পৰম্পৰা নে নিৰ্যাতনঃ মধ্যপ্ৰদেশত বৰুণ দেৱতাৰ পূজাৰ নামত উলংগ শিশুৰ সমদল

মধ্যপ্ৰদেশৰ এখন গাঁৱত ছয়গৰাকী নাবালক ছোৱালীক পৰম্পৰাৰ নামত নিৰ্যাতন চলোৱাৰ ঘটনাই সম্প্ৰতি সকলোকে হতবাক কৰি তুলিছে। 

তথ্য অনুসৰি গাঁওখনৰ নিৰ্দিষ্ট নাবালক ছোৱালীকেইজনীক বিবস্ত্ৰ কৰি স্থানীয় নিয়ম আৰু প্ৰচলিত সামাজিক ৰীতিৰ অংশ হিচাপে বৰুণ দেৱতাক সন্তুষ্ট কৰিবলৈ ঘৰে ঘৰে যাবলৈ কোৱা হৈছিল।

বিশ্বাস অনুসৰি, যুৱতীসকলক কান্ধত কাঠৰ টুকুৰা এটা বান্ধি উলংগ হৈ খোজ কাঢ়িবলৈ বাধ্য কৰা হয়, য’ত এটা ভেকুলী বন্ধা থাকে। স্থানীয় লোকসকলে ইয়াৰ ফলত পৰ্যাপ্ত বৰষুণ হয় বুলি বিশ্বাস কৰে।

ভাৰতবৰ্ষ ৰীতি-নীতি, পূজা-পাতলৰ দেশ। দেশৰ সামাজিক অনুষ্ঠানসমূহতো ধৰ্মীয় বিশ্বাস সংলগ্ন হৈ থাকে। ভাৰতৰ দৰে দেশ এখনত নিৰ্জীৱ শিল টুকুৰাও জীৱন্ত একোজন মানুহৰ দৰেই পৱিত্ৰ, পূজনীয়।

প্ৰকৃতিক সন্মান কৰি পূজা কৰাৰ প্ৰথা প্ৰাচীনকালৰ পৰাই আমাৰ সমাজত প্ৰচলিত। ইয়াৰে কিছু কিছু কথাত প্ৰকৃতি সংৰক্ষণৰ গভীৰ তত্ত্ব নিহিত হৈ আছে। 

সংৰক্ষণৰ মানসিকতা, ৰীতি-নীতি আৰু গোড়ামিৰ মিশ্ৰণ অন্ধবিশ্বাস। অন্ধবিশ্বাসৰ পৰিণতিত সংঘটিত বিভিন্ন ঘটনাই মাজে-সময়ে সচেতন সমাজৰ মন-মগজু জোকাৰণি তুলি যায়।

ছোৱালীকেইজনীৰ সৈতে থকা মহিলাসকলেও বৰুণ দেৱতাৰ প্ৰশংসাসূচক ভজন গায়। ছোৱালীবোৰে স্থানীয় বিশ্বাস অনুসৰি ঘৰে ঘৰে গৈ আটা, মাহজাতীয় শস্য আৰু প্ৰধান খাদ্য শস্য বিচাৰে।

সংগ্ৰহ কৰা সামগ্ৰীবোৰ গাঁৱৰ মন্দিৰৰ সন্মুখত স্থাপন কৰা এটা ভাণ্ডাৰা বা সামূহিক পাকঘৰত একেলগে ৰখা হয়। ৰীতি অনুযায়ী সকলো গাওঁবাসী তাত উপস্থিত থকাটো বাধ্যতামূলক।

গাওঁবাসীসকলে বিশ্বাস কৰে যে এই ৰীতি-নীতিয়ে গাওঁখনলৈ পৰ্যাপ্ত বৰষুণ আনে আৰু খৰাং বন্ধ কৰে।

বুন্দেলখণ্ড অঞ্চলৰ দামোহ জিলাৰ আৰক্ষীৰ মুখ্য কাৰ্যালয়ৰ পৰা প্ৰায় ৫০ কিলোমিটাৰ দূৰত জাবেৰা আৰক্ষী থানাৰ অন্তৰ্গত বানিয়া গাঁৱত দেওবাৰে এই ঘটনা সংঘটিত হৈছিল।

সমগ্ৰ বিষয়টো বিবেচনা কৰি ৰাষ্ট্ৰীয় শিশু অধিকাৰ সুৰক্ষা আয়োগে ঘটনা সন্দৰ্ভত দামোহ জিলা প্ৰশাসনৰ পৰা প্ৰতিবেদন বিচাৰে।

দামোহৰ ৰাজহ বিষয়া এছ কৃষ্ণ চৈতন্যই উল্লেখ কৰে যে স্থানীয় প্ৰশাসনে এন চি পি চি আৰক এই সন্দৰ্ভত প্ৰতিবেদন দাখিল কৰিব।

আশ্বৰ্যজনক কথা এয়ে যে জিলা উপায়ুক্তৰ ভাষ্য অনুসৰি কোনো গাওঁবাসীয়ে এই ৰীতি-নীতি সন্দৰ্ভত অভিযোগ কৰা নাছিল।

আনহাতে তেখেতে সাংবাদিকৰ আগত উল্লেখ কৰে যে এই ক্ষেত্ৰত প্ৰশাসনে কেৱল গাওঁবাসীক এনে অন্ধবিশ্বাসৰ অসাৰ্থকতাৰ বিষয়ে সজাগ কৰিব পাৰে আৰু তেওঁলোকক বুজাব পাৰে যে এনে ধৰণৰ প্ৰথাই আকাংক্ষিত ফলাফল প্ৰদান নকৰে।

ইফালে ঘটনাটোৰ দুটা ভিডিঅ’ ক্লিপ পোহৰলৈ আহিছে। এটা ভিডিঅ’ ক্লিপত ৫ বছৰমান বয়সৰ নগ্ন ছোৱালীবোৰক কান্ধত কাঠৰ টুকুৰা এটা বান্ধি খোজ কাঢ়ি থকা দেখা গৈছে আৰু ভজন গাই থকা মহিলাৰ এটা দলে শোভাযাত্ৰাটো অনুসৰণ কৰিছে।

আন এটা ভিডিঅ’ত কিছুমান মহিলাৰ ভাষ্য শুনা গৈছে যে বৰষুণৰ অনুপস্থিতিত ধানৰ শস্য শুকাই যোৱাৰ বাবে এই ৰীতি-নীতি পালন কৰা হৈছিল। আমি বিশ্বাস কৰোঁ যে ইয়াৰ ফলত বৰষুণ হ’ব, তেওঁলোকে ঘটনাটো ৰেকৰ্ড কৰা ব্যক্তিজনক উদ্দেশ্যি মন্তব্য কৰিছিল।

দামোহৰ আৰক্ষী অধীক্ষক ডি আৰ টেনিভাৰৰ মত অনুসৰি অঞ্চলটোত কম বৰষুণ হোৱাৰ বাবে গাওঁবাসীসকলে প্ৰতি বছৰে শিশুসকলৰ সন্মতিৰ সৈতে এই প্ৰথা অনুসৰণ কৰে।

টেনিভাৰে লগতে উল্লেখ কৰে যে যদি এইটো এটা বলপূৰ্বক প্ৰথা বুলি প্ৰমাণিত হয় তেন্তে অপৰাধীসকলৰ বিৰুদ্ধে ব্যৱস্থা লোৱা হ’ব।