আজি মহামানৱ মহাত্মা গান্ধীৰ ওপজা দিন । ১৮৬৯ চনৰ আজিৰ দিনটোতে গুজৰাটৰ পোৰবন্দৰত তেওঁৰ জন্ম হৈছিল । কবিগুৰু ৰবীন্দ্ৰনাথ ঠাকুৰে তেওঁক প্ৰদান কৰা সন্মানসূচক ‘মহান আত্মা’ অভিধাৰ পৰাই তেওঁক মহাত্মা বোলা হয় । তেওঁৰ প্ৰকৃত নাম আছিল মোহনদাস কৰমচাঁদ গান্ধী । তেওঁৰ নেতৃত্বত চলা স্বাধীনতা সংগ্ৰামৰ ফলতেই ভাৰতে ব্ৰিটিছৰ কৱলৰ পৰা মুক্ত হৈছিল । সেইবাবে তেওঁক জাতিৰ পিতা বা বাপু বুলি সম্বোধন কৰা হয় । তেওঁ আছিল সত্য আৰু অহিংসাৰ পূজাৰী । তেওঁ লিখা গ্ৰন্থসমূহৰ ভিতৰত ‘মোৰ সত্য অন্বেষণৰ কাহিনী’ (The Story of My Experience with Truth) অন্যতম । ১৯৬০ৰ দশকত ভাৰত চৰকাৰে তেওঁৰ ৰচনাৱলী (The Collected Works of Mahatma Gandhi) প্ৰকাশ কৰে । তেওঁৰ এই জন্মদিনটো সমগ্ৰ বিশ্বতে আন্তঃৰাষ্ট্ৰীয় অহিংসা দিৱস হিচাপে পালন কৰা হয় । বাপুজীলৈ আমাৰ প্ৰণাম ।
আজি স্বাধীনতা সংগ্ৰামী তথা ভাৰতৰ দ্বিতীয়গৰাকী প্ৰধানমন্ত্ৰী লাল বাহাদুৰ শাস্ত্ৰীৰ ওপজা দিন । ১৯০৪ চনৰ আজিৰ দিনটোতে উত্তৰ প্ৰদেশৰ মুগলসৰাইত তেওঁৰ জন্ম হৈছিল । জৱাহৰলাল নেহৰুৰ পিছত ১৯৬৪ চনৰ ৯ জুনৰ পৰা ১৯৬৬ চনৰ ১১ জানুৱাৰীলৈ তেওঁ দেশৰ দ্বিতীয়গৰাকী প্ৰধানমন্ত্ৰী হিচাপে দায়িত্বত আছিল । ১৯৬৫ চনৰ ভাৰত-পাক যুদ্ধৰ সময়ত তেওঁৰ ‘জয় জোৱান, জয় কিষাণ’ শ্লোগানটি অতি জনপ্ৰিয় হৈছিল । ভাৰত-পাকিস্তানৰ মাজত যুদ্ধ বিৰতি চুক্তি সম্পাদিত হোৱাৰ পিছদিনাই টাচখণ্ডত ১৯৬৬ চনৰ ১১ জানুৱাৰীত তেওঁক ৰহস্যজনকভাৱে মৃত অৱস্থাত পোৱা হয় । নেতাগৰাকীলৈ আমাৰ প্ৰণাম ।
আজি ‘বনকোঁৱৰ’ আনন্দিৰাম দাসৰ ওপজা দিন । ১৯০৯ চনৰ আজিৰ দিনটোতে গুৱাহাটীৰ খাৰঘুলিত তেওঁৰ জন্ম হৈছিল । তেওঁ আছিল এগৰাকী প্ৰসিদ্ধ গীতিকাৰ । তেওঁ সহস্ৰাধিক গীত ৰচনা কৰি থৈ গৈছে । ১৯৩৭ আৰু ১৯৩৯ চনত তেওঁৰ দুখন গীতৰ পুথি ক্ৰমে বিৰহী আৰু সুৰ-নিজৰা প্ৰকাশ পায় । তেওঁৰ নন্দন আৰু ৰক্তাঞ্জলি নামৰ আন দুখন অপ্ৰকাশিত গীতৰ পুথিও আছে । তেওঁ অসমীয়া চলচ্চিত্ৰ লাচিত বৰফুকন, পাৰঘাট, বদন বৰফুকন, ভক্ত প্ৰহ্লাদ আদিৰ বাবেও গীত লিখিছিল । মোহন মালতী তেওঁৰ একমাত্ৰ নাটক । বনগীত গাই তেওঁ খ্যাতি অৰ্জন কৰিছিল বাবে তেওঁক বনকোঁৱৰ আখ্যা দিয়া হয় ।তেওঁ ভাৰতীয় গণনাট্য সংঘৰ অসম শাখাৰ উপ-সভাপতিও আছিল । শিল্পীগৰাকীলৈ আমাৰ প্ৰণাম ।
আজি অসমৰ মাধ্যম আন্দোলনৰ শ্বহীদ অনিল বৰাৰ ওপজা দিন । ১৯৫১ চনৰ আজিৰ দিনটোতে নগাঁৱত তেওঁৰ জন্ম হৈছিল । তেওঁ এগৰাকী মেধাৱী ছাত্ৰ আছিল । তেওঁ নগাঁও মহাবিদ্যালয়ৰ ছাত্ৰ একতা সভাৰ সম্পাদক আছিল । গুৱাহাটী বিশ্ববিদ্যালয়ে শিক্ষাৰ মাধ্যম হিচাপে অসমীয়া ভাষা প্ৰৱৰ্তনক লৈ হোৱা এক অবাঞ্ছিত বিবাদৰ বলি হৈ তেওঁ প্ৰাণ আহুতি দিবলগীয়া হয় । শ্বহীদগৰাকীলৈ আমাৰ প্ৰণাম ।
