ৰাজ্যজুৰি বৃদ্ধি পাইছে হাতী-মানুহৰ সংঘাত। কেতিয়াবা যদি হাতীয়ে মানুহ মাৰিছে কেতিয়াবা আকৌ মানুহে হাতী মাৰিবলৈ উদ্যত হৈছে। তেনে এক ঘংঘাতৰ পৰিণতিত সংঘটিত হ’ল এক কৰুণ ঘটনা।আৰু এই ঘটনা সংঘটিত হৈছে মহানগৰৰ দাতি কাষৰীয়া অসম মেঘালয় সীমান্তৰ ৰাণী অঞ্চলত।বৃহস্পতি বাৰে নিশা অসম মেঘালয় সীমান্তৰ ৰাণী বনাঞ্চলিক বিষয়া কাৰ্যালয়ৰ অন্তৰ্গত ৰাণী উদয়পুৰৰ খেতিপথাৰত এটা পূৰ্ণবয়স্ক হাতীয়ে কৰুণ মৃত্যুক সাৱটি লয়।
খবৰ অনুসৰি নিশা বিদ্যুৎতৰ তাৰত লাগি মৃত্যু হ’ল এটা প্ৰায় ৪০ বছৰ বয়সীয়া দঁতাল হাতীৰ। যি ঘটনাই এতিয়া সমগ্ৰ অঞ্চলত চাঞ্চল্যৰ সৃষ্টি কৰিছে। ঘটনা সন্দৰ্ভত জানিব পৰা মতে নিশাৰ ভাগত খাদ্যৰ সন্ধানত কাৱাছিং সংৰক্ষিত বনাঞ্চলৰ পৰা ওলাই আহিছিল এই বনৰীয়া হাতীটো। আৰু খেতি পথাৰত প্ৰবেশ কৰি ধান খাবলৈ আৰম্ভ কৰোতেই বিদ্যুতৰ তাৰত লাগি মৃত্যু হ’য় হাতীটোৰ।পুৱা সেই খবৰ বিয়পি পৰাৰ লগে লগেই অঞ্চলবাসী আহি উপস্থিত হ’য় উক্ত অঞ্চলত
।
স্থানীয় ৰাইজে ততাতৈয়াকৈ বন বিভাগক খবৰ দিয়াত ঘটনাস্থলীত ৰাণীৰ বনাঞ্চলিক বিষয়া মনোৰঞ্জন বৰ্মন আৰু ৰাণী আৰক্ষী চকীৰ ভাৰপ্ৰাপ্ত আৰক্ষী বিষয়া তবুল বড়ো আহি উপস্থিত হৈ ঘটনা সন্দৰ্ভত তদন্ত আৰম্ভ কৰে।ইতিমধ্যে তদন্তত দুজন লোকক আটক কৰে আৰক্ষীয়ে।উল্লেখযোগ্য যোগ্য যে এই আটকাধীন দুজন লোক হৈছে পিতা পুত্ৰ । পিতৃৰ নাম হৈছে ৰামেশ্বৰ কলিতা আৰু পুত্ৰৰ নাম হৈছে গৌতম কলিতা।
ইফালে ঘটনাৰ খবৰ পাই পূব কামৰূপ বন সংমণ্ডলৰ বন সংমণ্ডল প্ৰাধিকাৰী ৰোহিনী কুমাৰ শইকীয়া,সহকাৰী বন সংৰক্ষকদ্বয় জ্ঞান ৰঞ্জন দাস আৰু গোলাপ বণিয়াই ঘটনাস্থলীত উপস্থিত হৈ সমগ্ৰ ঘটনাৰ বুজ লয়। ইতিমধ্যে ৰাণীৰ জেষ্ঠ পশু চিকিৎসক ডা:নাৰায়ণ দেউৰীয়ে হাতীটোৰ মৰণোত্তৰ পৰীক্ষা সম্পন্ন কৰে। এই সকলো কাম সমাপন হোৱাৰ পিছত বিভাগীয় নীতি-নিয়মেৰে সমাধিস্থ কৰা হ’য় হাতীটোৰ।
উল্লেখযোগ্য যে ৰাণীৰ এই বৃহৎ খেতি পথাৰত প্ৰায়েই বনৰীয়া হাতীয়ে খেতি-পথাৰ তহিলং কৰি আহিছে ।খেতি কৰি জীৱন নিৰ্বাহ কৰা এইসকল লোকে বিভিন্ন সময়ত এনে অৱস্থাত পৰি হাহাকাৰ কৰিবলগীয়া হৈছে। মূলতে এই সংঘাত বৃদ্ধি পোৱাৰ একমাত্ৰ কাৰণ হৈছে অসম -মেঘালয় সীমান্তৰ বনাঞ্চল ধ্বংস যজ্ঞ।ফলত খাদ্যৰ সন্ধানত জনাঞ্চললৈ ওলাই আহে জাকে জাকে বনৰীয়া হাতীৰ দল।এতিয়া স্থানীয় ৰাইজে বিচাৰিছে সময় থাকোতেই চৰকাৰে উচিত ব্যৱস্থা গ্ৰহণ কৰক। অন্যথা অনাগত দিনত যে আৰু অধিক হাতী-মানুহৰ সংঘাত অধিক বৃদ্ধি পাব সেইয়া খাটাং।
