আজি কৰ্মবীৰ নবীন চন্দ্ৰ বৰদলৈৰ ওপজা দিন । ১৮৭৫ চনৰ আজিৰ দিনটোতে উত্তৰ গুৱাহাটীত তেওঁৰ জন্ম হৈছিল । তেওঁ ১৮৯৬ চনত প্ৰেছিডেন্সি কলেজৰ পৰা বি এ আৰু ১৮৯৯ চনত ৰিপন কলেজৰ পৰা বি এল ডিগ্ৰী লাভ কৰে । তেওঁ এগৰাকী ভাল মুষ্ঠিযোদ্ধা আৰু ফুটবল খেলুৱৈও আছিল । তেওঁ ১৯০৮ চনত কলিকতা উচ্চ ন্যায়ালয়ত ওকালতি কৰিবলৈ লয় আৰু ১৯১৮ চনত গুৱাহাটীলৈ উভতি আহে । ১৯১৫ চনত তেওঁ আছাম এছোচিয়েছনৰ ডিব্ৰুগড় অধিৱেশনৰ সভাপতি হৈছিল । ‘সংস্কাৰ আঁচনি’ৰ অধীনত অসমক গভৰ্ণৰশাসিত ৰাজ্যৰ মৰ্যাদা দিবলৈ ইংলেণ্ডৰ হাউছ অব লৰ্ডছৰ লৰ্ড ছেলবোৰ্ণ কমিটীৰ সন্মুখত যুক্তি প্ৰদৰ্শন কৰি তেওঁ সফল হয় । তেওঁ দেশৰ স্বাধীনতা সংগ্ৰামৰ বিভিন্ন কাৰ্যসূচীত যোগদান কৰি তিনিবাৰকৈ গ্ৰেপ্তাৰ বৰণ কৰিবলগীয়া হয় আৰু কাৰাবাসো খাটে । তেওঁ কেইবাবছৰ ধৰি গুৱাহাটী লোকেল বোৰ্ডৰ অধ্যক্ষও আছিল । তেওঁ জোনাকী, বিজুলী আদি আলোচনীত নিয়মীয়াকৈ প্ৰবন্ধ লিখিছিল । নেতাগৰাকীলৈ আমাৰ প্ৰণাম ।
আজি বিশিষ্ট সাহিত্যিক অৰুণ শৰ্মাৰ ওপজা দিন । ১৯৩১ চনৰ আজিৰ দিনটোতে ডিব্ৰুগড়ৰ সেন্দূৰী আলিত তেওঁৰ জন্ম হৈছিল । তেওঁ আছিল একাধাৰে এগৰাকী নাট্যকাৰ, ঔপন্যাসিক, কবি, প্ৰবন্ধকাৰ তথা অনাতাঁৰ শিল্পী । ১৯৫৪ চনত কটন কলেজৰ পৰা স্নাতক ডিগ্ৰী আহৰণ কৰি দ্য আছাম ট্ৰিবিউন কাকতত সহকাৰী সম্পাদক পদত কাৰ্যনিৰ্বাহ কৰে । তাৰ পিছত কিছুদিন হেলেমত শিক্ষকতা কৰি ১৯৬০ চনত অল ইণ্ডিয়া ৰেডিঅ’ত যোগদান কৰে । তেওঁ আকাশবাণীৰ নাট বিভাগৰ সৈতে জড়িত থকাৰ সূত্ৰে ১৯৭০-৮০ৰ দশকত ৪৭খন নাটক আৰু অনেক অনাতাঁৰ ডকুমেণ্টৰী ৰচনা কৰে । ১৯৯০ চনত তেওঁ শ্বিলঙৰ অল ইণ্ডিয়া ৰেডিঅ নৰ্থ-ইষ্ট ছাৰ্ভিচৰ সঞ্চালক হিচাপে অৱসৰ গ্ৰহণ কৰে । তেওঁ সাপ্তাহিক পূৰ্বাচলৰ সম্পাদকো আছিল । ২০০২ চনত তেওঁ অসম নাট্য সন্মিলনৰ দুবছৰীয়া কাৰ্যকালৰ সভাপতি আছিল । নিবাৰণ ভট্টাচাৰ্য, উৰুখা পঁজা, বাঘজাল, ককুৰনেচীয়া মানুহ আদি তেওঁৰ বিখ্যাত নাটক । সন্ধ্যাৰাগ চলচ্চিত্ৰত তেওঁ অভিনয়ো কৰিছিল । উভলা শিপা, যযাতি আৰু ৰঞ্জনা, পৰশুৰাম আদি তেওঁৰ জনপ্ৰিয় উপন্যাস । ১৯৯৮ চনত তেওঁৰ আশীৰ্বাদৰ ৰং নামৰ উপন্যাসখনৰ বাবে তেওঁ সাহিত্য অকাডেমি বঁটা লাভ কৰে । এইগৰাকী সাহিত্যিকলৈ আমাৰ প্ৰণাম ।
