অত্যধিক গৰম, তীব্ৰ সূৰ্যৰ পোহৰে মাইগ্ৰেইন (মূৰৰ বিষ)ৰ সমস্যা আৰু অধিক ভয়াৱহ কৰি তোলে। যিসকলে প্ৰতিদিনে ৰ’দত ওলাই যাবলগীয়া হয় তেওঁলোকৰ মাইগ্ৰেইনৰ প্ৰৱণতা বেছি। তাৰ লগতে গৰমৰ বাবে টোপনিৰ অভাৱ, মানসিক চাপ বৃদ্ধি, পানীলগা আদিয়ে মাইগ্ৰেইনৰ সমস্যা অধিক গুৰুতৰ কৰি তোলে। ইয়াৰ বাহিৰেও শৰীৰত আইৰণ, মেগনেছিয়াম আৰু ভিটামিন ডিৰ অভাৱ হ’লেও মাইগ্ৰেইনৰ সমস্যা বাঢ়ি যায়।
ৰ’দৰ পৰা উভতি আহি মূৰৰ বিষ সহজে নাইকিয়া হৈ নাযায়, কিন্তু চকুৰ বিষ, ডিঙিৰ বিষ, বমি বমি ভাৱে অধিক অসহ্যকৰ কৰি তোলে। মাইগ্ৰেইনৰ চিকিৎসাৰ আটাইতকৈ উত্তম উপায় হ’ল মূৰৰ বিষৰ কাৰণ বিচাৰি উলিওৱা। মূৰৰ বিষ হোৱা দিনবোৰৰ হিচাপ ৰাখক, সেই দিনবোৰত আপুনি কি খায়, ৰ’দত বেছি সময় কটায় নেকি সেইবোৰৰ হিচাপ ৰাখক।
জানি লওক, গৰমৰ দিনত মাইগ্ৰেইন কেনেকৈ নিয়ন্ত্ৰণত ৰাখিব পাৰি?
১) শৰীৰত পানীৰ অভাৱ হ’বলৈ নিদিব
গ্ৰীষ্মৰ দিনত শৰীৰৰ ঘামৰ যোগেদি প্ৰচুৰ পৰিমাণে পানী হেৰুৱাই পেলায়। দিনটোত কমেও ডেৰ-দুই-তিনি লিটাৰ পানী খাব লাগিব। পানীৰ পৰিমাণ বেছি থকা শাক-পাচলি আৰু ফল-মূল খাওক ৷ বাহিৰলৈ ওলাই যাওঁতে বেগত পানীৰ বটল এটা ৰাখিবলৈ নাপাহৰিব। বেয়া লাগিলে ছাঁত বহি অলপ অলপকৈ পানী খাব লাগে। কেতিয়াবা দৈ, লাচী, ফলৰ ৰস খাব পাৰে।
২) খাদ্যাভ্যাসৰ ওপৰত চকু ৰাখিব
খাদ্য পৰিৱৰ্তনৰ দ্বাৰা মাইগ্ৰেইন নিয়ন্ত্ৰণ কৰিব পাৰি। যিসকলৰ মাইগ্ৰেইন হৈছে তেওঁলোকে কফি, চকলেট, ৰেড ৱাইন, শুকান ফল, পনিৰ আদিও পৰিহাৰ কৰিব লাগে। বৰঞ্চ ফলমূল আৰু শাক-পাচলি বেছিকৈ খাব লাগে।
৩)টুপী আৰু ছানগ্লাছ ল’বলৈ নাপাহৰিব
ৰ’দৰ পৰা ৰক্ষা পাবলৈ টুপী আৰু ছানগ্লাছ ব্যৱহাৰ কৰিব লাগিব। চকুত পোনপটীয়া সূৰ্যৰ পোহৰ পৰিলে মাইগ্ৰেইনৰ বিষ বেছি হয়। গতিকে সাৱধান হওক।
৪) এয়াৰ কণ্ডিচনাৰৰ উষ্ণতা নিয়ন্ত্ৰণ কৰা
ৰ’দৰ পৰা ঘৰলৈ উভতি আহোঁতে বহু লোকে গৰমৰ অস্বস্তি কমোৱাৰ বাবে এয়াৰ কণ্ডিচনাৰৰ উষ্ণতা অত্যধিকভাৱে কমাই দিয়ে। এই প্ৰথা একেবাৰে ভাল নহয়। এচিৰ উষ্ণতা ২৫ৰ পৰা ২৭ ডিগ্ৰীৰ ভিতৰত ৰখাটো ভাল। অন্যথা মাইগ্ৰেইনৰ বিষ বাঢ়িব পাৰে।
৫) উপযোগী তেল নিজৰ লগত ৰাখক
ইউকেলিপ্টাছ তেল, পদিনা তেলে মূৰত মালিচ কৰিলে মাইগ্ৰেইনৰ বিষৰ পৰা সকাহ পোৱা যায়। লগতে যিবোৰ লক্ষণ থাকে সেইবোৰো কমি যায়।
৬) খালী পেটত নাথাকিব
খালী পেটতো মাইগ্ৰেইনৰ বিষ বাঢ়ে। গৰমৰ দিনত বেছিকৈ খাবলৈ মন নাযায় যদিও লঘু খাদ্য বা গোটা ফল-মূল লগত ৰাখিব।
৭)চেনি খোৱাৰ পৰা বিৰত থাকক
অতিৰিক্ত চেনি থকা খাদ্য পৰিহাৰ কৰক। তেজত চেনিৰ মাত্ৰা বৃদ্ধি হ’লে মাইগ্ৰেইন হোৱাৰ সম্ভাৱনা বেছি। মাজে মাজে মিঠা কিবা এটা খাব পাৰে, কিন্তু কম পৰিমাণে।
