আজি ৰাজনীতিক, সমাজকৰ্মী ৰেণুকা দেৱী বৰকটকীৰ ওপজা দিন । ১৯৩২ চনৰ আজিৰ দিনটোতে গুৱাহাটীৰ উজানবজাৰত তেওঁৰ জন্ম হৈছিল । সৰুৰে পৰাই তেওঁ ৰাজনীতিৰ প্ৰতি আকৃষ্ট আছিল । কটনত পঢ়ি থাকোঁতে তেওঁ যুৱ কংগ্ৰেছত যোগদান কৰে । ১৯৬২ চনত তেওঁ বৰপেটা লোকসভা সমষ্টিৰ পৰা কংগ্ৰেছৰ প্ৰাৰ্থী হিচাপে সাংসদ নিৰ্বাচিত হয় । ১৯৭২ চনত তেওঁ হাজো বিধানসভা সমষ্টিৰ পৰা নিৰ্দলীয় প্ৰাৰ্থী হিচাপে নিৰ্বাচনত জয়ী হয় । ১৯৭৭ চনত জনতা পাৰ্টীৰ প্ৰাৰ্থী হিচাপে গুৱাহাটী লোকসভা সমষ্টিৰ পৰা সাংসদ হয় । তেওঁ মোৰাৰজী দেশাই চৰকাৰত শিক্ষা, সমাজ কল্যাণ আৰু সাংস্কৃতিক বিভাগৰ মন্ত্ৰিত্ব লাভ কৰে । কেন্দ্ৰীয় মন্ত্ৰীসভাত স্থান লাভ কৰা তেওঁ আছিল প্ৰথমগৰাকী অসমীয়া মহিলা । তেওঁ ইণ্ডিয়ান ৰেডক্ৰছ ছচাইটীৰ অসম শাখাৰ সম্পাদক আৰু ইণ্ডিয়ান নেচনেল ট্ৰেড ইউনিয়ন কংগ্ৰেছৰ সভানেত্ৰী আছিল । তেওঁ সাহিত্যিক মুনীন বৰকটকীৰ পত্নী আছিল । নেত্ৰীগৰাকীলৈ আমাৰ প্ৰণাম ।
আজি অভিনেতা, চলচ্চিত্ৰ পৰিচালক তথা চিত্ৰনাট্যকাৰ প্ৰমথেশ বৰুৱাৰ স্মৃতি দিৱস । অসমৰ গৌৰীপুৰত জন্ম লাভ কৰা প্ৰমথেশ বৰুৱাই বাংলা আৰু হিন্দী চলচ্চিত্ৰ জগতত বিশেষ স্থান দখল কৰিছিল । ১৯২৪ চনত কলিকতাৰ প্ৰেচিডেন্সী কলেজৰ পৰা পদাৰ্থ বিজ্ঞানত স্নাতক ডিগ্ৰী আহৰণ কৰি ইউৰোপ ভ্ৰমণলৈ গৈ তাত চলচ্চিত্ৰৰ জ্ঞান আৰু অভিজ্ঞতা অৰ্জন কৰে । তেওঁৰ অমৰ কৃতি দেৱদাস । চলচ্চিত্ৰখন প্ৰথমতে বাংলা ভাষাত নিৰ্মাণ কৰা হৈছিল আৰু তেওঁ নিজে নায়কৰ অভিনয় কৰিছিল । পিছত ১৯৩৬ চনত তেওঁ কুন্দনলাল চাইগালক নায়ক হিচাপে লৈ হিন্দী ভাষাতো চলচ্চিত্ৰখনৰ মুক্তি দিয়ে । তেতিয়ালৈ চলি থকা পৌৰাণিক কাহিনীৰ আধাৰত চলচ্চিত্ৰ নিৰ্মাণৰ পৰম্পৰা ভংগ কৰি বাস্তৱিক কাহিনীৰে নিৰ্মাণ কৰা দেৱদাস আছিল বক্স অফিচ হিট হোৱা প্ৰথমখন হিন্দী চলচ্চিত্ৰ । তাৰ পিছত তেওঁ মঞ্জিল, মুক্তি, অধিকাৰ আদি চলচ্চিত্ৰ পৰিচালনা কৰে । ১৯৫২ চনৰ আজিৰ দিনটোতে মাথোঁ ৪৮ বছৰ বয়সতে তেওঁৰ দেহাৱসান ঘটে । শিল্পীগৰাকীলৈ আমাৰ প্ৰণাম ।
আজি বিশিষ্ট সাহিত্যিক মামণি ৰয়ছম গোস্বামীৰ স্মৃতি দিৱস । তেওঁৰ প্ৰকৃত নাম আছিল ডঃ ইন্দিৰা গোস্বামী । তেওঁ ইংৰাজী আৰু অসমীয়া উভয় ভাষাতেই সাহিত্য ৰচনা কৰিছিল । মাধৱ কন্দলিৰ ৰামায়ণৰ বিষয়ে গৱেষণা কৰি তেওঁ ডক্টৰেট ডিগ্ৰী লাভ কৰে । তেওঁ দিল্লী বিশ্ববিদ্যালয়ত আধুনিক ভাৰতীয় ভাষা বিভাগৰ অধ্যাপক হিচাপে অৱসৰ গ্ৰহণ কৰে । অহিৰণ, চেনাবৰ স্ৰোত, নীলকণ্ঠী ব্ৰজ, আধালিখা দস্তাবেজ আদি তেওঁৰ জনপ্ৰিয় উপন্যাস । ১৯৮২ চনত তেওঁ মামৰে ধৰা তৰোৱাল নামৰ উপন্যাসখনৰ বাবে সাহিত্য অকাডেমি বঁটা লাভ কৰে । ১৯৮৮ চনত লাভ কৰে অসম সাহিত্য সভা বঁটা । ২০০০ চনত দঁতাল হাতীৰ উঁয়ে খোৱা হাওদা উপন্যাসৰ বাবে জ্ঞানপীঠ বঁটা লাভ কৰে । তেওঁ জ্ঞানপীঠ বঁটা লাভ কৰা দ্বিতীয়গৰাকী অসমীয়া । ২০১৬ চনত অসম চৰকাৰে মৰণোত্তৰভাৱে অসম-ৰত্ন বঁটা প্ৰদান কৰে । ২০১১ চনৰ আজিৰ দিনটোতে তেওঁৰ দেহাৱসান ঘটে । সাহিত্যিকগৰাকীলৈ আমাৰ প্ৰণাম ।
