এটা দশকৰ পাছত লণ্ডন অলিম্পিকৰ শিখা দৌৰত ভাগ লোৱা পিংকী কৰ্মকাৰ পুনৰ চৰ্চালৈ

চৌদিশে এতিয়া ক্ৰীড়া আৰু ক্ৰীড়াবিদৰ জয়গান। অলিম্পিকত দেশ তথা ৰাজ্যক প্ৰতিনিধিত্ব কৰি উভতি অহা খেলুৱৈসকলক লৈও ব্যাপক আয়োজন দেখা গৈছে। কোনখন চৰকাৰে কিমান টকা দিছে অথবা কাক কি পদত নিযুক্তি দিয়া হ’ব সেই লৈও ৰাইজৰ মাজত সৰৱ আলোচনা চলিছে। 

অলিম্পিকৰ বতৰত অসমত এই দৃশ্য সহজলভ্য। হয়তো কোনোদিনেই খেলৰ সৈতে জড়িত নোহোৱা এজন ব্যক্তিৰো আজিৰ তাৰিখত প্ৰিয় খেল বক্সিং। অসমৰ দৰে এখন ৰাজ্যত সম্ভাৱনাৰ অভাৱ কোনোদিনেই নাছিল। কিন্তু প্ৰয়োজনীয় আন্তঃগাঁঠনিৰ অভাৱত বহু প্ৰতিভা অকালতেই মৰহি যায়, সেই কথাও ক্ৰীড়াপ্ৰেমীয়ে স্বীকাৰ কৰে।

হীমা দাস অথবা লাভলীনা বৰগোঁহাইয়ে খেলুৱৈ জীৱনৰ আধাৰত আহৰণ কৰা সন্মান তথা বৈভৱ সকলোৱে দেখিছে। কিন্তু এইখন অসমতে অলিম্পিকত অংশ লোৱা এনে ব্যক্তি আছে, যি অৰ্থৰ অভাৱত চাহ বাগিছাত দৈনিক হাজিৰা কৰি পৰিয়াল পোহপাল দিছে। 

২০১২ চনত চনত লণ্ডন অলিম্পিকত শিখা দৌৰত ভাৰতক প্ৰতিনিধিত্ব কৰা ডিব্ৰুগড়ৰ বৰবৰুৱা চাহ বাগিছাৰ ২নং লাইনৰ পিংকী কৰ্মকাৰ। লণ্ডনৰ পৰা উভতি অহাৰ পাছত ডিব্ৰুগড় বিমানবন্দৰৰ পৰা বিশাল কনভয়েৰে আদৰি অনা হৈছিল পিংকীক। 

পিংকীৰ বাগিছাৰ গৃহত মন্ত্ৰী-বিধায়ককে ধৰি বহু সংগঠনৰ নেতৃবৃন্দই ভৰি থৈছিল। প্ৰাক্তন মুখ্যমন্ত্ৰী সৰ্বানন্দ সোণোৱালেও আদৰণি জনাই ভৱিষ্যতে সকলো ধৰণৰ সহায়ৰ প্ৰতিশ্ৰুতি দিছিল। একেদৰে সেই সময়ৰ কেন্দ্ৰীয় ডনাৰ মন্ত্ৰী পৱনসিং ঘাটোৱাৰ আৰু ৰাজ্য চৰকাৰৰ মন্ত্ৰী পৃথিৱী মাঝিয়েও পিংকীক কৰ্মসংস্থাপনৰ প্ৰতিশ্ৰুতি দিছিল বুলি বাতৰিত প্ৰকাশ পাইছিল।

২০১৫ চনত পিংকীৰ মাকৰ মৃত্যুৰ পাছত অৰ্থৰ অভাৱত পিংকীয়ে শিক্ষা জীৱন আধাতে এৰি দিবলগীয়া হৈছিল। নামভৰ্তিৰ বাবে বিভিন্নজনৰ পৰা আৰ্থিক সাহাৰ্য বিচাৰিও পিংকী সফল নহ’ল। সেয়ে মাতৃৰ ঠাইত পিংকি কৰ্মকাৰ হৈ পৰিল চাহ বাগিছাৰ স্থায়ী শ্ৰমিক। 

উল্লেখযোগ্য যে মাত্ৰ ১৮ বছৰ বয়সতে ইউনিছেফৰ “স্প’ৰ্টছ ফৰ ডেভেলপমেণ্ট” শীৰ্ষক প্ৰকল্পৰ জৰিয়তে লণ্ডন অলিম্পিকৰ শিখা দৌৰত ভাৰতক প্ৰতিনিধিত্ব কৰাৰ সুযোগ লাভ কৰা পিংকী কৰ্মকাৰক ইউনিছেফেও অঃশগ্ৰহণৰ বিনিময়ত কোনো মাননি দিয়া নাছিল বুলি প্ৰকাশ পাইছিল।

এটা সাধাৰণ শ্ৰমিক পৰিয়ালৰ ছোৱালী পিংকীৰ এই সাফল্য স্বাভাৱিকতেই দেশ তথা ৰাজ্যবাসীৰ বাবে গৌৰৱৰ কাৰণ হৈ পৰিছিল। ব্যতিক্ৰমী পিংকীয়ে চাহ বাগিছাৰ অঞ্চলত শিক্ষা, স্বাস্থ্য, ক্ৰীড়া আৰু বাল্য বিবাহ, সুৰা আদিৰ বিৰুদ্ধে কাম কৰি আহিছে। 

দুৰ্ভাগ্যজনক ভাৱে একাংশ সংবাদ প্ৰতিষ্ঠানে পিংকীক এথলীট বুলি উল্লেখ কৰি বাতৰি পৰিৱেশন কৰাটোৱে বিষয়টোৰ গুৰুত্ব সকলোকে বুজাই দিছে। শিখা দৌৰত অলিম্পিকত ভাগ লোৱা সকল এথলীট হ’ব নালাগে। তেওঁলোকে উল্লেখযোগ্য কামৰ বাবে এই গৌৰৱ অৰ্জন কৰে।

টকিঅ’ অলিম্পিকত তাকাশিগে শো নামৰ এজন যাদুকৰে শিখা দৌৰত ভাগ লৈছিল। ২০০৮ চনৰ অলিম্পিকত বলীউড অভিনেতা আমিৰ খানও এই গৌৰৱৰ অংশীদাৰ হৈছিল। আনহাতে একেখন অলিম্পিকতে ফুটবল তাৰকা বাইচুং ভুটিয়াই তিব্বতৰ প্ৰতি সমৰ্থন দেখুৱাবলৈ শিখা দৌৰত ভাগ ল’বলৈ কোৱা অনুৰোধ প্ৰত্যাখান কৰিছিল।

বাতৰিৰ শিৰোনাম দখল কৰাৰ পাছতে পুনৰ চৰ্চালৈ আহিছে এটা দশকে আন্ধাৰত থকা পিংকী মজুমদাৰ। টাইমছ অফ ইণ্ডিয়াই এটা প্ৰতিবেদনত প্ৰকাশ কৰিছে যে শিখা দৌৰত ভাগ লোৱাসকলে প্ৰত্যক্ষভাৱে দেশক প্ৰতিনিধিত্ব নকৰে, শিখাৰ এই দুৰৱস্থাৰ বাবে দায়ী ইউনিছেফ।

যি সময়ত মুখ্যমন্ত্ৰী হিমন্ত বিশ্ব শৰ্মাই লাভলীনা, হীমাৰ সৰ্বশ্ৰেষ্ঠতাক জুখিবলৈ উপাধি বা পদবী বিচাৰি পোৱা নাই, তেনে স্থলত এগৰাকী সক্ৰিয় কৰ্মী হিচাপে পিংকী নুন্যতম সুবিধাৰ পৰাও বঞ্চিত হোৱাটো অমানবীয়তা বুলি একাংশই মন্তব্য কৰিছে। 

অৱশ্যে বৰ্তমান বহু সংখ্যক ব্যক্তি-প্ৰতিষ্ঠান পিংকীক সহায়ৰ বাবে আগবাঢ়ি গৈছে। কিন্তু সচেতন ৰাইজৰ মাজত সৃষ্টি হৈছে উদ্বিগ্নতা, দেশৰ বাবে সন্মান কঢ়িয়াই অনা এগৰাকী ব্যক্তিক নুন্যতম সুবিধাৰ পৰা অত বছৰে বঞ্চিত কৰি ৰখাতো কিমান দূৰ যুক্তি সংগত আছিল?