বৰ্তমান সময়ত স্কুলীয়া শিশু ছ’চিয়েল মিডিয়া আৰু অনলাইন গেমছত আটাইতকৈ বেছি সক্ৰিয় । কৰ‘না মহামাৰীৰ সংক্ৰমণ ৰোধ কৰাৰ বাবে দেশত সময়ে সময়ে যেতিয়াৰে পৰা সান্ধ্য আইন তথা সম্পূৰ্ণ লকডাউনৰ ব্যৱস্থা কৰা হৈছে তেতিয়াৰে পৰাই শিশুসকলেও ঘৰতে অনলাইন শিক্ষা পদ্ধতিৰে শিক্ষা গ্ৰহণ কৰিব লগা হৈছে। কিন্তু অনলাইন ক্লাচ কৰাৰ সমসাময়িক ভাৱে স্কুলীয়া শিশু এতিয়া ছ’চিয়েল মিডিয়া, ইন্টাৰনেট আদিত সক্ৰিয় হৈ পৰিছে।
ৰাষ্ট্ৰীয় শিশু অধিকাৰ সুৰক্ষা আয়োগে ( এন চি পি চি আৰ ) চলোৱা এক সমীক্ষা মতে ভাৰতত ১০ বছৰ বা তাতোকৈ কম বয়সৰ বৃহৎ সংখ্যক শিশুৰ ছ’চিয়েল মিডিয়াত একাউন্ট আছে । এই সমীক্ষা চলোৱা হৈছিল প্ৰায় ৩৪০০ জন স্কুলীয়া শিশুক লৈ । আৰু তাৰে ভিতৰত প্ৰায় ৪২% শিশুৰ ছ’চিয়েল মিডিয়াত একাউন্ট আছে বুলি জানিব পৰা গৈছিল । শিশুসকলৰ মাজত আটাইতকৈ জনপ্ৰিয় ছ’চিয়েল নেটৱৰ্কিং চাইট অথবা এপ হৈছে ফেচবুক আৰু ইনষ্টাগ্ৰাম । ফোনত মেছেজ কৰিবৰ বাবে অধিকাংশ শিশুৱে ৱাটছ এপ , ফেচবুক , ইনষ্টাগ্ৰাম আৰু স্নেপশ্বটৰ দৰে মেছেজিং এপ ব্যৱহাৰ কৰে বুলি সমীক্ষাত গম পোৱা গৈছে ।
উল্লেখযোগ্য যে ছ’চিয়েল নেটৱৰ্কিং চাইটত একাউন্ট খোলাৰ বাবে শিশুৰ নূন্যতম বয়স হৈছে ১৩ বছৰ । আনহাতে ভাৰতত ১৩ বছৰ বয়সতকৈ উৰ্ধ্বৰ শিশুৰ মাজত স্মাৰ্ট ফোন তথা ইন্টাৰনেটৰ ব্যৱহাৰ বৃদ্ধি পোৱা বুলি সমীক্ষাত উল্লেখ কৰা হৈছে । এক প্ৰকাৰে চাবলৈ গ’লে ছ’চিয়েল নেটৱৰ্কিং প্লেটফৰ্মৰ তৰফৰ পৰা নিৰ্ধাৰণ কৰা নীতি – নিৰ্ধাৰণ উলংঘনৰ এয়া এক স্পষ্ট উদাহৰণ বুলি ক’ব পৰা যায় ।
ছ’চিয়েল মিডিয়াত আজিকালি সকলো বিষয় সহজলভ্য ।এই চাইটত এনে কিছুমান বিষয়ো আছে যিবোৰ শিশুৰ বাবে উপযোগী নহয় । শিশুৰ বাবে অনুকূল বহুত বিষয় এতিয়া শিশুৱে স্মাৰ্টফোনৰ ব্যৱহাৰ জনাৰ পৰা নিজেই উলিয়াই ল’ব পৰা হৈ উঠিছে । আনহাতে পঢ়া-শুনাৰ বাবে বৰ্তমান ফোনটোৱেই এতিয়া একমাত্ৰ সাৰথি হোৱাৰ বাবে পিতৃ-মাতৃয়ে নিজৰ সন্তানৰ হাতত মোবাইল তুলি দিবলৈ বাধ্য হৈ পৰিছে । মোবাইলটো হাতত পৰা ল’গে ল’গে বহুতো শিশু আকৌ অনলাইন গেমছবোৰৰ প্ৰতিও আকৰ্ষিত হৈছে ।
বিজ্ঞান প্ৰযুক্তিৰ ব্যাপক উন্নতি তথা ক’ভিড -১৯ ৰ তলাবদ্ধ পৰিস্থিতিয়ে মোবাইল ফোনটোক যেন মানুহৰ আৰু কাষলৈ চপাই আনিলে। মোবাইলটোৰ পাকচক্ৰত বহু মূল্যবান সময় অপচয় কৰি তাৰ বিনিময়ত কৰ্মহীনতা, মানসিক অশান্তি আৰু বিশাদগ্ৰস্ততাত সোমাই পৰিছে প্ৰায়ভাগলোক । আৰু এতিয়া লাহে লাহে শিশু সকলো সেই দিশেৰেই গতি কৰিছে । কিন্তু বৰ্তমান সময়ত এই বিষয়বোৰৰ ওপৰত গুৰুত্ব দিয়াতো খুবেই জৰুৰী হৈ পৰিছে ।
কৰ’না মহামাৰীয়ে সমগ্ৰ বিশ্বতে নেতিবাচক প্ৰভাৱ পেলোৱাৰ এই সময়খিনিত মোবাইল ফোন , ইন্টাৰনেট , ছ’চিয়েল চাইট , অনলাইন শিক্ষা আদিবোৰে সকলো ক্ষেত্ৰতে গভীৰভাৱে প্ৰভাৱ বিস্তাৰ কৰিছে । ভৱিষ্যতে তাৰ ফলাফল ইতিবাচক হ’ব নে নেতিবাচক হ’ব সেইয়া এতিয়াও এক ডাঙৰ প্ৰশ্ন ।
