আপুনি প্ৰতিদিনে ষ্টীলৰ বাচন-বৰ্তন ব্যৱহাৰ কৰাৰ পাছত ইয়াৰ সঠিক যত্ন লৈছেনে? দাইল, তাৰিকাৰি ৰাখিবলৈ ব্যৱহাৰ কৰা পাত্ৰসমূহত গাঢ় বাদামী ৰঙৰ দাগ দেখা যায় ৷ ইয়াৰ বাহিৰেও জুইৰ শিখাৰ বাবে পাত্ৰটোৰ তলত ক’লা দাগ পৰে। বাচন-বৰ্তনবোৰ ভালদৰে চাফা নকৰিলে ষ্টীলৰ বাচনবোৰ অতি সোনকালে ক’লা পৰিব পাৰে। বহুতে ভাবে যে ষ্টীলৰ বাচন-বৰ্তনবোৰ চকচকীয়া কৰি ৰখাটো অত্যন্ত কঠিন কাম। গতিকে এতিয়া বহু ঘৰত ষ্টীলতকৈ কাঁচৰ বাচন বেছি ব্যৱহাৰ কৰা হয়। সঠিক যত্ন আৰু চাফা কৰিলে ষ্টীলৰ ৰন্ধন সামগ্ৰী নতুন বাচনৰ দৰে জিলিকি উঠিব। কেনেদৰে ষ্টীলৰ বাচনবোৰ পৰিস্কাৰ কৰিব ?
১) ৰন্ধা পিছত আমি গৰম খাদ্য ষ্টীলৰ পাত্ৰটোত ঢালি দিওঁ। গতিকে খোৱাৰ পিছতো বাচনবোৰ গৰম হৈ আছে নেকি পৰীক্ষা কৰক। বাচনবোৰ ঠাণ্ডা হোৱাৰ পিছতহে ধুব লাগে।
২) ষ্টীলৰ পাত্ৰত ৰন্ধা সময়ত জুইৰ শিখা বেছি ওখকৈ ৰাখিব নালাগে। প্ৰথমতে তাপ বঢ়াই তাৰ পিছত কমাই দিব। জুইৰ শিখা কমাই ৰাখিলে বাচন-বৰ্তন জ্বলি নাযায়।
৩) ষ্টীলৰ বাচনত ৰান্ধি থাকোঁতে পাত্ৰত আগতীয়াকৈ নিমখ নিদিব । ইয়াৰ ফলত বাচন-বৰ্তন সোনকালে নষ্ট হ’ব। প্ৰথমে আন উপাদান দিব, তাৰ পিছত নিমখ দিব।
৪) যদি আপুনি মিঠা আৰু টেঙা চাটনি বা টেঙা যিকোনো বস্তু ৰান্ধে বা ৰন্ধা-বঢ়াত ভিনেগাৰ ব্যৱহাৰ কৰে তেন্তে প্ৰথমে বাচন ধুই লওক। পিছত ধুব বুলি ভাবি বাচনবোৰ এৰি নাযাব।
৫) বহুদিন ব্যৱহাৰ কৰি থকা বাচনটোৰ ৰং লেতেৰা হৈ যাব। ইয়াৰ বাহিৰেও বাচনবোৰত ক’লা বা গাঢ় বাদামী ৰঙৰ দাগ পৰিব। এই দাগবোৰ আঁতৰাই বাচন-বৰ্তনবোৰ চিকচিকিয়া দেখাবলৈ বেকিং চোডা আটাইতকৈ উত্তম উপায়। পানী গৰম কৰি তাত দুই-তিনি চামুচ বেকিং চোডা ঢালি দিব। এইবাৰ ষ্টীলৰ বাচনবোৰ তাত কমেও ৩ ঘণ্টা তিয়াই থওক। যদি আপুনি ইয়াক আৰু বেছি দেৰি ৰাখিব পাৰে, তেন্তে সেয়া বৰ ভাল। দেখিব, বাচনটো নতুনৰ দৰে হৈ পৰিছে ।
৬) ষ্টীলৰ কেৰাহীখন যিমানেই লেতেৰা নহওক কিয় তাত দাগ পৰিবই। এই দাগবোৰ আঁতৰাবলৈ ভিনেগাৰ ব্যৱহাৰ কৰিব পাৰে। ভিনেগাৰৰ বটলৰ এক চতুৰ্থাংশ লৈ বাকীখিনি গৰম পানীৰে ভৰাই লওক। ভালদৰে মিহলাই সেই মিশ্ৰণত পাত্ৰটো আধা ঘণ্টা তিয়াই থওক। ইয়াৰ পিছত বাচন-বৰ্তন ধুই শুকান কাপোৰেৰে ভালদৰে মচি দিব।
৭) বাচন ধোৱাৰ পিছত শুকান কাপোৰেৰে মচি থব লাগে ৷
৮) বাচনত মামৰ পৰিলে সেই ঠাইত নিমখ ছটিয়াই দিব। ইয়াৰ পিছত সেই ঠাইত অলপ নেমুৰ ৰস দিব। কেইঘণ্টামান এনেকৈ থৈ দিব। ইয়াৰ পিছত ভালদৰে ঘঁহিলে ষ্টীলৰ বাচন-বৰ্তনবোৰ একেবাৰে জিলিকি উঠিব।
