১৮৭৫চনৰ ৩১ অক্টোবৰত গুজৰাট ৰাজ্যৰ খেদা জিলাৰ নাদিয়াদত বল্লভভাই ঝাভেৰভাই পেটেলৰ জন্ম হয় ৷ চৰ্দাৰ বল্লভ ভাই পেটেল নামেৰে জনাজাত তেওঁ আছিল এজন ভাৰতীয় অধিবক্তা, প্ৰভাৱশালী ৰাজনৈতিক নেতা, বেৰিষ্টাৰ আৰু ৰাজনীতিবিদ ৷ ১৯৪৭ চনৰ পৰা ১৯৫০ চনলৈ তেওঁ আছিল ভাৰতৰ প্ৰথম উপ-প্ৰধানমন্ত্ৰী আৰু ভাৰতৰ প্ৰথম গৰাকী গৃহমন্ত্ৰী । এজন বেৰিষ্টাৰ আৰু ভাৰতীয় জাতীয় কংগ্ৰেছৰ জ্যেষ্ঠ নেতা গৰাকীয়ে দেশৰ স্বাধীনতা সংগ্ৰামত আগশাৰীৰ ভূমিকা গ্ৰহণ কৰিছিল ৷ ভাৰতক এক ঐক্যবদ্ধ, স্বাধীন ৰাষ্ট্ৰ হিচাপে প্ৰতিষ্ঠা কৰাৰ ক্ষেত্ৰতো পথ প্ৰদৰ্শন কৰিছিল এই নেতা গৰাকীয়ে । তেওঁ আছিল ভাৰতীয় জাতীয় কংগ্ৰেছৰো অন্যতম ৰক্ষণশীল সদস্য। ভাৰত আৰু আন ঠাইতো তেওঁ চৰ্দাৰ বুলি জনাজাত, হিন্দী, উৰ্দু, বাংলা আৰু পাৰ্চী ভাষাত যাৰ অৰ্থ হৈছে”মুখ্য”।
জাতিৰ পিতা মহাত্মা গান্ধীৰ প্ৰাৰম্ভিক ৰাজনৈতিক লেফটেনেণ্টসকলৰ মাজৰ এজন পেটেল গুজৰাটৰ খেদা, বৰচাদ আৰু বৰদোৱালীৰ কৃষকসকলক ব্ৰিটিছ ৰাজৰ বিৰুদ্ধে অহিংস আইন অমান্য কৰি গুজৰাটৰ আটাইতকৈ প্ৰভাৱশালী নেতাসকলৰ মাজৰ এজন হৈ পৰিছিল। তেওঁক ভাৰতীয় জাতীয় কংগ্ৰেছৰ ৪৯ তম সভাপতি হিচাপে নিযুক্তি দিয়া হৈছিল ৷
উল্লেখনীয় যে পেটেলৰ জন্ম তাৰিখ কেতিয়াও আনুষ্ঠানিকভাৱে লিপিবদ্ধ কৰা হোৱা নাছিল ৷ পেটেলে নিজেই তেওঁৰ মেট্ৰিক পৰীক্ষাৰ কাকতত ৩১ অক্টোবৰ তাৰিখটো জন্ম তাৰিখ হিচাপে অন্তৰ্ভূক্ত কৰিছিল। তেওঁ মধ্য গুজৰাটৰ লেভা পেটেল সম্প্ৰদায়ৰ আছিল, যদিও তেওঁৰ খ্যাতিৰ পিছত লেভা পেটেল আৰু কাদাভা পাতিদাৰ দুয়োজনে তেওঁক তেওঁলোকৰ নিজৰ এজন বুলি দাবী কৰিছে।
হৃদৰোগত আক্ৰান্ত হৈ ১৯৫০ চনৰ ১৫ ডিচেম্বৰত বোম্বাইৰ বিৰলা হাউচত পেটেলৰ মৃত্যু হয়। তেওঁৰ মৃত্যুৰ পিছদিনা ভাৰতৰ অসামৰিক আৰু আৰক্ষী সেৱাৰ ১,৫০০ তকৈও অধিক বিষয়া দিল্লীত তেওঁৰ বাসগৃহত শোক প্ৰকাশ কৰিবলৈ একত্ৰিত হৈছিল আৰু ভাৰতৰ সেৱাত “সম্পূৰ্ণ আনুগত্য আৰু অবিৰাম উৎসাহ”ৰ প্ৰতিশ্ৰুতি দিছিল। পেটেলৰ মৃত্যুত ৰাষ্ট্ৰসংঘৰ মহাসচিব ট্ৰিগভে লাই, ইণ্ডোনেছিয়াৰ ৰাষ্ট্ৰপতি চুকাৰ্ণো, পাকিস্তানৰ প্ৰধানমন্ত্ৰী লিয়াকত আলী খান আৰু যুক্তৰাজ্যৰ প্ৰধানমন্ত্ৰী ক্লেমেণ্ট এটলী আদিকে ধৰি বিশ্বৰ বিভিন্ন দেশ আৰু বিশ্বনেতাই শোকবাৰ্তা প্ৰেৰণ কৰিছিল ৷
আনহাতে ভাৰততো পেটেললৈ শ্ৰদ্ধাঞ্জলি জ্ঞাপন কৰি প্ৰধানমন্ত্ৰী জৱাহৰলাল নেহৰুৱে এক সপ্তাহৰ ৰাষ্ট্ৰীয় শোক ঘোষণা কৰিছিল । গিৰগাওঁ চৌপথিত পেটেলৰ অন্ত্যেষ্টিক্ৰিয়াৰ পৰিকল্পনা কৰা হৈছিল যদিও তেওঁৰ পত্নী আৰু ভায়েকৰ দৰে একে ঠাইতে সাধাৰণ মানুহৰ দৰে অন্ত্যেষ্টিক্ৰিয়া কৰাটো তেওঁৰ ইচ্ছা আছিল বুলি তেওঁৰ জীয়েকে জনোৱাৰ পিছত পৰৱৰ্তী সময়ত সোনাপুৰত (বৰ্তমানৰ মেৰিন লাইনচ) তেওঁৰ অন্ত্যেষ্টিক্ৰিয়া সম্পন্ন কৰা হৈছিল ৷ । বোম্বাইৰ সোনাপুৰত তেওঁৰ অন্ত্যেষ্টিক্ৰিয়াত প্ৰধানমন্ত্ৰী জৱাহৰলাল নেহৰু, ৰাজাগোপালাচাৰী আৰু ৰাষ্ট্ৰপতি ৰাজেন্দ্ৰ প্ৰসাদকে ধৰি ১০ লাখ লোক উপস্থিত আছিল।
২০১৮চনৰ ৩১ অক্টোবৰ তাৰিখে চৰ্দাৰ বল্লভ ভাই পেটেলৰ জন্মৰ ১৪৩ তম বাৰ্ষিকীত ভাৰতৰ প্ৰধানমন্ত্ৰী নৰেন্দ্ৰ মোদীয়ে বদোদৰাৰ ওচৰৰ সাধু বাজিৰ পৰা ৩.২ কিলোমিটাৰ দূৰত নৰ্মদা বান্ধৰ সন্মুখত নিৰ্মাণ কৰা ‘ষ্টেচু অফ ইউনিটি’ উদ্বোধন কৰে। চৰ্দাৰ বল্লভ ভাই পেটেলৰ এই স্মাৰকৰ উচ্চতা ১৮২মিটাৰ (৫৯৭ ফুট)৷ ই পৃথিৱীৰ আটাইতকৈ ওখ মূৰ্তি, যাৰ উচ্চতা ‘ স্প্ৰিং টেম্পল বুদ্ধত’কৈ ৫৪ মিটাৰ অধিক । ২০,০০০ বৰ্গ মিটাৰ জুৰি বিস্তৃত এই মূৰ্তি আৰু ইয়াৰ চাৰিওফালে ১২ কিলোমিটাৰ জুৰি বিয়পি আছে এটা কৃত্ৰিম হ্ৰদ ৷ যাৰ আনুমানিক ব্যয় হৈছে ২৯.৮ বিলিয়ন টকা (৪২৫ মিলিয়ন ডলাৰ)।
ভাৰত চৰকাৰে ভাৰতীয় লৌহ পুৰুষ, ভাৰত গণৰাজ্যৰ অন্যতম প্ৰতিষ্ঠাপক নেতা চৰ্দাৰ বল্লভভাই পেটেলৰ জন্মদিনটো ‘ৰাষ্ট্ৰীয় একতা দিৱস’ (ৰাষ্ট্ৰীয় একতা দিৱস)হিচাপে পালন কৰে ৷ ভাৰতৰ গৃহ মন্ত্ৰালয়ৰ দ্বাৰা ৰাষ্ট্ৰীয় একতা দিৱসৰ চৰকাৰী বিবৃতিত উল্লেখ কৰা হৈছে যে ৰাষ্ট্ৰীয় একতা দিৱসে “আমাৰ দেশৰ ঐক্য, অখণ্ডতা আৰু নিৰাপত্তাৰ প্ৰতি প্ৰকৃত আৰু সাম্ভাব্য ভাবুকিৰ সন্মুখীন হ’বলৈ আমাৰ দেশৰ অন্তৰ্নিহিত শক্তি আৰু স্থিতিস্থাপকতা পুনৰ নিশ্চিত কৰাৰ সুযোগ প্ৰদান কৰিব।
কিয়নো ভাৰতৰ গৃহমন্ত্ৰী হিচাপে তেওঁৰ কাৰ্যকালত, স্বাধীনতা আইন (১৯৪৭)ৰ দ্বাৰা ১৯৪৭ চনৰ পৰা ১৯৪৯ চনলৈ ৫৫০ খনতকৈও অধিক স্বতন্ত্ৰ ৰাজকীয় ৰাজ্য ভাৰতত একত্ৰিত কৰাৰ বাবে অহোপুৰুষাৰ্থ কৰা তেওঁৰ জন্মদিনটো ভাৰতত ‘ৰাষ্ট্ৰীয় একতা দিৱস’ হিচাপে উদযাপন কৰা হয় । আনহাতে তেওঁক “ভাৰতৰ ভীষ্ম’ বুলি জনা যায় ৷
