গুৱাহাটী, ২৩ নৱেম্বৰঃ বিকশিত ভাৰত সংকল্প যাত্ৰা কাৰ্যসূচী আজিৰে পৰা কামৰূপ মহানগৰ জিলাত আৰম্ভ হৈছে৷ জিলাখনৰ ডিমৰীয়া উন্নয়ণ খণ্ডৰ অধীনৰ সোনাপুৰ গাঁও পঞ্চায়ত আৰু ক্ষেত্ৰী গাঁও পঞ্চায়তত আজি এই কাৰ্যসূচী ৰূপায়ন কৰা হয়৷ ক্ষেত্ৰী পঞ্চায়তত বিকশিত ভাৰত সংকল্প যাত্ৰাৰ বাৰ্তা কঢ়িয়াই সাজু কৰা ভ্ৰাম্যমান প্ৰচাৰ বাহনৰ যাত্ৰাৰ শুভাৰম্ভ কৰে দিছপুৰ সমষ্টিৰ বিধায়ক অতুল বৰাই৷
অতিৰিক্ত জিলা আয়ুক্ত পিংকী দত্ত প্ৰমুখ্যে কেবাগৰাকী বিষয়া, পঞ্চায়ত প্ৰতিনিধি যাত্ৰাৰম্ভ কাৰ্যসূচীত উপস্থিত থাকে৷ ইয়াৰ পিছতে বিধায়ক অতুল বৰাৰ উপস্থিতিত অনু্ষ্ঠিত এখন সভাত পঞ্চ সংকল্প পাঠ কৰা হয়৷ সভাত কেবাগৰাকী হিতাধিকাৰীয়ে তেওঁলোকৰ জীৱনলৈ চৰকাৰী আঁচনিয়ে অনা ইতিবাচক পৰিৱৰ্তনৰ কথা সদৰি কৰে৷ সভাত ‘টিবি মুক্ত ভাৰত’ৰ অধীনত এজন নিক্ষয় মিত্ৰক সম্বৰ্ধনা, এজন টি বি আৰোগ্য ব্যক্তিক প্ৰমাণ পত্ৰ, এজন টি বি আক্ৰান্তক খাদ্যৰ টোপোলা বিতৰণ কৰা হয়৷
সভাত ভাষণ দি বিধায়ক অতুল বৰাই বিকশিত ভাৰত সংকল্প যাত্ৰাৰ বিষয়ে সহজ ভাষাত ব্যাখ্যা কৰে৷ কাৰ্যসূচীৰ সৈতে সংগতি ৰাখি স্বাস্থ্য শিবিৰ, আধাৰ পঞ্জীয়ন শিবিৰৰ আযোজন কৰা হয় আৰু স্থানীয় শিশুসকলে ঝুমুৰ নৃত্য পৰিবেশন কৰে৷ ইপিনে সোনাপুৰ পঞ্চায়তত ভ্ৰাম্যমান প্ৰচাৰ বাহনৰ যাত্ৰাৰ শুভাৰম্ভ কৰে জিলা পৰিষদৰ মুখ্য কাৰ্যবাহী বিষয়া ডৰথী ছুচিয়াঙে৷ কামৰূপ মহানগৰ জিলাৰ ডিমৰীয়া, চন্দ্ৰপুৰ আৰু ৰাণী উন্নয়ণ খণ্ডৰ অধীনৰ ২১ টা গাঁও পঞ্চায়তত আৰু পৰৱৰ্তী সময়ত গুৱাহাটী পৌৰ নিগমত বিকশিত ভাৰত সংকল্প যাত্ৰাৰ কাৰ্যসূচী ৰূপায়ন কৰা হব৷ উল্লেখ্য যে চৰকাৰী আঁচনিৰ সুবিধা পোৱাৰ বাবে যোগ্য হৈও সুবিধা নোপোৱা লোকসকলক বিচাৰি উলিওৱা, তেওঁলোকক প্ৰয়োজন অনুসৰি আঁচনিৰ অন্তৰ্ভুক্ত কৰা, চৰকাৰী আঁচনিৰ বিষয়ে প্ৰচাৰ আৰু সজাগতা সৃষ্টি কৰা, চৰকাৰী আঁচনিৰ হিতাধিকাৰীৰ মনৰ কথা শুনাৰ উদ্দেশ্যৰে সমগ্ৰ দেশজুৰি কেন্দ্ৰীয় চৰকাৰে বিকশিত ভাৰত সংকল্প যাত্ৰা কাৰ্যসূচী গ্ৰহণ কৰিছে৷
