আজি বিশিষ্ট সাহিত্যিক যতীন্দ্ৰনাথ গোস্বামীৰ স্মৃতি দিৱস । তেওঁ আছিল এগৰাকী সাহিত্য সমালোচক তথা জীৱনীকাৰ । সামৰিক অভিযান্ত্ৰিক সেৱাত কেৰাণীৰ চাকৰিৰে কৰ্মজীৱনৰ পাতনি মেলি তেওঁ ১৯৪৫ চনত শিক্ষকতাৰ বৃত্তিক আকোৱালি লয় । শ্বিলং লাবান বয়জ স্কুল, তুৰা চৰকাৰী হাইস্কুল, ডিব্ৰুগড় চৰকাৰী হাইস্কুল আৰু যোৰহাট নৰ্মাল স্কুলত চাকৰি কৰাৰ পিছত কানৈ কলেজত যোগদান কৰে । অৱশেষত জগন্নাথ বৰুৱা মহাবিদ্যালয়ত অধ্যাপক হিচাপে যোগদান কৰি তাৰ পৰাই ১৯৮০ চনত অৱসৰ গ্ৰহণ কৰে । তেওঁ অসম কলেজ শিক্ষক সন্থাৰ সভাপতিও আছিল । দস্যু সম্ৰাট, মৌচাক, অসমীয়া সাহিত্যৰ চমু বুৰঞ্জী, সাহিত্য চিন্তা আদি তেওঁৰ প্ৰকাশিত পুথি । নামদেৱ তেওঁৰ অনূদিত গ্ৰন্থ । ১৯৮০ চনত ৰহাত অনুষ্ঠিত অসম সাহিত্য সভাৰ অধিৱেশনত তেওঁ সভাপতিত্ব কৰিছিল । ১৯৯৭ চনত অসম সাহিত্য সভাই তেওঁক সাহিত্যাচাৰ্য উপাধি প্ৰদান কৰে । ২০০৫ চনৰ আজিৰ দিনটোতে তেওঁৰ দেহাৱসান ঘটে । সাহিত্যিকগৰাকীলৈ আমাৰ প্ৰণাম ।
আজি লেখক, সমালোচক মুনীন বৰকটকীৰ স্মৃতি দিৱস । তেওঁ শিক্ষকতাৰে কৰ্মজীৱনৰ পাতনি মেলি পিছত কেন্দ্ৰীয় চৰকাৰৰ তথ্য আৰু সম্প্ৰচাৰ বিভাগৰ উচ্চ পদস্থ বিষয়া হৈছিল । তেওঁ প্ৰেছ ইনফৰমেচন ব্যুৰো আৰু আকাশবাণীৰ বাৰ্তাসম্পাদক হিচাপে কাৰ্যনিৰ্বাহ কৰিছিল । জীৱনকালত তেওঁৰ এখনহে গ্ৰন্থ প্ৰকাশ হৈছিল যদিও পিছত তেওঁৰ পত্নী ৰেণুকা দেৱী বৰকটকীয়ে মুনীন বৰকটকী স্মাৰক ন্যাস গঠন কৰি তেওঁৰ অন্যান্য গ্ৰন্থসমূহ প্ৰকাশ কৰে । বিস্মৃত ব্যতিক্ৰম, বন্দিত বৰেণ্য, প্ৰসংগ সমালোচনা আদি তেওঁৰ প্ৰকাশিত গ্ৰন্থ । ১৯৩৯ চনত তেওঁ বাঁহী আলোচনীৰ সহযোগী সম্পাদক হৈছিল । তেওঁ দৈনিক অসমীয়া আৰু দ্য আছাম ট্ৰিবিউন কাকততো সহকাৰী সম্পাদক হিচাপে কাৰ্যনিৰ্বাহ কৰিছিল । চৰকাৰী চাকৰিৰ পৰা অৱসৰ লোৱাৰ পিছত তেওঁ গুৱাহাটী বিশ্ববিদ্যালয়ৰ সাংবাদিকতা বিভাগতো কেইবছৰমান শিক্ষাদান কৰিছিল । ১৯৯৩ চনৰ আজিৰ দিনটোতে তেওঁৰ দেহাৱসান ঘটে । সাহিত্য সমালোচকগৰাকীলৈ আমাৰ প্ৰণাম ।
আজি বিশিষ্ট ভাষা বিজ্ঞানী ডঃ ভগৱান চন্দ্ৰ মৰলৰ ওপজা দিন । ১৯৩৪ চনৰ আজিৰ দিনটোতে শুৱালকুছিত তেওঁৰ জন্ম হৈছিল । তেওঁ অসমীয়া ভাষাৰ শব্দাৰ্থ তত্ত্ব সম্পৰ্কে গৱেষণা কৰি ডক্টৰেট ডিগ্ৰী লাভ কৰিছিল । তেওঁ প্ৰথমতে শুৱালকুছি হাইস্কুল, শুৱালকুছি বালিকা হাইস্কুল আৰু গুৱাহাটীৰ ডনবস্ক’ হাইস্কুলত শিক্ষকতা কৰাৰ পিছত ১৯৫৯ চনত গোলাঘাটৰ দেৱৰাজ ৰয় মহাবিদ্যালয়ৰ অসমীয়া বিভাগৰ প্ৰবক্তা হিচাপে যোগদান কৰে । ১৯৬২ চনত তেওঁ গুৱাহাটীৰ প্ৰাগজ্যোতিষ মহাবিদ্যালয়ৰ অসমীয়া বিভাগত যোগদান কৰি ১৯৯৪ চনত মহাবিদ্যালয়খনৰ অধ্যক্ষ হিচাপে অৱসৰ গ্ৰহণ কৰে । তেওঁ ১৯৭৯ চনত অসম ভাষা বিজ্ঞান সমিতি গঠনত আগভাগ লৈছিল আৰু তাৰ সম্পাদকৰ দায়িত্ব পালন কৰিছিল । অসমীয়া ব্যাকৰণ জ্যোতি, আধুনিক ভাষা বিজ্ঞান, অসমীয়া ভাষাৰ স্বতন্ত্ৰতা আদি তেওঁৰ ভাষা বিষয়ক গ্ৰন্থ । প্ৰেমাঞ্জলি আৰু সুৰ নিজৰা তেওঁৰ কবিতা পুথি । তেওঁ কামৰূপ জিলা সাহিত্য সভাৰ সৰ্বোচ্চ সন্মান ‘কামৰূপ ৰত্ন’ লাভ কৰে । ভাষা বিজ্ঞানীগৰাকীলৈ আমাৰ প্ৰণাম ।
আজি সংগীত পৰিচালক, চিত্ৰশিল্পী, চলচ্চিত্ৰ নিৰ্মাতা শ্বেৰ চৌধুৰীৰ স্মৃতি দিৱস । তেওঁ প্ৰথম ৰাগিনী চলচ্চিত্ৰৰ কলা আৰু সংগীত পৰিচালনা কৰিছিল আৰু চলচ্চিত্ৰখনৰ মুখ্য সহকাৰী পৰিচালকো আছিল । ১৯৮৯ চনত তেওঁ কাৰ্বি ভাষাৰ চলচ্চিত্ৰ ৱশ্ব’বিপোৰ সংগীত পৰিচালনাৰ বাবে শ্ৰেষ্ঠ সংগীত পৰিচালকৰ ৰাষ্ট্ৰীয় বঁটা লাভ কৰে । তেওঁ হলধৰ, মীমাংসা, অদাহ্য, ৰাগ-বিৰাগ, অহিৰ ভৈৰৱ আদি চলচ্চিত্ৰৰ সংগীত পৰিচালনা কৰিছিল । তদুপৰি তেওঁ কেইবাখনো টেলিফিল্ম আৰু দূৰদৰ্শন ধাৰাবাহিকৰো সংগীত পৰিচালনা কৰিছিল । তেওঁ চিত্ৰনাট্য ৰচনা কৰা আৰু সংগীত পৰিচালনা কৰা ছাউণ্ড অব ডায়িং কালাৰ্ছ নামৰ তথ্যচিত্ৰখনে ৰাষ্ট্ৰীয় বঁটা লাভ কৰিছিল । ২০১৩ চনৰ আজিৰ দিনটোতে তেওঁৰ দেহাৱসান ঘটে । সংগীত পৰিচালকগৰাকীলৈ আমাৰ প্ৰণাম ।
