ক’ভিডকালীন সংকটৰ মাজত কঁঠাল আৰু কলৰ চিপ্‌ছ বিক্ৰীৰে স্বাৱলম্বী বকোৰ এদল যুৱতী

ক’ভিডকালীন বিপৰ্যয়ে অজস্ৰ মানুহৰ জীৱন-জীৱিকাৰ পথ বন্ধ কৰিছে। আনহাতে এই সময়ছোৱাত হাত সাৱটি বহি নাথাকি এচামে নিজৰ তথা পৰিয়ালৰ বাবে মুকলি কৰি লৈছে উপাৰ্জনৰ কিছু ব্যতিক্ৰমী পথ। তাৰে উদাহৰণ বকোৰ কিনানগাঁৱৰ বহুকেইগৰাকী উদ্যমী যুৱতী।

স্কুল-কলেজৰ ছাত্ৰ-ছাত্ৰীসকল বন্ধৰ এই সময়ছোৱাত সাধাৰণতে মবাইল, টিভি অথবা খেলা-ধূলাতে ব্যস্ত আছে। কিন্তু কিছু ব্যতিক্ৰমী চিন্তাৰে অন্যৰ বাবে উদাহৰণ হৈ পৰিছে কিনানগাঁৱৰ এই যুৱতীকেইগৰাকী। তেঁওলোকে অঞ্চলটোত এই সময়ছোৱাত সহজে উপলদ্ধ কঁঠাল আৰু কলৰ চিপ্‌ছ তৈয়াৰ কৰি বিক্ৰী কৰি আৰ্থিকভাৱে স্বাৱলম্বী হোৱাৰ লগতে বহুতৰ বাবে লৈ আনিছে আশাৰ বতৰা।

চানচিলা ডি চাংমা নামৰ যুৱতীগৰাকীৰ ভাষ্য অনুসৰি, বন্ধৰ সময়ছোৱাত কৰিবলৈ বিশেষ কাম নাথাকে। সেয়ে তেঁওলোকে আলোচনা কৰি ভাবিলে যে এতিয়া বতৰত সহজে উপলদ্ধ কঁঠাল আৰু কলৰ চিপ্‌ছ তৈয়াৰ কৰি বিক্ৰী কৰিব। ইয়াৰ পৰা তেঁওলোক নিজে স্বাৱলম্বী হোৱাৰ উপৰিও ঘৰখনকো সকাহ দিব পাৰিব।

সেইমতেই তেঁওলোকৰ কেইগৰাকীমান লগ হৈ চিপ্‌ছ তৈয়াৰ কৰা আৰম্ভ কৰে। প্ৰথমে ঘৰে ঘৰে গৈ বিক্ৰী কৰি এতিয়া বকো বজাৰতো তেঁওলোকৰ হাতেৰে তৈয়াৰী চিপ্‌ছ উপলদ্ধ হৈছে আৰু গ্ৰাহকে এই সোৱাদ পছন্দও কৰিছে। বিশেষকৈ সৰু ল’ৰা-ছোৱালীবোৰৰ মাজত ইয়াৰ আদৰ বেছি।

এটা কঁঠালৰ পৰা প্ৰায় ২০-৩০ পেকেট আৰু এঠোক কলৰ পৰা ২০-৩০ পেকেট চিপ্‌ছ তৈয়াৰ কৰিব পাৰি। ইয়াৰে এটা পেকেটৰ মূল্য ১০ টকা। তেঁওলোকে অৰ্ধ লকডাউনৰ এই সময়ছোৱাতো চিপ্‌ছ বিক্ৰী কৰি দৈনিক ২০০ ৰ পৰা ৫০০ টকালৈ উপাৰ্জন কৰিছে।

শচীথা ডি চাংমা নামৰ অন্য এগৰাকী যুৱতীয়ে কয় যে, কোনো প্ৰশিক্ষণ অবিহনেই বহুত অভ্যাস কৰিহে তেঁওলোকে সোৱাদলগাকৈ চিপ্‌ছ তৈয়াৰ কৰিব পাৰিছে। পূৰঠ ফলৰ পৰা তৈয়াৰ কৰা এই চিপ্‌ছবোৰত সোৱাদৰ বাবে নিমখ, নৰসিংহ আদি ব্যৱহাৰ হয়।

আজি বিশ্ব যুৱ দক্ষতা দিৱস। অসমত প্ৰায় ৩০-৩৫ লাখ কৰ্মসংস্থাপনহীন লোক আছে। চৰকাৰে ১ লাখ নিয়োগ কৰিলেও এই সংখ্যা তেনেই নগণ্য। ব্যক্তিগত খণ্ডত বিনিয়োগ অথবা দক্ষতা বৃদ্ধিৰ জৰিয়তেহে অসমৰ নিবনুৱা সমস্যা দূৰ কৰিব পৰা যাব।

বিশ্বজুৰি চিপ্‌ছৰ এখন বৃহৎ বজাৰ আছে। শিশুৰ পৰা বৃদ্ধলৈকে সকলোৰে পচন্দ সোৱাদভৰা চিপ্‌ছ। দক্ষিণ ভাৰতত স্থানীয়ভাৱে তৈয়াৰ কৰা চিপ্‌ছৰ চাহিদা বহু বেছি। অসমতো এনে বহু সামগ্ৰী উপলদ্ধ যিবোৰৰ পৰা সোৱাদলগাকৈ চিপ্‌ছ তৈয়াৰ কৰিব পাৰি।

অসম চৰকাৰৰ দক্ষতা বৃদ্ধিৰ বাবে Skill Development Mission আছে যদিও এই ক্ষেত্ৰত এতিয়াও বহু কাম হ’বলৈ বাকী আছে। চিপ্‌ছ তৈয়াৰ কৰা প্ৰশিক্ষণৰ জৰিয়তেও এচাম যুৱক-যুৱতীক সংস্থাপনৰ সুবিধা কৰি দিব পৰা যাব। ই স্বাস্থ্যসন্মত তথা অৰ্থনৈতিক দিশৰ পৰাও আশাব্যঞ্জক।