিহণা যোগাইছিল। তেওঁ হৃদৰোগ বিশেষজ্ঞ চোমা ৰাজুৰ সহায়ত এটা কম খৰচী ষ্টেণ্ট সৃষ্টি কৰিছিল, যাৰ নাম আছিল কালাম-ৰাজু ষ্টেণ্ট।
