আজি বৰেণ্য অসমীয়া আনন্দৰাম ঢেকিয়াল ফুকনৰ ওপজা দিন । ১৮২৯ চনৰ আজিৰ দিনটোতে গুৱাহাটীত তেওঁৰ জন্ম হৈছিল (অৱশ্যে তেওঁৰ জন্মৰ দিনটোক লৈ মতভেদ আছে) । দুবছৰ বয়সতে তেওঁ পিতৃহাৰা হৈছিল । পাঁচ বছৰ বয়সত তেওঁ উমানন্দৰ সংস্কৃত টোলত ভৰ্তি হয় যদিও খুড়াক যজ্ঞৰামৰ উদ্যোগত ১৮৩৭ চনত তেওঁ গুৱাহাটীৰ প্ৰথমখন ইংৰাজী বিদ্যালয় গৌহাটী ইংলিছ স্কুলত নামভৰ্তি কৰে । ১৮৪১ চনত দুগৰাকী ইংৰাজ বিষয়াই তেওঁক ইংৰাজীৰ উচ্চ শিক্ষাৰ বাবে কলিকতালৈ পঠিয়ায় । কিন্তু হিন্দু কলেজত দুবছৰ পঢ়াৰ পিচত ঘৰুৱা সমস্যাৰ বাবে গুৱাহাটীলৈ উভতি আহিবলগীয়া হয় । গুৱাহাটীতে তেওঁ আইনৰ অধ্যয়ন কৰে আৰু ‘অৰুণোদই’ত নিয়মীয়াকৈ লিখিবলৈ লয় । অসমত বাংলাৰ সলনি অসমীয়া ভাষাক শিক্ষাৰ মাধ্যম কৰাটো বিচৰা ঢেকিয়াল ফুকনে ইংৰাজী পাঠ্যপুথিৰ আধাৰত ‘অসমীয়া ল’ৰাৰ মিত্ৰ’ লিখি উলিয়াইছিল । ১৮৫৩ চনত ব্ৰিটিছ গৱৰ্ণৰ মোফাট মিলছ অসমলৈ আহোঁতে অসমৰ বিদ্যালয়সমূহত অসমীয়া ভাষাৰ প্ৰচলনৰ যুক্তি দাঙি ধৰিছিল আৰু মিলছেও তেওঁৰ যুক্তিক মানি লৈছিল । ১৮৫৫ চনত A Native ছদ্মনামেৰে A few remarks on the Assamese language, and on the vernacular education in Assam নামৰ গ্ৰন্থ এখন লিখি উলিয়াইছিল । অসমত অসমীয়া ভাষাৰ পুনৰ প্ৰচলনৰ হকে অহোপুৰুষাৰ্থ কৰা এইগৰাকী বৰেণ্যলৈ আমাৰ প্ৰণাম ।
আজি চলচ্চিত্ৰ পৰিচালক শিৱপ্ৰসাদ ঠাকুৰৰ ওপজা দিন । ১৯৩৭ চনৰ আজিৰ দিনটোতে নাজিৰাত তেওঁৰ জন্ম হৈছিল । ১৯৮৩ চনত ‘ঘৰ-সংসাৰ’ চলচ্চিত্ৰৰ যোগেদি চলচ্চিত্ৰ পৰিচালনাৰ জগতখনত ভৰি দিয়া শিৱপ্ৰসাদ ঠাকুৰে মুঠ দহখন অসমীয়া চলচ্চিত্ৰ পৰিচালনা কৰিছিল । বোৱাৰী, সোণ-মইনা, মন-মন্দিৰ আদি জনপ্ৰিয় চলচ্চিত্ৰ তেওঁ পৰিচালনা কৰিছিল । ১৯৮৪ চনত সোণ-মইনা চলচ্চিত্ৰখনৰ বাবে তেওঁ চলচ্চিত্ৰৰ ৰাষ্ট্ৰীয় বঁটা লাভ কৰিছিল । পৰিচালকগৰাকীলৈ আমাৰ প্ৰণাম ।
আজি শিখ ধৰ্মৰ জনক তথা দহগৰাকী শিখ গুৰুৰ প্ৰথমগৰাকী গুৰু নানকৰ স্মৃতি দিৱস । শিখ ধৰ্ম প্ৰৱৰ্তন কৰি তেওঁ একেশ্বৰবাদৰ বাণী বিলাইছিল । গুৰু নানকৰ বাণীসমূহ শিখ ধৰ্মৰ পবিত্ৰ গ্ৰন্থ ‘গ্ৰন্থ চাহিব’ত সন্নিৱিষ্ট হৈ আছে । মুঠ ৯৭৪টা ঘোষা আছে এই গ্ৰন্থখনত । ১৫৩৯ চনৰ আজিৰ দিনটোতে তেতিয়াৰ মোগল সাম্ৰাজ্যৰ (বৰ্তমানৰ পাকিস্তান) কৰতাৰপুৰত তেওঁৰ পৰলোকপ্ৰাপ্তি ঘটে । গুৰুজনালৈ প্ৰণাম ।
