শীতকালেই হওক বা গৰম হওঁক, ব্ৰণৰ সমস্যা একেবাৰে কমি যোৱা নাই নেকি ? ব্ৰণ নোহোৱা হ’লেও ক’লা দাগবোৰ দীঘলীয়া সময়ৰ বাবে থাকি যায় ৷ আপুনি ভাবিছেনে যে ইমান যত্ন লোৱাৰ পিছতো ব্ৰণৰ সমস্যা কিয় কমি নাযায়? দৈনন্দিন খাদ্য, পানীয়, পৰিষ্কাৰ-পৰিচ্ছন্নতাৰ পৰা আৰম্ভ কৰি, দৈনন্দিন জীৱনৰ প্ৰদূষণ আদি সকলোৰে ওপৰত ছালৰ স্বাস্থ্য নিৰ্ভৰ কৰে। গতিকে যদি আপুনি ছাল ভালে ৰাখিব বিচাৰে তেন্তে এতিয়াই আপোনাৰ জীৱনশৈলীত কিছু পৰিৱৰ্তন কৰিব লাগিব।
ব্ৰণৰ পৰা পৰিত্ৰাণ পাবলৈ বহুতে বিখ্যাত আৰু ব্যয়বহুল প্ৰসাধন সামগ্ৰীৰ লগতে ছ’চিয়েল মিডিয়াত দেখা পোৱা কিছুমান ঘৰুৱা ঔষধ ব্যৱহাৰ কৰে। ছ’চিয়েল মিডিয়াত দেখাৰ পিছত বহুতে সৌন্দৰ্য্য চৰ্চা কৰে। সকলো প্ৰসাধন সামগ্ৰী সকলোৰে ছালৰ বাবে ভাল নহয়। বিশেষকৈ যিসকলৰ ছালত ব্ৰণৰ সমস্যা আছে, তেওঁলোকে প্ৰসাধন সামগ্ৰী বাছনি কৰাত অতি সাৱধান হ’ব লাগে।
ব্ৰণৰ সমস্যা থাকিলে মেকআপৰ কেনে উপাদান পৰিহাৰ কৰক?
১) ভিটামিন কেপচুল: ছ’চিয়েল মিডিয়াত বহু ভিডিঅ’ত দেখা গৈছে যে ভিটামিন চি, এ আৰু ই কেপচুল ফেচ পেকত ব্যৱহাৰ কৰা হয়। এই সকলোবোৰ ভিটামিন ছালখনক সজীৱ কৰি তোলাত যথেষ্ট উপকাৰী যদিও কেপচুলত থকা তৰল পদাৰ্থৰ পৰিমাণ সালসলনি হ’লে ছালৰ গুৰুতৰ ক্ষতি হ’ব পাৰে। এই ক্ষেত্ৰত ভিটামিন চি, এ আৰু ই যুক্ত প্ৰসাধন সামগ্ৰী ব্যৱহাৰ কৰাটো ভাল।
২) নেমুঃ মেকআপৰ সময়ত ফেচ পেক বনাবলৈ বহুতে নেমু ব্যৱহাৰ কৰে। এই পেকটো মুখত লগালে মুখৰ ক’লা দাগবোৰ আঁতৰি যায়, ই ছালৰ উজ্জ্বলতা পুনৰ ঘূৰাই অনাতো উপযোগী। নেমুৰ ৰস ফেচ পেক হিচাপে ব্যৱহাৰ কৰিলে বহুতে সুফল লাভ কৰে ৷ কিন্তু কেৱল নেমুৰ ৰস ছালত লগোৱাটো অতি বিপদজনক। নেমুৰ ৰস অতি অম্লীয় প্ৰকৃতিৰ। নেমুৰ ৰস পোনপটীয়াকৈ মুখত লগালে ছালৰ অপকাৰ সাধন হ’ব পাৰে ৷
৩) টুথপেষ্টঃ ছ’চিয়েল মিডিয়াত বহু ভিডিঅ’ত আপুনি দেখিব যে টুথপেষ্ট ব্যৱহাৰ কৰি ব্ৰণ সোনকালে কমাব পাৰি। ছালত টুথপেষ্ট লগালে অধিক মেলানিন উৎপন্ন হয়, যাৰ ফলত সেই অংশ ক’লা হৈ পৰে। গতিকে টুথপেষ্ট কেতিয়াও মুখত লগাব নালাগে। ব্ৰণত টুথপেষ্ট প্ৰয়োগ কৰিলে উপকাৰী বুলি থকা ধাৰণাটোও ভুল।
