গিনিজ ৱৰ্ল্ড ৰেকৰ্ডছত নিজৰ নাম সন্নিবিষ্ট কৰা বৰ সহজ কথা নহয় সেয়া আমি সকলোৱে জানোঁ ৷ কিবা এক বিশেষ দিশত বা বিশেষ বিষয়ত পাৰদৰ্শী সকলেহে ইয়াৰ যোগেদি বিশ্ব অভিলেখ গঢ়িব পাৰে ৷ এই ক্ষেত্ৰত সেই বিশেষ লোক সকলক উৎসাহিত কৰিবলৈ ‘ গিনিজ ৱৰ্ল্ড ৰেকৰ্ডছ’এ নিয়মিতভাৱে বিভিন্ন শিতানত বিশ্ব অভিলেখ গঢ়া লোকসকলৰ বিষয়ে সকলোকে অৱগত কৰে।
২০২২ চনত বিশ্বৰ আটাইতকৈ ওখ মানুহজনৰ পৰা আৰম্ভ কৰি আটাইতকৈ দীঘল গোঁফ থকাজনলৈকে এনে বহু অভিলেখ দেখা পোৱা গ’ল। মানুহক স্তম্ভিত কৰিব পৰা তেনে পাঁচটা অভিলেখৰ বিষয়ে জানোঁচোন আহক।
সোমবাৰ ‘সপ্তাহৰ আটাইতকৈ বেয়া দিন’ ৷ কিয়নো মজাৰে ভৰা এটা জিৰণি নাইবা বিনোদনৰ দিন অৰ্থাৎ দেওবাৰৰ পিছত সোমবাৰে পুৱা অফিচলৈ যোৱা লোকসকলৰ বাবে যথেষ্ট মানসিক চাপৰ সৃষ্টি কৰা অপ্ৰীতিকৰ দিন হিচাপে বিবেচিত এই সোমবাৰ । এই কথা মনত ৰাখি গিনিজ ৱৰ্ল্ড ৰেকৰ্ডছে সোমবাৰটোক ‘সপ্তাহৰ আটাইতকৈ বেয়া দিন’ হিচাপে ঘোষণা কৰে।
২০২১ চনত মৰক্কোত এটা প্ৰসৱতে পাঁচগৰাকী ছোৱালী আৰু চাৰিটা ল’ৰা মুঠ ৯টা শিশুৰ জন্ম হোৱা ঘটনায়ো সৃষ্টি কৰিছে বিশ্ব অভিলেখ ৷
গিনিজ ৱৰ্ল্ড ৰেকৰ্ডছে টুইটযোগে এই কথা ঘোষণা কৰিছে যে তেওঁলোকে আনুষ্ঠানিকভাৱে সোমবাৰক সপ্তাহটোৰ আটাইতকৈ বেয়া দিনৰ অভিলেখ প্ৰদান কৰিছে । আনহাতে ২০২১ চনত মৰক্কোত একেটা প্ৰসৱতে ৯টা সন্তান, পাঁচজনী ছোৱালী আৰু চাৰিটা ল’ৰা সন্তান জন্ম দিয়া মালিৰ এগৰাকী মাতৃয়ে ২০২২ চনৰ ডিচেম্বৰ মাহত গিনিজ ৱৰ্ল্ড ৰেকৰ্ডত স্থান লাভ কৰিবলৈ সক্ষম হৈছে ৷ উল্লেখনীয় যে তেওঁৰ আটাইকেইটি সন্তান বৰ্তমান সুস্থ ।
ইফালে টেটু আৰু বডি মডিফিকেচনৰ প্ৰতি আকৰ্ষিত আৰ্জেণ্টিনাৰ এহাল দম্পতীয়ে সৰ্বাধিক শৰীৰ পৰিৱৰ্তনেৰে বিশ্ব অভিলেখ ভংগ কৰিছে। গিনিজ ৱৰ্ল্ড ৰেকৰ্ডৰ তথ্য অনুসৰি গেব্ৰিয়েলা পেৰাল্টা আৰু ভিক্টৰ হুগো পেৰাল্টাৰ শৰীৰত ৯৮টা পৰিৱৰ্তন কৰা হৈছে। আনকি এই দম্পতীহালে তেওঁলোকৰ চকুৰ বগা অংশটো চিয়াঁহীৰে টেটু কৰিছে যিয়ে তেওঁলোকৰ চকু ক’লা কৰি পেলায়।
ইৰাণৰ আফশ্বিন ইছমাইল গাদাৰজাদেক গিনিজ ৱৰ্ল্ড ৰেকৰ্ডছৰ দ্বাৰা বিশ্বৰ আটাইতকৈ চুটি ব্যক্তি হিচাপে নিৰ্বাচিত কৰা হৈছে। বিশ বছৰীয়া আফশ্বিনৰ উচ্চতা হ’ল ৬৫.২৪ চে.মি.(২ ফুট, ১.৬ ইঞ্চি) ৷ গিনিজ ৱৰ্ল্ড ৰেকৰ্ডছে পৰীক্ষা কৰা মতে আফছিন জীৱিত চতুৰ্থজন আটাইতকৈ চুটি মানুহ হিচাপে পৰিগণিত হৈছে।
ইউনাইটেড কিংদমৰ ৫বছৰীয়া কন্যা বেলা-জে ডাৰ্কে প্ৰথমখন গ্ৰন্থ প্ৰকাশৰ পিছতেই গিনিজ ৱৰ্ল্ড ৰেকৰ্ডত বিশ্বৰ আটাইতকৈ কম বয়সীয়া মহিলা লেখিকা হিচাপে স্থান লাভ কৰিবলৈ সক্ষম হৈছে।‘দ্য লষ্ট কেট’ নামৰ গ্ৰন্থখনৰ যোগেদি মাকে কঢ়িয়াই লৈ যোৱাৰ সময়তে হেৰাই যোৱা মেকুৰী পোৱালি এটাৰ জীৱনক কেন্দ্ৰ কৰিয়ে লিখা এই কিতাপখন এই শিতানত অভিলেখ হিচাপে যোগ্যতা অৰ্জন কৰিবলৈ প্ৰয়োজনীয় নূন্যতম ১০০০ কপিতকৈও অধিক বিক্ৰী হৈছিল ।
