প্ৰটিন আৰু কাৰ্বহাইড্ৰেটৰ দৰেই ভিটামিন শৰীৰৰ এক অপৰিহাৰ্য উপাদান। আৰু সেই ভিটামিনৰ বিভিন্ন অংশ আছে। তাৰ ভিতৰত ভিটামিন চি শৰীৰৰ বাবে অতি গুৰুত্বপূৰ্ণ ভিটামিন। পুষ্টিবিদসকলে কয় যে যদি আপুনি আপোনাৰ শৰীৰক সুস্থ কৰি ৰাখিব বিচাৰে তেন্তে কিছুমান খাদ্য শস্য খাব লাগে য’ত ভিটামিন চি থাকে।
ভিটামিন চিয়ে শৰীৰৰ পৰা প্ৰদূষক দ্ৰব্য আঁতৰোৱাত সহায় কৰাৰ লগতে ই ওজন হ্ৰাসতো সহায় কৰে। শৰীৰত এই ভিটামিনৰ অভাৱত দাঁতৰ আলুৰ পৰা তেজ ওলোৱাৰ লগতে ইয়াৰ ৰোগ হ’ব পাৰে। ছালৰ বিভিন্ন ৰোগ হ’ব পাৰে। আন বিভিন্ন ধৰণৰ সংক্ৰামক ৰোগও হ’ব পাৰে। গতিকে জানো আহক ভিটামিন চি শৰীৰৰ বাবে কিয় গুৰুত্বপূৰ্ণ আৰু ইয়াৰ অভাৱ হ’লে কি হ’ব পাৰে।
ভিটামিন চি কিয় গুৰুত্বপূৰ্ণ?
১. শৰীৰৰ বিভিন্ন ৰোগ প্ৰতিৰোধ ক্ষমতা বৃদ্ধি কৰে।
২. সংক্ৰামক ৰোগৰ পৰা শৰীৰক ৰক্ষা কৰে।
৩. ভাল ছাল আৰু চুলিৰ বাবে ভিটামিন চি জৰুৰী। ভিটামিন চিয়ে কলাজেন (এবিধ প্ৰ’টিন) তৈয়াৰ কৰিব পাৰে। সুস্থ ছালৰ বাবে কলাজেন প্ৰটিন গুৰুত্বপূৰ্ণ।
৪. ঘাঁ সোনকালে ভাল হোৱাত সহায় কৰে।
৫. ভিটামিন চি শৰীৰৰ লগতে মনৰ বাবেও উপকাৰী। দৈনিক খাদ্যত মধ্যমীয়া পৰিমাণৰ ভিটামিন চি ৰাখিলে মানসিক চাপ আৰু হতাশাৰ পৰা উপশম পাব পাৰি ৷
আপুনি কি কি খাদ্যত ভিটামিন চি পাব পাৰে?
টেঙাজাতীয় ফলত প্ৰচুৰ পৰিমাণে ভিটামিন চি থাকে। বতৰ পৰিৱৰ্তনৰ সময়ত এই ফলবোৰ বেছিকৈ খোৱাটো বাঞ্ছনীয়। বিলাহী, অমিতা,মধুৰিআম কেপচিকাম, ষ্ট্ৰবেৰী, ব্ৰকলি, সৰিয়হৰ শাক,নেমু,কমলা আদি – ভিটামিন চিৰ ভাল উৎস।
শৰীৰত ভিটামিন চিৰ অভাৱত কি কি সমস্যা হয়?
বেছিভাগ ভাৰতীয় মহিলাই ভিটামিন চিৰ অভাৱত ভোগে। বহুতে হয়তো জানে যে ভিটামিন চিৰ অভাৱত মুখৰ ভিতৰত ঘাঁ হয়, অত্যধিক চৰ্দি হয়। ইয়াৰ বাহিৰেও আন বহুতো লক্ষণ দেখা যায়। এই ভিটামিন অতি শক্তিশালী এন্টিঅক্সিডেন্ট। গতিকে ইয়াৰ অভাৱ হ’লে ভাইৰাছ বা বেক্টেৰিয়াৰ ফলত হোৱা ৰোগ হোৱাৰ সম্ভাৱনা বেছি। ছালৰ স্বাস্থ্যৰ অৱনতি ঘটিলে প্ৰথমে ভিটামিন চিৰ অভাৱ দেখা যায়। ছালৰ বাহিৰৰ তৰপ বা এপিডাৰ্মিছ ক্ৰমান্বয়ে নিস্তেজ আৰু পাতল হৈ পৰে। এই স্তৰৰ তলৰ ৰক্তবাহী নলীবোৰ খহিবলৈ আৰম্ভ কৰে। দাঁতৰ গুৰিত কেলচিয়াম জমা হ’বলৈ আৰম্ভ কৰে। দাঁতৰ আলু দুৰ্বল হৈ পৰে। দাঁতৰ আলুৰ পৰা তেজ ওলাব পাৰে। ভিটামিন চিৰ অভাৱেও আপোনাৰ হাড়বোৰ দুৰ্বল আৰু ভংগুৰ কৰি তুলিব পাৰে। অষ্টিঅ’পৰ’ছিছৰ সম্ভাৱনা বৃদ্ধি পাব পাৰে। শিশুৰ ভিটামিন চিৰ অভাৱ আৰু অধিক সমস্যাজনক। হাড়ৰ গঠন মজবুত নহ’ব। ফলত পিছলৈ বিভিন্ন সমস্যাৰ সৃষ্টি হ’ব।
