পৰিষ্কাৰ পৰিছন্নতাই এখন সমাজক সুস্থ কৰি ৰখাত এক গুৰুত্বপূৰ্ণ ভূমিকা গ্ৰহণ কৰে ৷ সেয়েহে বিশ্বৰ বহু দেশ বিশেষকৈ উন্নত দেশ সমূহ এই ক্ষেত্ৰত যথেষ্ট সচেতন হোৱা দেখা যায় ৷ সেয়েহে পৰিষ্কাৰ পৰিছন্নতাৰ ক্ষেত্ৰত সজাগতা বৃদ্ধিৰ বাবেই বিশ্বৰ বহু ঠাইত সময়ে সময়ে বিভিন্ন কাৰ্য্যসূচী গ্ৰহণ কৰা হয় ৷ তাৰেই এক উৎকৃষ্ট উদাহৰণ হ’ল এই আন্তৰ্জাতিক টইলেট দিৱস ৷ বিশেষকৈ শৌচাগাৰৰ পৰিষ্কাৰ-পৰিচ্ছন্নতাৰ ক্ষেত্ৰত সজাগতা বৃদ্ধিৰ লগতে ঘৰত শৌচাগাৰ স্থাপনৰ বিষয়ে সমাজত জ্ঞান বিয়পোৱাৰ বাবে প্ৰতি বছৰে ১৯ নৱেম্বৰত পালন কৰা হয় এই বিশ্ব টইলেট দিৱস ।
ৰাষ্ট্ৰসংঘৰ সাধাৰণ পৰিষদে (UNGA) আনুষ্ঠানিকভাৱে এই দিৱস উদযাপনৰ দিন নিৰ্ধাৰণ কৰাৰ বিপৰীতে ভাৰত চৰকাৰেও স্বচ্ছতা বা অনাময় ব্যৱস্থাৰ প্ৰতি সজাগতা বৃদ্ধিৰ লক্ষ্যৰে স্বচ্ছ ভাৰত অভিযানৰ অংশ হিচাপে প্ৰতিবছৰে এই দিৱস উদযাপন কৰি আহিছে ।
ছিংগাপুৰৰ জেক ছিম নামৰ এজন ব্যক্তিৰ উদ্যোগত ২০০১ চনত বিশ্ব শৌচাগাৰ সংস্থা প্ৰতিষ্ঠা কৰা হয় । ইয়াৰ কেইটামান বছৰৰ পিছতে ২০১০ চনত ৰাষ্ট্ৰসংঘই বিশুদ্ধ পানী আৰু চেনিটাইজেচনৰ অধিকাৰক মৌলিক মানৱ অধিকাৰ বুলি ঘোষণা কৰে। বহু বছৰ ধৰি কাম কৰাৰ অন্তত ২০১৩ চনৰ ২৪ জুলাইত ৰাষ্ট্ৰসংঘৰ সাধাৰণ পৰিষদে ১৯ নৱেম্বৰক বিশ্ব শৌচাগাৰ দিৱস হিচাপে পালন কৰাৰ প্ৰস্তাৱ গৃহীত কৰে।
বিশ্ব শৌচাগাৰ দিৱসৰ মূল লক্ষ্য কি ?
বিশ্ব শৌচাগাৰ দিৱসৰ মূল লক্ষ্য হৈছে সাধাৰণ জনতাৰ মাজত বৃহৎ অৰ্থত অনাময় ব্যৱস্থাৰ ক্ষেত্ৰত সজাগতা বৃদ্ধি কৰা।গুৰুত্বপূৰ্ণ কথা যে ২০১০ চনত ৰাষ্ট্ৰসংঘই পানী আৰু অনাময়ৰ অধিকাৰক মানৱ অধিকাৰ হিচাপে আইনগতভাৱে স্বীকৃতি দিয়াৰ লগে লগে অনাময় সংকটৰ প্ৰতি সজাগতা সৃষ্টিৰ বাবে তেওঁলোকৰ প্ৰচেষ্টা আৰু অধিক শক্তিশালী হৈ উঠিছিল।
২০২২ চনৰ বিশ্ব শৌচাগাৰ দিৱসৰ বিষয়বস্তু কি?
২০২২ চনৰ বিশ্ব শৌচাগাৰ দিৱসৰ বিষয়বস্তু হৈছে “অদৃশ্যক দৃশ্যমান কৰি তোলোঁ।”
আজিও পৃথিৱীৰ ৩৬ কোটি লোকে শৌচাগাৰ ব্যৱহাৰ নকৰাটোলৈ লক্ষ্য কৰিলে বুজিব পাৰি যে পৃথিৱীত অনাময় সংকটে স্বাস্থ্য আৰু পৰিৱেশৰ ক্ষেত্ৰত যথেষ্ট বেয়া প্ৰভাৱ পেলাইছে । পৃথিৱীৰ জলসম্পদসমূহ অপৰ্যাপ্ত অনাময় ব্যৱস্থাৰ দ্বাৰা দূষিত হৈ আছে যিয়ে আৱৰ্জনা সমূহক নদী, হ্ৰদ আৰু মাটিলৈ কঢ়িয়াই লৈ যায়।সেয়েহে প্ৰতিজন ব্যক্তিয়ে এনে এক শৌচাগাৰৰ সুবিধা লাভ কৰা উচিত যি মানুহক আৱৰ্জনামুক্ত কৰি এক স্বাস্থ্যকৰ পৰিবেশৰ সৃষ্টি কৰিব পাৰে ।
মানুহৰ মাজত পৰিষ্কাৰ পৰিছন্নতাৰ ক্ষেত্ৰত সজাগতা বৃদ্ধি কৰাৰ এই প্ৰচেষ্টাৰে সমগ্ৰ বিশ্বই উদযাপন কৰা এই দিনটো সফল হওঁক, আৱৰ্জনামুক্ত হওঁক পৃথিৱী ৷
