আজি বিশিষ্ট গান্ধীবাদী সমাজকৰ্মী অমলপ্ৰভা দাসৰ ওপজা দিন । ১৯১১ চনৰ আজিৰ দিনটোতে ডিব্ৰুগড়ত তেওঁৰ জন্ম হৈছিল । তেওঁ আছিল প্ৰায়োগিক ৰসায়ন বিজ্ঞান বিষয়ত স্নাতকোত্তৰ ডিগ্ৰী লাভ কৰা প্ৰথমগৰাকী অসমীয়া মহিলা । তেওঁ ব্ৰিটিছ চৰকাৰৰ অধীনৰ কটন কলেজত শিক্ষকতা কৰাৰ প্ৰস্তাৱ পাইছিল যদিও ব্ৰিটিছৰ অধীনত চাকৰি নকৰাৰ পণেৰে সেই প্ৰস্তাৱ প্ৰত্যাখ্যান কৰিছিল । ১৯৩৪ চনত মহাত্মা গান্ধী অসমলৈ আহোঁতে গুৱাহাটীৰ তেওঁলোকৰ ঘৰত আশ্ৰয় লৈছিল । গান্ধীজীৰ এই সান্নিধ্যই তেওঁৰ জীৱনত গভীৰ প্ৰভাৱ পেলাইছিল । তেওঁ গুৱাহাটীৰ শৰণীয়া পাহাৰত মাতৃ আশ্ৰম প্ৰতিষ্ঠা কৰিছিল, যি পিছলৈ কস্তুৰবা আশ্ৰম নামেৰে জনাজাত হয় । তেওঁ গ্ৰাম সেৱিকা বিদ্যালয়, কস্তুৰবা কল্যাণ কেন্দ্ৰ, গৌহাটী কটাই মণ্ডল, গুৱাহাটী যুৱক সেৱা দল আৰু গো-সেৱা সমিতি আদি কেইবাটাও প্ৰতিষ্ঠানৰ জন্ম দিছিল । ১৯৫৪ চনত ভাৰত চৰকাৰে তেওঁক পদ্মশ্ৰী সন্মান প্ৰদান কৰে । তেওঁ আছিল এই সন্মান লাভ কৰা প্ৰথমগৰাকী অসমীয়া মহিলা । সমাজকৰ্মীগৰাকীলৈ আমাৰ প্ৰণাম ।
আজি বিশিষ্ট ভাষাবিদ ডঃ প্ৰমোদ চন্দ্ৰ ভট্টাচাৰ্যৰ স্মৃতি দিৱস । তেওঁ অসমীয়া আৰু বড়ো ভাষা-সাহিত্য-সংস্কৃতিলৈ বিশেষ বৰঙণি আগবঢ়াই থৈ গৈছে । তেওঁ আছিল বড়ো ভাষাৰ প্ৰথমজন গৱেষক । তেওঁ ইণ্ডো-তিব্বতীয় ভাষাৰো গৱেষক আছিল । তেওঁ গুৱাহাটীৰ বি বৰুৱা কলেজৰ অধ্যক্ষ আছিল । গুৱাহাটী বিশ্ববিদ্যালয়তো অংশকালীন অধ্যাপক হিচাপে যোগদান কৰিছিল । তেওঁ দৈনিক অসমীয়া আৰু নতুন অসমীয়া কাকত দুখনৰো সম্পাদক আছিল । তেওঁ কেইবাখনো মূল্যবান গ্ৰন্থ লিখি থৈ গৈছে । অসম সাহিত্য সভাই তেওঁক সাহিত্যাচাৰ্য উপাধি প্ৰদান কৰে । তেওঁ বডোফা উপেন ব্ৰহ্ম বঁটাও লাভ কৰে । ২০১৮ চনৰ আজিৰ দিনটোতে তেওঁৰ দেহাৱসান ঘটে । গৱেষকগৰাকীলৈ আমাৰ প্ৰণাম ।
আজি বিশিষ্ট মুখা শিল্পী ৰেৱকান্ত মহন্তৰ স্মৃতি দিৱস । অসমৰ মুখা শিল্পলৈ আগবঢ়োৱা অৱদানৰ বাবে ২০১৪ চনত তেওঁ সংগীত নাটক একাডেমী বঁটা লাভ কৰে । ২০১৯ চনৰ আজিৰ দিনটোতে তেওঁৰ দেহাৱসান ঘটে । শিল্পীগৰাকীলৈ আমাৰ প্ৰণাম ।
আজি বিশিষ্ট অভিনেতা মহানন্দ শৰ্মাৰ ওপজা দিন । ১৯৩৫ চনৰ আজিৰ দিনটোতে নলবাৰী জিলাৰ পানীগাঁৱত তেওঁৰ জন্ম হয় । তেওঁ আছিল এগৰাকী অভিনেতা, আবৃত্তিকাৰ, নাট্যকাৰ তথা নাট পৰিচালক । মুগকুছি নাট্য সমিতিত অভিনয় জীৱনৰ পাতনি মেলি তেওঁ অসমৰ প্ৰায়কেইখন আগশাৰীৰ ভ্ৰাম্যমাণ থিয়েটাৰতে অভিনয় কৰিছিল । তেওঁ অভিনয় কৰা কাবুলীৱালাৰ চৰিত্ৰটো নাট্যপ্ৰেমীৰ আজিও মনত আছে ।তেওঁ অপৰূপা থিয়েটাৰ নামৰ এখন থিয়েটাৰো প্ৰযোজনা কৰিছিল । শিল্পীগৰাকীলৈ আমাৰ প্ৰণাম ।
