শৰীৰৰ নিজস্ব প্ৰটিন অৰ্থাৎ কলাজেনে চুলিক সুস্থ কৰি ৰখাত মুখ্য ভূমিকা পালন কৰে। ‘নেচনেল চেণ্টাৰ ফৰ বায়’টেকন’লজি ইনফৰ্মেশ্যন’-এ প্ৰদান কৰা তথ্য অনুসৰি এই কলাজেনে চুলিৰ ঘনত্ব বৃদ্ধিত গুৰুত্বপূৰ্ণ ভূমিকা পালন কৰে। কলাজেনে চুলি সৰা ৰোধ কৰাত সহায় কৰে। কিন্তু বয়স বৃদ্ধিৰ লগে লগে শৰীৰত কলাজেনৰ লগতে অন্যান্য পদাৰ্থৰ অভাৱ হ’ব পাৰে। ইয়াৰ লগত যোগ হৈছে অনিয়ন্ত্ৰিত জীৱনশৈলী আৰু অস্বাস্থ্যকৰ খাদ্যাভ্যাস। যাৰ ফলত কলাজেন উৎপাদনৰ হাৰ লেহেমীয়া হয়। ফলত চুলিৰ গুণগত মান অৱনমিত হ’বলৈ ধৰে। কিন্তু পুষ্টিবিদসকলে কয় যে কিছুমান বিশেষ খাদ্য আছে যিবোৰ নিয়মিতভাৱে খালে কলাজেন উৎপাদনৰ হাৰ বৃদ্ধি পায়। সেইবোৰ কি?
১) ভিটামিন চি
এই ভিটামিন কলাজেন উৎপাদনত অতি উপযোগী। গতিকে চুলি আৰু মূৰৰ ছালৰ সুস্বাস্থ্য বজাই ৰাখিবলৈ টেঙা ফল, নেমু, ষ্ট্ৰবেৰী, আনাৰস, লিচু আদি ফলমূল খাদ্যত ৰাখিব লাগে।
২) এলোভেৰা
এই বনৌষধিবিধত কেইবাটাও এন্টি-ইনফ্লেমেটৰী গুণ আছে। যিয়ে মূৰৰ ছালত ৰক্ত সঞ্চালন বৃদ্ধি কৰাত সহায় কৰে। এই বনৌষধিবিধে কলাজেন উৎপাদনৰ হাৰ বৃদ্ধিতো উল্লেখযোগ্য ভূমিকা পালন কৰে।
৩)প্ৰটিন সমৃদ্ধ খাদ্য
শৰীৰত কলাজেন উৎপাদনত এমিনো এচিডে গুৰুত্বপূৰ্ণ ভূমিকা পালন কৰে। প্ৰটিনযুক্ত খাদ্য, যেনে- মাংস, কণী, বাদাম, টফু, পনিৰ, মাছ, গাখীৰ আদিয়ে শৰীৰত এমিনো এচিডৰ মাত্ৰা বৃদ্ধি কৰে। ফলত কলাজেন উৎপাদনৰ হাৰো বৃদ্ধি পায়।
৪) জিংক
শৰীৰত কলাজেন উৎপন্ন কৰিবলৈও জিংকৰ প্ৰয়োজন হয়। ই কলাজেন সহজে ভাঙিবলৈ নিদিয়ে। আপোনাৰ খাদ্যত কাজু, দুগ্ধজাত সামগ্ৰী খাদ্য ৰাখিব পাৰে।
৫) মেংগানিজ
মেংগানিজে শৰীৰত কলাজেন উৎপাদনৰ বাবে প্ৰয়োজনীয় এনজাইমৰ কাৰ্য্যকলাপ বৃদ্ধি কৰাত সহায় কৰে। এই খনিজ পদাৰ্থ গোটা শস্য, বাদাম, ব্ৰাউন ৰাইচ আৰু সেউজীয়া শাক-পাচলিত প্ৰচুৰ পৰিমাণে পোৱা যায়। গতিকে এই খাদ্যসমূহ খাদ্য তালিকাত অন্তৰ্ভুক্ত কৰিব লাগিব।
