আজি বিশিষ্ট সাহিত্যিক উপেন্দ্ৰ চন্দ্ৰ লেখাৰুৰ ওপজা দিন । ১৯০৫ চনৰ আজিৰ দিনটোতে তেওঁ উত্তৰ গুৱাহাটীৰ ৰুদ্ৰেশ্বৰত জন্ম লাভ কৰিছিল । তেওঁ স্নাতকোত্তৰ মহলাত অধ্যয়নৰত অৱস্থাতে আইনৰো স্নাতক ডিগ্ৰী লাভ কৰে । উত্তৰ গুৱাহাটীৰ কমলদেৱ উচ্চ মাধ্যমিক বিদ্যালয়ত শিক্ষকতাৰে তেওঁ কৰ্মজীৱনৰ পাতনি মেলি ১৯৩৮ চনৰ পৰা ১৯৫৯ চনলৈ কটন কলেজৰ অসমীয়া বিভাগত অধ্যাপনা কৰে । ১৯৬০ চনত তেওঁ বৃন্দাৱনৰ বৈষ্ণৱ পাৰমাৰ্থিক বিশ্ববিদ্যালয়ৰ শ্ৰীশংকৰদেৱ আসনৰ গৱেষণা অধ্যাপক হিচাপে নিযুক্তি লাভ কৰে । ইন্দিৰা গোস্বামীয়ে (মামণি ৰয়ছম গোস্বামী) তেওঁৰ অধীনতে ৰামায়ণী সাহিত্য সন্দৰ্ভত গৱেষণা কৰি ডক্টৰেট ডিগ্ৰী লাভ কৰিছিল । ১৯৭০ চনত ধিঙত অনুষ্ঠিত অসম সাহিত্য সভাৰ অধিৱেশনত তেওঁ সভাপতিত্ব কৰিছিল । আনন্দৰাম বৰুৱা পুথিভঁড়াল আৰু শ্ৰীশ্ৰীশংকৰদেৱ সংঘৰ তেওঁ অন্যতম প্ৰতিষ্ঠাপক আছিল । তেওঁ জনশিক্ষা নামৰ আলোচনী এখনৰো সম্পাদক আছিল । অসমীয়া ৰামায়ণী সাহিত্য, লক্ষ্মীনাথ বেজবৰুৱা আদি তেওঁৰ প্ৰকাশিত গ্ৰন্থ । তেওঁ এগৰাকী ভাল অনুবাদকো আছিল । ভক্তিবিৱেক আৰু ধৰ্মপদ তেওঁৰ অনুবাদ গ্ৰন্থ । সাহিত্যিকগৰাকীলৈ আমাৰ প্ৰণাম ।
আজি বিশিষ্ট সাহিত্যিক ৰং বং তেৰাঙৰ ওপজা দিন । ১৯৩৭ চনৰ আজিৰ দিনটোতে কাৰ্বি আংলঙৰ বকলিয়াঘাটৰ লাংবুংদিংপিত তেওঁৰ জন্ম হৈছিল । ১৯৬৬ চনত গুৱাহাটী বিশ্ববিদ্যালয়ৰ পৰা অসমীয়া বিষয়ত স্নাতকোত্তৰ ডিগ্ৰী লাভ কৰি তেওঁ লংকা হাইস্কুলত শিক্ষকতাৰে কৰ্মজীৱনৰ পাতনি মেলে । পিছলৈ ডিফু কলেজত অধ্যাপনা কৰিবলৈ লয় আৰু ২০০২ চনত কলেজখনৰ তত্বাৱধায়ক অধ্যক্ষ হিচাপে অৱসৰ গ্ৰহণ কৰে । গুড়িপৰুৱা নামৰ গল্প এটাৰে তেওঁ সাহিত্য জগতত পদাৰ্পণ কৰে । নীলা অৰ্কিড, জাক হেৰোৱা পখী আদি উপন্যাসৰ ভিতৰত তেওঁৰ ৰংমিলিৰ হাঁহি উপন্যাসখন বিপুলভাৱে সমাদৃত । বন ফৰিঙৰ গীত, লাংচোলিয়েটৰ আদি তেওঁৰ গল্প পুথি । তেওঁ কাৰ্বি ভাষাৰ প্ৰথমগৰাকী অভিধান প্ৰণেতা । ১৯৮৯ চনত ভাৰত চৰকাৰে তেওঁক পদ্মশ্ৰী সন্মান প্ৰদান কৰে । ২০০৮ চনত তেওঁ অসম উপত্যকা সাহিত্য বঁটা লাভ কৰে । ২০০৯ চনত ধেমাজি আৰু ২০১০ চনত বৈঠালাংছুত অনুষ্ঠিত অসম সাহিত্য সভাৰ অধিৱেশনত তেওঁ সভাপতিত্ব কৰিছিল । সাহিত্যিকগৰাকীক জনালোঁ ওপজা দিনৰ ওলগ ।
