বৰভেটি প্ৰকাশনৰ গ্ৰন্থ উন্মোচনী অনুষ্ঠান

যোৱা ২৪ নৱেম্বৰ তাৰিখে গুৱাহাটীৰ দিছপুৰস্থিত অগ্ৰদূত ভৱনত বৰভেটি প্ৰকাশনৰ এখনি গ্ৰন্থ উন্মোচনী সভা অনুষ্ঠিত হৈ যায়।শিপা ভৰদ্বাজৰ বৰগীতেৰে আৰম্ভ হোৱা সভাখনত সভাপতিত্ব কৰে ‘জাতীয় সাংস্কৃতিক বৰভেটি’ অসম,কামৰূপ মহানগৰ জিলা সমিতিৰ সভাপতি তথা সাহিত্যিক গীতিকা দেৱীয়ে।মৰমী ওজা ৰয়ে অসমীয়ালৈ অনুবাদ কৰা জুলে ভাৰ্ণৰ ‘উত্তৰ
মেৰু নিলাম’গ্ৰন্থখনি উন্মোচন কৰে প্ৰথিতযশা সাহিত্যিক,অসম সাহিত্য সভাৰ
প্ৰাক্তন সভাপতি কনকসেন ডেকা দেৱে।ভাষন প্ৰসংগত তেওঁ কয় যে অসমীয়া ভাষাৰ সাহিত্য কৰ্ম ভাৰতৰ বিভিন্ন ভাষাৰ লগতে অসমৰো বিভিন্ন জনগোষ্ঠীৰ ভাষালৈকো অনুবাদ হ’ব লাগে। তেওঁ নৱপ্ৰজন্মৰ অধ্যয়নৰ প্ৰতি হোৱা অনিহাৰ বাবে খেদ্
প্ৰকাশ কৰি কয় যে ছাত্ৰ ছাত্ৰী সকলক অধ্যয়নৰ প্ৰতি আগ্ৰহী কৰিবলৈ পিতৃ মাতৃ তথা অভিভাৱক সকলে যত্ন কৰা উচিত।অসমীয়া ভাষাৰ শুদ্ধ প্ৰয়োগৰ লগতে সুসাহিত্য সৃষ্টিত মনোনিবেশ কৰিলেহে ধ্ৰুপদী ভাষাৰ মৰ্যাদা প্ৰাপ্ত অসমীয়া ভাষাক উচ্চ পৰ্যায়লৈ লৈ যাব পৰা যাব বুলি
তেওঁ দোহাৰে।মৰমী ওজা ৰয়ৰ আন এখন শিশু গ্ৰন্থ ‘মঞ্জৰী’ উন্মোচন কৰি ৰস ৰচনা, কবিতা, শিশু সাহিত্যৰে অসমীয়া সাহিত্যলৈ অৱদান আগবঢ়োৱা সাহিত্যিক যোগানন্দ মহন্তই কয় যে ছন্দোবদ্ধ কবিতাই শিশুৰ মানসিকতাত সোনকালেই প্ৰভাৱ পেলায়। বৰভেটি প্ৰকাশনৰ সচিব,ঔপন্যাসিক আৰু
প্ৰবন্ধকাৰ প্ৰবোধ চন্দ্ৰ মিশ্ৰই ফৰাচী ঔপন্যাসিক জুলে ভাৰ্ণৰ ‘The purchase of the North Pole’ ৰ মৰমী ওজা ৰয়ে কৰা
অসমীয়া ৰূপান্তৰ ‘উত্তৰ মেৰু নিলাম” গ্ৰন্থ খনি অসমীয়া সাহিত্যলৈ এক ডাঙৰ অৱদান বুলি দোহাৰে।ভাষন প্ৰসংগত তেওঁ অনুবাদকৰ অসমীয়ালৈ অনুবাদৰ ক্ষেত্ৰত সাৱলীল শব্দ শৈলীৰে গ্ৰন্থখন মনোগ্ৰাহী কৰি তোলা বুলি দোহাৰে।বৰ্তমান সময়ত প্ৰকৃতিৰ সাম্যাৱস্থা ৰক্ষাৰ ক্ষেত্ৰত ‘উত্তৰ মেৰু নিলাম’ গ্ৰন্থখনৰ প্ৰাসংগিকতা অধিক বুলি তেওঁ উদাহৰণৰ জৰিয়তে ডাঙি ধৰে।ভাষণ প্ৰসঙ্গত সভাপতি গীতিকা দেৱীয়ে ভাষা আৰু সংস্কৃতিৰ মানুহৰ মাজত সাহিত্য আৰু সংস্কৃতিৰ বিনিময়ৰ অৰ্থে অনুবাদ সাহিত্যৰ প্ৰয়োজনীয়তাৰ কথা দোহাৰে। অনুবাদ সাহিত্যত এটা সংস্কৃতিৰ সৈতে আন এটা সংস্কৃতিৰ সংযোগ সাধিত হয় বুলি তেওঁ উল্লেখ কৰে।জাতীয় সাংস্কৃতিক বৰভেটিৰ সদস্যা ড০ অজন্তা ওজাই আঁত ধৰা
অনুষ্ঠানটোত নিশাদ চয়ন ওজাই উন্মোচিত শিশু উপযোগী কাব্য পুথি ‘মঞ্জৰী’ত সন্নিৱিষ্ট এটি কবিতা আবৃত্তি কৰে।লেখিকা মৰমী ওজা ৰয়ে শিশু উপযোগী কাব্য সংকলন ‘মঞ্জৰী’ আৰু জুলে ভাৰ্ণৰ “The purchase Of the North pole”নামৰ উপন্যাসখনৰ’উত্তৰ মেৰু নিলাম ‘ বুলি নামাকৰণ কৰি সাহিত্য প্ৰেমীৰ হাতত তুলি দিব পৰাটো তেওঁৰ সৌভাগ্য বুলি মন্তব্য কৰে আৰু” মঞ্জৰী”ত চিত্ৰ অংকন কৰা শিশু চিত্ৰ শিল্পী উজ্জীৱন তালুকদাৰৰ শলাগ লয়।সভাত জাতীয় সাংস্কৃতিক বৰভেটি, অসম কামৰূপ মহানগৰ জিলাৰ মুখ্য সাংগাঠনিক সম্পাদক কমলেন্দ্ৰ শৰ্মাৰ লগতে ৰূপাঞ্জলী নাথেও ভাষন প্ৰদান কৰে।