ভাৰতৰ প্ৰাক্তন ক্ৰিকেট তাৰকা যুৱৰাজ সিং ফাউণ্ডেচনে অসম চিকিৎসা মহাবিদ্যালয় চিকিৎসালয়লৈ আগবঢ়োৱা ৫০ খন বিচনাৰ ক্ৰিটিকেল কেয়াৰ ইউনিটৰ বৃ্হস্পতি বাৰে শুভ উদ্বোধন কৰে ৰাজ্যৰ স্বাস্থ্য ও পৰিয়াল কল্যাণ মন্ত্ৰী কেশৱ মহন্তই।
খেলুৱৈ গৰাকীৰ দাতব্য সংস্থা ’ইউউইকেন ফাউণ্ডেচন’ৰ উদ্যোগত আগবঢ়োৱা এই চিচিইউৰ ভাৰ্চুৱেল উদ্বোধনী অনুষ্ঠানত যুৱৰাজ সিঙৰ লগতে তেওঁৰ মাতৃ শ্বৱনম সিঙেও চণ্ডীগড়ৰ পৰা ভিডিঅ’ কনফাৰেন্সিঙৰ যোগে যোগদান কৰে।
বৃ্হস্পতিবাৰে বিয়লি গুৱাহাটী এনএইছএমৰ ৰাজ্যিক কাৰ্যালয়ত অনুষ্ঠিত হোৱা এই ভিডিঅ’ কনফাৰেন্সিঙত স্বাস্থ্য মন্ত্ৰীৰ লগতে এনএইচএমৰ ৰাজ্যিক অভিযান সঞ্চালক ডাঃএছ লক্ষ্মনন আৰু কাৰ্যবাহী সঞ্চালক ডাঃ মনোজ চৌধুৰীয়ে অংশ লয়।
একেদৰে ডিব্ৰুগড় অসম চিকিৎসা মহাবিদ্যালয় চিকিৎসালয়ৰ অধীক্ষক তথা অধ্যাপক ডাঃ প্ৰশান্ত দিহিংগীয়া আৰু অধ্যাপিকা ডাঃ জলী ৰাভা আৰু নতুন দিল্লীৰ উৱান ইণ্ডিয়া এন্টাৰটেইমেন্টৰ পৰিচালন সঞ্চালক ছবিৰ মমিন,এচেনচিউৰ ইণ্ডিয়াৰ পৰিচালন সঞ্চালিকা ক্ষিতিজা কৃষ্ণাস্বামীৰ লগতে ইউউইকেন ফাউণ্ডেচনৰ হৈ কাৰ্যবাহী পুনম নন্দাই ভাগ লয়।
উল্লেখযোগ্য যে চলিত বৰ্ষত ক’ভিডৰ দ্বিতীয় ঢৌ চলি থকা সময়তে এই ফাউণ্ডেচনে গুৰুতৰ ভাৱে ক‘ভিডত আক্ৰান্ত হোৱা লোকৰ সহায়ৰ বাবে প্ৰথম পৰ্যায়ত দহখন আইচিইউ ভেন্টিলেটৰযুক্ত বিচনাৰ লগতে মুঠ ৫০ খন বিচনাৰ এই চিচিইউটো স্থাপনৰ ব্যৱস্থা কৰিছিল।
মুঠ ১০০ খন আইচিইউৰ বিচনা আগবঢ়োৱা কথা ঘোষণা কৰা যুৱৰাজ সিঙৰ ফাউণ্ডেচনে দ্বিতীয় পৰ্যায়ত পুনৰ ১০ খন আইচিইউ ভেন্টিলেটৰ যুক্ত বিচনাৰ লগতে মুঠ ৫০ খন অক্সিজেন যুক্ত বিচনা আগবঢ়াব।
ক’ভিডৰ পৰিস্থিতি শাম কটাৰ লগে লগে এই চিচিইউ কক্ষটোক কৰ্কট ৰোগত আক্ৰান্ত শিশুৰ বাবে আগবঢ়োৱা হ’ব। ইফালে এই অৱদানৰ বাবে স্বাস্থ্যমন্ত্ৰী কেশৱ মহন্তই যুৱৰাজ সিং ফাউণ্ডেচনলৈ কৃতজ্ঞতা জ্ঞাপন কৰাৰ লগতে কৰ্কট ৰোগত আক্ৰান্ত শিশু সকলৰ বাবে এই ফাউণ্ডেচনে আগবঢ়োৱা সহায়ক ভূয়সী প্ৰশংসা কৰে।
