শুকুৰবাৰে কইনাধৰা ৰাজ্যিক অতিথিশালাত অনুষ্ঠিত হোৱা কেবিনেট বৈঠকত ৰাজ্য চৰকাৰে বহুকেইটা গুৰুত্বপূৰ্ণ সিদ্ধান্ত গ্ৰহণ কৰে।বৈঠকৰ অন্তত মন্ত্ৰী পীয়ুষ হাজৰিকাই এক সংবাদমেল আয়োজন কৰি চৰকাৰে গ্ৰহণ কৰা এই পদক্ষেপ সমূহৰ ওপৰত আলোকপাত কৰে।
কেবিনেটৰ সিদ্ধান্ত অনুসৰি এপিডিচিএল য়ে ৩২৮৪ কোটি টকা ব্যয়ৰে শক্তি খণ্ডক উন্নত কৰা সিদ্ধান্ত গ্ৰহণ কৰিছে।
সেই অনুসৰি ভল্টেজ কম হোৱা ৰোধ কৰিবলৈ নতুনকৈ স্থাপন কৰা হ’ব ১৯৬ টা ছাব ষ্টেচন।লগতে ২৬০৫ কিঃমিঃনতুন ৩৩ কেভি লাইন আৰু ৩০১৮ কিঃমিঃ নতুন ১১ কেভি লাইন সংযোগ কৰা হ’ব।
ইয়াৰোপৰি ২০৭৪ টা নতুন হাইভল্টেজ ট্ৰেন্সফৰ্মাৰ স্থাপন কৰাৰ লগতে ১ লাখ ৮৬ হাজাৰ ২৫৫ টা নতুন প্ৰিপেইড স্মাৰ্ট মিটাৰ লগোৱা আৰু ৪০হাজাৰ নতুন ট্ৰেন্সফৰ্মাৰ মিটাৰ স্থাপন কৰাৰ কথা ঘোষণা কৰে ৰাজ্য চৰকাৰে।
ইয়াৰলগতে আবকাৰী ৰাজহ অপচয় ৰোধৰ বাবে ট্ৰেনজিট পাছৰ ব্যৱস্থা গ্ৰহণ কৰিছে ৰাজ্য চৰকাৰে।
ৰাজ্যত চুলাইৰ বিক্ৰী বন্ধ কৰিবলৈ দেশীয় সুৰাৰ আবকাৰী কৰ ৫৯ শতাংশ পৰ্যন্ত হ্ৰাস কৰাৰ সিদ্ধান্ত গ্ৰহণ কৰিছে ৰাজ্য চৰকাৰে।
উল্লেখযোগ্য যে,ৰাজ্য চৰকাৰে বিভিন্ন শিতানত আগবঢ়াই অহা বঁটাৰ ক্ষেত্ৰত প্ৰতি দুবছৰৰ অন্তৰে অন্তৰে গোপীনাথ বৰদলৈ বঁটা নিয়মীয়াকৈ দিয়াৰ কথা ঘোষণা কৰে।
ৰাজ্যৰ কেবিনেট সিদ্ধান্তত কোনো বিশেষ ব্যক্তি বা সংস্থাক দিবলগীয়া এই বঁটাত ৫ লাখকৈ টকা দিয়াৰ সিদ্ধান্ত গ্ৰহণ কৰি এইবাৰ এই বঁটা ৩ অক্টোবৰত প্ৰদান কৰা হ’ব বুলি জানিবলৈ দিয়ে।
উল্লেখযোগ্য যে ৰাজ্য চৰকাৰে আগবঢ়োৱা অসম ৰত্ন,অসম বিভূষণ,অসম ভূষণ বঁটাৰ নামসমূহ সলনি কৰাৰ সিদ্ধান্ত গ্ৰহণ কৰি অসম বৈভৱ,অসম সৌৰভ,অসম গৌৰৱ নামেৰে এই বঁটা জনা যাব বুলি উল্লেখ কৰে।
একেদৰে এইবাৰৰ পৰা শ্ৰীমন্ত শংকৰদেৱ বঁটাৰ মাননি বৃদ্ধি কৰাৰো সিদ্ধান্ত গ্ৰহণ কৰিছে ৰাজ্য চৰকাৰে।
কৃষি খণ্ডক উন্নত কৰিবলৈ বিভিন্ন পদক্ষেপ লোৱাৰ কথাও জানিবলৈ দিয়ে ৰাজ্যৰ কেবিনেটে।সেই অনুসৰি প্ৰতি জিলাত এজন প্ৰগেম অফিচাৰ,এজন একাউন্ট এক্সপাৰ্ট আৰু এজন মিডিয়া এক্সপাৰ্ট থাকিব বুলি উল্লেখ কৰে মন্ত্ৰীজনে।
শিক্ষা ক্ষেত্ৰত বিশেষ গুৰুত্ব প্ৰদান কৰি অসমৰ প্ৰতিটো সমষ্টিত আদৰ্শ বিদ্যালয় খোলাৰ কথা কোৱাৰ লগতে এই আদৰ্শ বিদ্যালয়ৰ সংখ্যা ২৫ ৰ পৰা ৭৪ খনলৈ বৃদ্ধি কৰা হ’ব বুলি ঘোষণা কৰে।
ইফালে প্ৰতিৰক্ষাৰ ক্ষেত্ৰত মনোনিবেশ কৰি ৰাজ্যত কৰ্তব্যৰত সেনা- চিআৰপিএফৰ লোক মৃত্যু হলে পৰিয়াললৈ ৫০ লাখকৈ সাহাৰ্য আগবঢ়োৱা কথা উল্লেখ কৰে।
শ্ৰমিক সকলৰ দাবীৰ প্ৰতি সঁহাৰি জনাই এইবাৰ পূজাত এটিচি বাগিচাৰ শ্ৰমিকক ২০ শতাংশ ব’নাছ দিয়াৰ কথা ঘোষণা কৰিছে কেবিনেটে।ইয়াৰোপৰি পঞ্চায়ত প্ৰতিনিধিৰ পাৰিতোষিকৰ বাবে ৬৬.৩৪ কোটি টকা মুকলি কৰি দিয়া বুলিও জানিবলৈ দিয়ে মন্ত্ৰী পীয়ুষ হাজৰিকাই।
আঁচনি ৰূপায়ণৰ ক্ষেত্ৰত ৰাজ্য চৰকাৰে ’মিছন বসুন্ধৰা‘ নামৰ এক নতুন আঁচনি গ্ৰহণৰ সিদ্ধান্ত লৈছে।এই আঁচনিৰ যোগেদি অসমৰ সকলো মাটি এটা পৰ্টেলত অন্তৰ্ভূক্ত কৰা হ’ব বুলি ঘোষণা কৰে ৰাজ্য চৰকাৰে।
