বিশ্বক্ৰীড়াত অসমৰ নাম জিলিকাই তোলা লাভলীনা বৰগোঁহাইৰ পিছতেই এইখন অসমৰে আৰু এগৰাকী খেলুৱৈৰ নামে এতিয়া বিশেষ চৰ্চা লাভ কৰিছে।ডিব্ৰুগড় জিলাৰ মৰাণ গৰুধৰীয়া গাঁৱৰ অঞ্জনা শইকীয়া নামৰ এই ২৪ বছৰীয়া ফুটবল খেলুৱৈ গৰাকীয়ে এটা সংস্থাপন বিচাৰি মুখ্যমন্ত্ৰীলৈ কৰা আহ্বানত এতিয়া শোকস্তব্ধ হৈ পৰিছে অসমৰ ক্ৰীড়া মহল।
প্ৰচুৰ সম্ভাৱনা থকা এই খেলুৱৈ গৰাকী ভাৰতীয় মহিলা ফুটবল দলক চাৰিবাৰকৈ প্ৰতিনিধিত্ব কৰি দেশৰ নাম আন্তঃৰাষ্ট্ৰীয় প্ৰেক্ষাপটত উজ্বলাবলৈ সক্ষম হৈছিল।ভাৰতীয় মহিলা দলৰ গ‘লকীপাৰ অঞ্জনাই অসম দলকো ৯ বাৰকৈ প্ৰতিনিধিত্ব কৰি বিভিন্ন ঠাইত পদক পাবলৈ সক্ষম হৈছিল।
উল্লেখযোগ্য যে ২০১৪ চনত পাকিস্তানৰ বিৰুদ্ধে খেলি সোণৰ পদক পোৱা অঞ্জনা আজি আৰ্থিক দীনতাৰ মাজেৰে পাৰ কৰিবলগীয়া হৈছে দিন।এসাজ খাই এসাজৰ বাবে চিন্তা কৰা দৰিদ্ৰ ঘৰখনক সকাহ দিবলৈকে ঘৰৰ পৰা ওলাই অহা এই খেলুৱৈ গৰাকীয়ে যোৰহাটৰ ৰবীন বৰা নামৰ লোকজনৰ ঘৰত থাকি অনুশীলন কৰাৰ লগতে উঠি অহা নতুন প্ৰজন্মক ফুটবলৰ প্ৰশিক্ষণ দিছে।
এনেদৰেই কিছু টকা উপাৰ্জন কৰি ঘৰখন চলোৱাৰ লগতে নিজেও অনুশীলন অব্যাহত ৰাখিছে।বিগত সময়ত মৰাণ সমষ্টিৰ বিধায়ক চক্ৰধৰ গগৈয়ে এটা চৰকাৰী চাকৰি দিয়াৰ প্ৰতিশ্ৰুতি প্ৰদান কৰিছিল যদিও সেইয়া হৈ নুঠিল।
একেদৰে ২০২০ চনত প্ৰাক্তন মুখ্যমন্ত্ৰী সৰ্বানন্দ সোনোৱালেও এটা চাকৰি যোগান ধৰাৰ কথা কৈ লিখিত পত্ৰ প্ৰেৰণ কৰিছিল যদিও অৱশেষত সেয়াও যেন ফুটুকাৰ ফেন হ‘ল।পুনৰ উপেক্ষিত হৈ ৰ‘ল প্ৰতিভাৱান খেলুৱৈ গৰাকী।
সেইয়ে এইবাৰ অঞ্জনাই মুখ্যমন্ত্ৰী হিমন্ত বিশ্ব শৰ্মালৈ কাতৰ আহ্বান কৰি কৈছে যে“ মোক এটা সংস্থাপন দিয়ক চাৰ ,মই কথা দিছো মই দেশৰ মান ৰাখিম“কিমান আত্মবিশ্বাস থাকিলে এনেকৈ কথা দিব পাৰে,কিমান ভালপোৱা থাকিলে চৰম আৰ্থিক দীনতাকো আওকাণ কৰি একান্তমনে খেলত মনোনিবেশ কৰিব পাৰে এগৰাকী খেলুৱৈয়ে।
দেশৰ মান ৰাখিবলৈ ওলাই অহা এনে প্ৰতিভাক যদি চৰকাৰে উপযুক্ত সুবিধা দিয়ে তেন্তে নিশ্চিতকৈ আৰু বহু নৱ প্ৰতিভা অনুপ্ৰাণিত হ’ব। যিহেতু আৰ্থিক দীনতাৰ দৰে সমস্যাৰ মাজত কোনো প্ৰতিভা সম্পূৰ্ণৰূপে বিকশিত হ’ব নোৱাৰে। এনে সমস্যাৰ বাবেই ইতিমধ্যে অসমৰ বহু প্ৰতিভাৱান খেলুৱৈ হেৰাই গৈছে।
তেনেক্ষেত্ৰত ক্ৰীড়াপ্ৰেমীৰ দাবী যে সময় থাকোতেই এইগৰাকী খেলুৱৈৰ দায়িত্ব চৰকাৰে বহন কৰক। অসমৰ ক্ৰীড়া ক্ষেত্ৰত অঞ্জনাৰ দৰে প্ৰতিভাৰ অভাৱ নাই। কেৱল সুবিধাৰ অভাৱত বিকশিত হ’ব পৰা নাই বহু খেল প্ৰতিভা। একান্তমনে কেৱল খেলতে মনোনিবেশ কৰিলে লাভলীনাৰ দৰে অঞ্জনাইও এদিন জিলিকাব লুইতৰ পাৰ।
