জলসম্পদ, তথ্য আৰু জনসংযোগ আদি বিভাগৰ মন্ত্ৰী পীযুষ হাজৰিকাই ৬ ফেব্ৰুৱাৰীত অসম চৰকাৰৰ বিত্ত বিভাগৰ উদ্যোগত নগাঁও আৰু মৰিগাঁও জিলাত জিলা প্ৰশাসনৰ সহযোগত অনুষ্ঠিত অসম মাইক্ৰ ফাইনেন্স উদগণি আৰু সকাহ আঁচনিৰ শুভাৰম্ভণি অনুষ্ঠানত অংশ গ্ৰহণ কৰে | দিনটোৰ প্ৰথমভাগত নগাঁও জিলাৰ অভিভাৱক মন্ত্ৰী গৰাকীয়ে বিত্ত বিভাগ আৰু জিলা প্ৰশাসনৰ উদ্যোগত জিলাখনৰ নেহৰুবালিত আয়োজিত অসম মাইক্ৰ’ফাইনেন্স উদগণি আৰু সকাহ আঁচনিৰ অধীনত নিয়মীয়াকৈ ঋণ পৰিশোধ কৰা প্ৰথম শ্ৰেণীৰ ৮৬,৯৫৫ গৰাকী হিতাধিকাৰীৰ মাজৰ ৬০০০ গৰাকী হিতাধিকাৰীক উদগণিমূলক সাহায্যৰ চেক প্ৰদান কৰে ৷ এই অনুষ্ঠানত অসম চৰকাৰৰ স্বাস্থ্য মন্ত্ৰী কেশৱ মহন্তই অংশ লয় | অনুষ্ঠানত বক্তব্য ৰাখি মন্ত্ৰী গৰাকীয়ে কয় যে মুখ্যমন্ত্ৰী ড০ হিমন্ত বিশ্ব শৰ্মাৰ নেতৃত্বত চৰকাৰ গঠন কৰাৰ মাথো ৭ টা মাহৰ ভিতৰতে অসম মাইক্ৰ’ফাইনেন্স উদগণি আৰু সকাহ আঁচনিৰ অধীনত প্ৰায় ৮,৫০০ কোটি টকাৰ ঋণ ৰেহাই কৰাতো তেওঁৰ প্ৰায় ২৫ বছৰীয়া ৰাজনৈতিক জীৱনত দেখা পোৱা এজন মুখ্যমন্ত্ৰীয়ে আটাইতকৈ বৃহৎ নিৰ্বাচনী প্ৰতিশ্ৰুতি পালন কৰাৰ একমাত্ৰ উদাহৰণ | আনহাতে প্ৰায় ৮,৫০০ কোটি টকাৰ মাইক্ৰ’ফাইনেন্সৰ ঋণ ৰেহাই দিও অসমৰ উন্নয়নক ব্যাহত হ’বলৈ দিয়া নাই বুলি উল্লেখ কৰি মন্ত্ৰী গৰাকীয়ে কয় যে অসমত উন্নয়নৰ ধাৰা কোনোমতে স্তব্ধ হ’বলৈ দিয়া হোৱা নাই | মাজুলী সংযোগী দলঙৰ লগতে গুৱাহাটীত ব্ৰহ্মপুত্ৰৰ ওপৰত তৃতীয়খন দলঙৰ কামৰ উপৰিও আন উন্নয়নমূলক কামো ৰাজ্য চৰকাৰে ইতিমধ্যে কৰি থকা বুলি তেঁও উল্লেখ কৰে | একেটা সময়তে মুখ্যমন্ত্ৰীয়ে অসমক ভাৰতৰ পাঁচখন উন্নত ৰাজ্যলৈ উন্নীত কৰিবলৈ দেখা সপোনক বাস্তৱ ৰূপ দিবলৈও চৰকাৰ বদ্ধপৰিকৰ বুলি মন্ত্ৰী পীযুষ হাজৰিকাই উল্লেখ কৰে | আনহাতে গঁড় হত্যা ৰোধ কৰা, অসমক ড্ৰাগচমুক্ত, দুৰ্নীতিমুক্ত কৰি স্ব-নিৰ্ভৰশীল কৰি গঢ় দিয়াৰ ক্ষেত্ৰত চৰকাৰে কাম কৰি আছে বুলিও উল্লেখ কৰে মন্ত্ৰী গৰাকীয়ে | নগাঁৱত আজিৰ এই সভাত প্ৰাক্তন কেন্দ্ৰীয় মন্ত্ৰী ৰাজেন গোহাঁই, নগাঁও সদৰ বিধানসভা সমষ্টিৰ বিধায়ক ৰূপক শৰ্মা, বঢ়মপূৰ বিধানসভা সমষ্টিৰ বিধায়ক জিতু গোস্বামী, ৰহা বিধানসভা সমষ্টিৰ বিধায়ক শশী কান্ত দাসকে ধৰি জিলা প্ৰশাসনৰ শীৰ্ষ বিষয়া সকল উপস্থিত আছিল |
তদুপৰি মন্ত্ৰী তথা মৰিগাঁও জিলাৰ জাগীৰোড সমষ্টিৰ বিধায়ক পীযুষ হাজৰিকাই জিলাখনৰ অভিভাৱক মন্ত্ৰী কেশৱ মহন্তৰ সৈতে জিলাখনত বিত্ত বিভাগ আৰু জিলা প্ৰশাসনৰ উদ্যোগত আয়োজিত অসম মাইক্ৰ’ফাইনেন্স উদগণি আৰু সকাহ আঁচনিৰ আন এক শুভাৰম্ভণি অনুষ্ঠানত অংশ লয় | জিলাখনত অসম মাইক্ৰ’ফাইনেন্স উদগণি আৰু সকাহ আঁচনি, ২০২১ ৰ অধীনত নিয়মীয়াকৈ ঋণ পৰিশোধ কৰা প্ৰথম শ্ৰেণীৰ প্ৰায় ১৬০০০ হিতাধিকাৰীৰ মাজৰ প্ৰায় ৩৫০০ গৰাকী হিতাধিকাৰীক উদগণিমূলক সাহাৰ্যৰ চেক প্ৰদান কৰা হয় | অনুষ্ঠানত বক্তব্য ৰাখি মন্ত্ৰীগৰাকীয়ে কয় যে অসমত আত্মসহায়ক গোট হৈছে এটা বিপ্লৱ | এই বিপ্লৱক আগুৱাই নি অসমক স্ব-নিৰ্ভৰশীল কৰাৰ স্বাৰ্থত অসম চৰকাৰে আজি এই ঋণ ৰেহাই আচঁনি হাতত লৈছে | মন্ত্ৰীগৰাকীয়ে কয় ‘ এই ক্ষেত্ৰত চৰকাৰে প্ৰয়োজনীয় সকলো ধৰণৰ সহযোগিতা কৰি আছে | অসমৰ কৃষক সমাজক সকাহ দি তেওঁলোকক তেঁওলোকৰ প্ৰাপ্য দিয়াৰ লক্ষৰে প্ৰতি কুইণ্টল ধানৰ বিপৰীতে ১৯৪০ টকাৰ দৰ দিয়াৰ ব্যৱস্থা কৰা হৈছে ৷ ড০ হিমন্ত বিশ্ব শৰ্মাৰ নেতৃত্বত অসম চৰকাৰে ৰাজ্যখনক দেশৰ অন্যতম উন্নত ৰাজ্যৰ মৰ্যাদা দিয়াৰ বাবে অহোপুৰুষাৰ্থ কৰি আছে | আনহাতে ৰাজ্যখনৰ লগতে মৰিগাঁও জিলাকো বানমুক্ত কৰাৰ বাবে জলসম্পদ বিভাগ বদ্ধপৰিকৰ ৷”মৰিগাঁও জিলাত অতি শীঘ্ৰে এখন মেডিকেল কলেজ স্থাপনৰ কাম আৰম্ভ কৰা হব বুলিও মন্ত্ৰীগৰাকীয়ে উল্লেখ কৰে | আজিৰ এই অনুষ্ঠানত বিধায়ক ৰমাকান্ত দেউৰী, শিবামণি বৰা, শশীকান্ত দাস, আছিফ নজৰ, তিৱা স্বায়ত্ব শাসিত পৰিষদৰ মুখ্য কাৰ্যবাহী সদস্য জীৱন কোঁৱৰৰ লগতে জিলা প্ৰশাসনৰ বিষয়াসকল উপস্থিত আছিল |
