আজি সাহিত্যিক, শিক্ষাবিদ, সংগঠক শৰৎ চন্দ্ৰ গোস্বামীৰ স্মৃতি দিৱস । কলিকতা মেট্ৰপলিটান কলেজৰ পৰা বিএ পাছ কৰি তেওঁ ১৯০৮ চনত ডেপুটী ইন্সপেক্টৰ পদত নিযুক্ত হয় আৰু ১৯২৮ চনত তেওঁ অসম উপত্যকাৰ বিদ্যালয়সমূহৰ ইন্সপেক্টৰ হয় । তেওঁ জনশিক্ষাৰ বিশেষ বিষয়াৰূপেও কাৰ্যনিৰ্বাহ কৰিছিল । ১৯৪৩ চনত তেওঁ অৱসৰ গ্ৰহণ কৰে । তেওঁ আছিল অসম সাহিত্য সভাৰ প্ৰতিষ্ঠাপক সম্পাদক । ছাত্ৰাৱস্থাৰ পৰাই তেওঁ সাহিত্য চৰ্চা কৰিছিল । ১৯০৫ চনত জোনাকী আলোচনীত তেওঁৰ প্ৰথমটো চুটিগল্প প্ৰকাশ পাইছিল । তেওঁ গীত, কবিতা, শিশু-সাহিত্যও ৰচনা কৰিছিল । ‘পানিপথ’ তেওঁৰ একমাত্ৰ উপন্যাস । তেওঁ ইংৰাজী ভাষাতো প্ৰবন্ধ-পাতি লিখিছিল । ১৯৪৪ চনৰ আজিৰ দিনটোতে তেওঁৰ দেহাৱসান ঘটে । সাহিত্যিকগৰাকীলৈ আমাৰ প্ৰণাম ।
আজি বিশিষ্ট ঔপন্যাসিক, কবি, গল্পকাৰ ছৈয়দ আব্দুল মালিকৰ স্মৃতি দিৱস । ১৯৫১ চনত গুৱাহাটী বিশ্ববিদ্যালয়ৰ পৰা স্নাতকোত্তৰ ডিগ্ৰী লৈ তেওঁ গোলাঘাট হাই স্কুলত শিক্ষকতা কৰি পিছলৈ জগন্নাথ বৰুৱা মহাবিদ্যালয়ৰ অধ্যাপক হয় আৰু তাৰ পৰাই অৱসৰ লয় । তেওঁ কিছুদিন আবকাৰী পৰিদৰ্শক আৰু আকাশবাণীৰ অনুষ্ঠান সহকাৰী ৰূপেও কাৰ্যনিৰ্বাহ কৰিছিল । আৱাহন আৰু বাঁহীত গল্প লিখিবলৈ আৰম্ভ কৰা ছৈয়দ আব্দুল মালিকে ২৫ খনৰো অধিক চুটিগল্পৰ সংকলন, প্ৰায় ষাঠিখন উপন্যাস, পাঁচখনৰো অধিক কবিতা সংকলন, বিছখন নাটক, তিনিখন শিশু-সাহিত্য আদিৰে অসমীয়া ভাষাৰ ভঁৰাল চহকী কৰি থৈ গৈছে । তেওঁৰ অঘৰী আত্মাৰ কাহিনী নামৰ উপন্যাসখনৰ বাবে তেওঁ ১৯৭২ চনত সাহিত্য অকাডেমি বঁটা লাভ কৰে । তেওঁ ১৯৯২ চনত অসম উপত্যকা সাহিত্য বঁটা আৰু ১৯৯৫ চনত শংকৰদেৱ বঁটা লাভ কৰে । ১৯৯৭ চনত অসম সাহিত্য সভাই তেওঁক সাহিত্যাচাৰ্য উপাধি প্ৰদান কৰে । ১৯৭৭ চনত অভয়াপুৰীত অনুষ্ঠিত অসম সাহিত্য সভাৰ অধিৱেশনত তেওঁ সভাপতিত্ব কৰিছিল । তেওঁ ভাৰতীয় গণনাট্য সংঘৰো সভাপতি আছিল । তদুপৰি তেওঁ সংগীত নাটক একাডেমী, নেচনেল বুক ট্ৰাষ্ট অব ইণ্ডিয়া, ললিত কলা একাডেমী আদিৰ সৈতেও জড়িত আছিল । ২০০০ চনৰ আজিৰ দিনটোতে তেওঁৰ দেহাৱসান ঘটে । সাহিত্যিকগৰাকীলৈ আমাৰ প্ৰণাম ।
আজি দেশৰ প্ৰথমগৰাকী মহিলা ৰাষ্ট্ৰপতি প্ৰতিভা দেৱী সিং পাটিলৰ ওপজা দিন । ১৯৩৪ চনৰ আজিৰ দিনটোতে ব্ৰিটিছ ভাৰতৰ বোম্বে প্ৰেচিডেন্সীৰ নাদগাঁৱত তেওঁৰ জন্ম হৈছিল । ৰাজনীতি আৰু অৰ্থনীতিৰ স্নাতকোত্তৰ ডিগ্ৰীধাৰী আৰু আইনৰ স্নাতক পাটিলে আইনী বিষয়া হিচাপে কৰ্মজীৱনৰ পাতনি মেলিছিল । ১৯৬২ চনৰ পৰা তেওঁ সক্ৰিয় ৰাজনীতিত যোগদান কৰি মহাৰাষ্ট্ৰ বিধানসভাৰ উপৰি ৰাজ্যসভা, লোকসভালৈ ক্ৰমে নিৰ্বাচিত হৈছিল । ২০০৪ চনত তেওঁ ৰাজস্থানৰ প্ৰথমগৰাকী মহিলা ৰাজ্যপাল হিচাপে নিযুক্তি লাভ কৰে । ২০০৭ চনত তেওঁ দেশৰ দ্বাদশ ৰাষ্ট্ৰপতি হিচাপে নিৰ্বাচিত হৈ ২০১২ চনলৈ পূৰ্ণ কাৰ্যকাল কাৰ্যনিৰ্বাহ কৰে । নেত্ৰীগৰাকীক যাচিলোঁ ওপজা দিনৰ ওলগ ।
