আজি ‘বিহগী কবি’ ৰঘুনাথ চৌধাৰীৰ ওপজা দিন । ১৮৭৯ চনত অবিভক্ত কামৰূপ (বৰ্তমান নলবাৰী) জিলাৰ লাউপাৰাত তেওঁৰ জন্ম হৈছিল । ৰোমাণ্টিক যুগৰ বিশিষ্ট কবিগৰাকীয়ে গুৱাহাটীৰ উজান বজাৰৰ এখন বালিকা বিদ্যালয়ত শিক্ষকতাৰে কৰ্মজীৱনৰ পাতনি মেলি ১৯০১ চনত লতাশিল প্ৰাথমিক বিদ্যালয়ৰ শিক্ষক নিযুক্ত হয় । পিছলৈ তেওঁ ঘৰুৱা কাৰণত চাকৰি বাদ দিয়ে । ১৯১০ চনত তেওঁৰ প্ৰথম কবিতা পুথি ‘সাদৰী’ প্ৰকাশ পায় । কেতেকী, কাৰবালা, দহিকতৰা আদি তেওঁৰ অন্যান্য কবিতা পুথি । তেওঁ জোনাকী আলোচনীৰ সহকাৰী সম্পাদক আছিল । শিশু আলোচনী ‘মইনা’ৰ উপৰি তেওঁ জয়ন্তী, সুৰভি আদি আলোচনীৰো সম্পাদনা কৰিছিল । গুৱাহাটীৰ প্ৰগতি সংঘ আৰু সবিতা সভাৰ অন্যতম প্ৰতিষ্ঠাপক আছিল তেওঁ । তেওঁ এগৰাকী স্বাধীনতা সংগ্ৰামীও আছিল । ১৯৩৬ চনত তেজপুৰত অনুষ্ঠিত হোৱা অসম সাহিত্য সভাৰ অধিৱেশনত তেওঁ সভাপতিত্ব কৰিছিল । ন্যায়াধীশ হলিৰাম ডেকাই তেওঁক ‘বিহগী কবি’ আখ্যা দিছিল । ভাৰত চৰকাৰে তেওঁক সাহিত্যিক পেঞ্চন আগবঢ়াইছিল । কবিগৰাকীলৈ আমাৰ প্ৰণাম ।
আজি বাগ্মীবৰ নীলমণি ফুকনৰ স্মৃতি দিৱস । তেওঁ এগৰাকী সাহিত্যিক, সুবক্তা তথা ৰাজনীতিক আছিল । ডিব্ৰুগড়ৰ জৰ্জ ইনষ্টিটিউটৰ প্ৰধান শিক্ষক, আছাম লেজিছলেটিভ কাউন্সিলৰ সভ্য, অসম এছেম্বলীৰ সভ্য আদি বিভিন্ন পদৱীত কাৰ্যনিৰ্বাহ কৰিছিল । সাদিনীয়া বাতৰি, ন জোন আৰু দৈনিক বাতৰিৰ সম্পাদক আছিল তেওঁ । জ্যোতিকণা, সাহিত্য কলা, চিন্তামণি আদি তেওঁৰ সাহিত্য কৃতি । ১৯৪৪ চনত শিৱসাগৰত অনুষ্ঠিত অসম সাহিত্য সভাৰ অধিৱেশনত তেওঁ সভাপতিত্ব কৰিছিল । ১৯৭৮ চনৰ আজিৰ দিনটোতে তেওঁৰ দেহাৱসান ঘটে । বাগ্মীবৰলৈ আমাৰ প্ৰণাম ।
আজি বিদ্ৰোহী কবি প্ৰসন্নলাল চৌধুৰীৰ স্মৃতি দিৱস । তেওঁ এগৰাকী কবি, গীতিকাৰ, গল্পকাৰ তথা নাট্যকাৰ আছিল । এগৰাকী দক্ষ চিকাৰী আৰু অভিনেতাও আছিল তেওঁ । ১৯২৮ চনত কলিকতাৰ ছেইণ্ট পল কলেজৰ পৰা স্নাতক ডিগ্ৰী লৈ তেওঁ শিক্ষকতাৰে কৰ্মজীৱনৰ পাতনি মেলি ১৯৬৫ চনত বৰপেটা বিদ্যাপীঠৰ প্ৰধান শিক্ষক হিচাপে অৱসৰ গ্ৰহণ কৰে । অগ্নিমন্ত্ৰ, ৰংগে ফাকু খেলে, বাৰিষাৰ ৰঙা ৰ’দ আদি তেওঁৰ সাহিত্য কৃতি । ১৯৭৮ চনত গোলাঘাটত অনুষ্ঠিত অসম সাহিত্য সভাৰ অধিৱেশনত তেওঁ সভাপতিত্ব কৰিছিল । ১৯৮৬ চনৰ আজিৰ দিনটোতে তেওঁৰ দেহাৱসান ঘটে । বিদ্ৰোহী কবিলৈ আমাৰ প্ৰণাম ।
আজি কবি, গীতিকাৰ কেশৱ মহন্তৰ ওপজা দিন । ১৯২৬ চনৰ আজিৰ দিনটোতে তেজপুৰৰ মিজিকাজান চাহ বাগিচাত তেওঁৰ জন্ম হৈছিল । ১৯৫২ চনত তেওঁ জামুগুৰি উচ্চতৰ মাধ্যমিক বিদ্যালয়ত শিক্ষকতাৰে কৰ্মজীৱনৰ পাতনি মেলিছিল । পিছলৈ গুৱাহাটীৰ ডনবস্ক’ স্কুলতো শিক্ষকতা কৰিছিল । ১৯৫৯ চনত গুৱাহাটী বিশ্ববিদ্যালয়ত প্ৰকাশক-অনুবাদক হিচাপে যোগদান কৰি ১৯৮৪ চনত প্ৰকাশন বিষয়া হিচাপে অৱসৰ লয় । তেওঁ অধুনালুপ্ত ছোভিয়েট দেশ আলোচনীৰ মুখ্য সম্পাদক আছিল । তদুপৰি লুইত, প্ৰবাহ, মিলন, নতুন সাহিত্য আদি আলোচনীৰো সম্পাদক আছিল । ১৯৯৩ চনত মোৰ যে কিমান হেপাহ নামৰ গ্ৰন্থৰ বাবে তেওঁ সাহিত্য অকাডেমি বঁটা লাভ কৰে । ৰ’দ জিকিমিকি, আগন্তুক, বুকুত এজাক ধুমুহা, আমাৰ পৃথিৱী, বেলি ওলোৱাৰ হাঁহি, মা আমি শদিয়ালৈ যামেই আদি তেওঁৰ সাহিত্য কৃতি । আকাশবাণী গুৱাহাটীৰ তেওঁ স্বীকৃত গীতিকাৰ আছিল । তেওঁ আজলী নবৌ, ককা দেউতা নাতি আৰু হাতী, অৰণ্য, অভিযান আদি জনপ্ৰিয় চলচ্চিত্ৰসমূহৰ গীতো লিখিছিল । গীতিকাৰগৰাকীলৈ আমাৰ প্ৰণাম ।
