বিশ্বৰ এনে এখন দেশ য’ত মহিলাই টান কাপোৰ পৰিধান কৰাও অপৰাধঃ হ’ব পাৰে মৃত্যুদণ্ড

সংবাদ প্ৰতিষ্ঠানৰ বাতৰি অনুসৰি আফগানিস্তানৰ উত্তৰৰ বাল্খ প্ৰদেশৰ পৰা প্ৰকাশিত এক প্ৰতিবেদনত প্ৰকাশ পাইছে যে তালিবানী সন্ত্ৰাসবাদীয়ে এগৰাকী যুৱতীক টান পোছাক পৰিধান কৰা আৰু যাতায়তৰ সময়ত লগত কোনো পুৰুষ সংগী নথকাৰ বাবেই মৃত্যুদণ্ডৰে দণ্ডিত কৰে!

প্ৰতিবেদন অনুসৰি যুৱতীগৰাকীক তালিবানীয়ে উগ্ৰপন্থী দলটোৰ দ্বাৰা নিয়ন্ত্ৰিত চামাৰ কান্দিয়ান গাঁৱত গুলীয়াই হত্যা কৰিছিল। আৰক্ষীৰ ভাষ্য অনুসৰি আক্ৰমণৰ সময়ত প্ৰায় ২১ বছৰ বয়সৰ মহিলাগৰাকীয়ে বোৰ্খা পৰিধান কৰি সমগ্ৰ শৰীৰ ঢাকি ৰাখিছিল।

বাল্খৰ ৰাজধানী মাজাৰ-ই শ্বৰীফলৈ যাবলৈ এখন বাহনত উঠি মহিলাগৰাকী ঘৰৰ পৰা ওলাই যোৱাৰ পিছতেই আক্ৰমণৰ বলি হৈছিল বুলি প্ৰকাশ। অৱশ্যে তালিবানৰ মুখপাত্ৰ জাবিহুল্লাহ মুজাহিদে এই কথা অস্বীকাৰ কৰি কয় যে দলটোৱে এই বিষয়ে তদন্ত কৰি আছে।

তালিবানীয়ে অকলশৰীয়া বা বিধৱা মহিলাসকলক যোদ্ধাসকলক বিয়া কৰাবলৈ বাধ্য কৰি আহিছে। যেতিয়াই উগ্ৰপন্থীসকলে এখন নতুন চহৰ বা জিলা দখল কৰে, তেওঁলোকে স্থানীয় মছজিদৰ বক্তাৰ জৰিয়তে সকলো স্থানীয় চৰকাৰী বিষয়া আৰু আৰক্ষী কৰ্মীৰ পত্নী আৰু বিধৱাসকলৰ নাম অৱগত কৰাৰ বাবে আদেশ জাৰি কৰে বুলি প্ৰতিবেদনত প্ৰকাশ। স্থানীয় বাসিন্দা আৰু বিষয়াসকলে বাতৰি কাকতখনক জনোৱা অনুসৰি দলটোৱে শ শ যুৱতীক তেওঁলোকৰ উগ্ৰপন্থীৰ সৈতে ‘যুদ্ধলুটি’ হিচাপে বিয়া কৰাবলৈ ঘূৰাই আনিছে।

কিছুদিনৰ আগতে আমেৰিকাই দোহাত তালিবানীৰ লগত শান্তি চুক্তিত হস্তাক্ষৰ কৰে। চুক্তি অনুসৰি তালিবানী বা আল কায়দাই আমেৰিকাৰ অধীনৰ এলেকাত কোনো কুটাঘাট মূলক কাম নকৰে আৰু যুক্তৰাষ্ট্ৰয়ো তালিবানৰ সৈতে যুদ্ধ এৰাই চলিব।

ইয়াৰ পিছতেই তালিবানীয়ে আফগানিস্তানত পুনৰ যুদ্ধ আৰম্ভ কৰি দিছে। ইতিমধ্যে প্ৰায় ৩৬০০০ সাধাৰণ মানুহৰ মৃত্যু হৈছে। যুক্তৰাষ্ট্ৰয়ো সৈন্য অপসাৰণৰ কাম খৰতকীয়াকৈ হাতত লৈছে। বাতৰিত প্ৰকাশ পাইছে যে তালিবানীয়ে আফগানিস্তানৰ ৩৯৮ খন জিলাৰ ১৯৩ খন নিজৰ দখললৈ নিছে। ১৩০ খনত যুদ্ধ চলি আছে। ৭৫ খন জিলা ৰাষ্ট্ৰৰ হাতত আছে। সকলোতে আধিপত্য বিস্তাৰ কৰিবলৈ হয়তো বেছি সময় নালাগিব। 

তালিবানৰ অগ্ৰগতিৰ আশংকা কৰা পৰিয়ালবোৰে মহিলা আৰু ছোৱালীসকলক আফগানিস্তানৰ ৰাজধানী কাবুলকে ধৰি অন্যান্য সুৰক্ষিত অঞ্চললৈ পঠিয়াই আহিছে, যাতে তেওঁলোকক ধৰি লৈ যোৱাত বাধা প্ৰদান কৰিব পৰা যায়।

তাখাৰ আৰু বদাখশানৰ উত্তৰ আফগান অঞ্চলত মহিলাসকলক বলপূৰ্বক বিবাহ পাশত আৱদ্ধ কৰোৱাৰ কথা স্থানীয় বাতৰিত প্ৰকাশ পাইছে। আনহাতে বামিয়ান প্ৰদেশতো একে ধৰণৰ প্ৰচেষ্টা কৰা হৈছিল। তথ্য অনুসৰি ৪ দিনৰ ভয়ংকৰ যুঁজৰ পিছত বিদ্ৰোহী গোটটোক আফগান নিৰাপত্তা বাহিনীয়ে বিতাড়িত কৰিবলৈ সক্ষম হয়।