নগাঁও জিলাৰ চামগুৰি সমষ্টিৰ অন্তৰ্গত পুৰণিগুদাম অঞ্চলৰ মিকিৰহাটৰ চাৰিলেনযুক্ত ৰাষ্ট্ৰীয় ঘাই পথৰ পৰা ভৰাগুৰি সংযোগী অতি গুৰুত্বপূৰ্ণ পথটোদি এল পি জি গেছ ভৰ্ত্তি টেংক চলাচল বন্ধ কৰাৰ দাবীত চাৰি দিন ধৰি স্থানীয় মহিলাসকলে পথটো অৱৰোধ কৰি প্ৰতিবাদ অব্যাহত ৰখাৰ সময়তে ৰবিবাৰে আৰক্ষী অৰ্ধসামৰিক বাহিনী আৰু প্ৰশাসনৰ উচ্চপদস্থ বিষয়া উপস্থিত হৈ এল পি জি গেছ ভৰ্ত্তি টেংক কেইখনমান পাৰ কৰা সময়ত এক উত্তপ্ত পৰিস্থিতি সৃষ্টি হয় ৷
উল্লেখ্য যে “নিশিকা ৰোডলাইন এল পি জি বটলিং প্লেন্ট” নামৰ এটা কোম্পানীৰ পৰা অহা-যোৱা কৰা প্ৰায় ৪০ টন ওজনৰ গেছ ভৰ্ত্তি টেংক আৰু গধুৰ চিলিণ্ডাৰভৰ্তি দ্ৰুতবেগী বাহন সমূহে ১১টন বহন ক্ষমতা সম্পন্ন পথটো বিধ্বস্ত কৰি পেলোৱাৱৰ লগতে ৰাইজৰ জীৱন আৰু সম্পত্তিৰ সুৰক্ষাৰ ক্ষেত্ৰত সৃষ্টি কৰিছ ভাবুকিৰ ৷
এইক্ষেত্ৰত প্ৰশাসনক স্থানীয় ৰাইজে উক্ত গধুৰ বাহনসমূহ বন্ধ কৰিবলৈ বাৰে বাৰে অনুৰোধ জনোৱাৰ পাছতো জিলা প্ৰশাসনে কোনো গুৰুত্ব প্ৰদান নকৰাত উপায়ন্তৰ হৈ ক্ষোভিত মহিলাই সকলে উক্ত পথটো আজি তিনিদিন পূৰ্বে এডাল বাঁহ বান্ধি প্ৰতিবাদী কাৰ্যসূচী ৰূপায়ণ কৰে । বাঁহ ডালত আঁৰি দিয়া হ’ল এখন ৰঙা ৰংৰ বেনাৰ । বেনাৰখনত লিখা আছে— “ৰাইজৰ জীৱন আৰু সম্পত্তিৰ সুৰক্ষাৰ কাৰণে এই পথেদি গেছ সৰবৰাহ কৰা গধুৰ গাড়ী আৰু ডাম্পাৰসমূহৰ চলাচল বন্ধ কৰা হৈছে”।
কাৰণ পুৰণিগুদাম অঞ্চলৰ মিকিৰহাটৰ ৰাইজে প্ৰশাসনক বাৰম্বাৰ আবেদন-নিবেদন কৰাৰ পিছতো পথছোৱা মেৰামতি কৰাতো দূৰৈৰে কথা,বন্ধ কৰি দিয়া নহ’ল পথটোদি অহা গধুৰ যানবাহন সমূহৰ অবাধ চলাচল। যাৰ ফলত যমৰ যাতনা ভোগ কৰিবলৈ বাধ্য হৈছে মিকিৰহাটকে ধৰি সমীপৱৰ্তী গাঁওসমূহৰ সৰ্বসাধাৰণ ৰাইজ । অতি ঠেক পথছোৱাৰে চিলিণ্ডাৰভৰ্তি দ্ৰুতবেগী যানবাহন সমূহ অহা-যোৱা কৰাৰ ফলত ক্ৰমশঃ বিধ্বস্ত হৈ পৰিছে পথছোৱা । সমান্তৰালভাৱে গধুৰ যানবাহনসমূহ অহা-যোৱা কৰাৰ সময়ত কঁপি উঠে পথৰ দাঁতিত থকা গঞাঁ ৰাইজৰ বাসগৃহ,লগতে ছিঁৰালফাট দিছে দেৱাল। আকস্মিক দূৰ্ঘটনা তথা অনাকাংক্ষিত বিপদৰ আশংকা বুকুত বান্ধি দীৰ্ঘদিনে পথছোৱাৰে যাতায়ত কৰি আহিছে কণ-কণ ছাত্ৰ-ছাত্ৰী,মহিলাসকলকে ধৰি গাঁও কেইখনৰ সৰ্বসাধাৰণ ৰাইজ।আনহাতে স্থানীয় মহিলা সকলে বাঁহ বান্ধি পথটো বন্ধ কৰি প্ৰতিবাদী কাৰ্যসূচী ৰূপায়ণ কৰি থকা সময়ত তথা শনিবাৰে নিশা চামগুৰি ৰাজহ চক্ৰ বিষয়া কলিয়াবৰ মহকুমা আৰক্ষী বিষয়া চামগুৰি আৰক্ষী থানা আৰু পুৰণিগুদাম আৰক্ষী চকীৰ আৰক্ষীসহ নিশিকা ৰোডলাইন এল পি জি ব’টলিং প্লেন্টৰ মালিক পক্ষ উপস্থিত হৈ প্ৰতিবাদী মহিলা সকলৰ লগত আলোচনা কৰিবলৈ চেষ্টা কৰে যদিও বিফল হয় ৷
যোৱা শনিবাৰেও জিলা প্ৰশাসনৰ উচ্চপদস্থ বিষয়া উক্ত স্থানত উপস্থিত হৈ প্ৰতিবাদী মহিলা সকলৰ লগত আলোচনা কৰিবলৈ আহি বিফল হয় ৷ আনহাতে ৰবিবাৰে পুৱা চামগুৰি ৰাজহ চক্ৰ বিষয়া কলিয়াবৰ মহকুমা আৰক্ষী বিষয়া চামগুৰি আৰক্ষী থানাৰ আৰক্ষী পুৰণিগুদাম আৰক্ষী চকীৰ আৰক্ষীৰ এটা বৃহৎ দল আৰু অৰ্ধসামৰিক বাহিনী উপস্থিত হৈ পথটোত বান্ধি থোৱা বাঁহ আতঁৰাই প্ৰতিবাদি মহিলাসকলক ছত্ৰভঙ্গ দিয়াই কেইখনমান গেছ ভৰ্ত্তি টেংক পাৰ কৰাই যদিও সেই সময়ত কোম্পানীটোৰ স্থানীয় কেইজনমান কৰ্মচাৰীয়ে আৰক্ষীৰ সন্মুখতে প্ৰতিবাদী মহিলাসকলক তুচ্ছ-তাচ্ছিল্য কৰাত এক উতপ্ত পৰিস্থিতি সৃষ্টি হয় ৷
পৰৱৰ্তী সময়ত আৰক্ষীয়ে প্ৰতিবাদী মহিলাসকলক তুচ্ছ-তাচ্ছিল্য কৰা উক্ত কোম্পানীটোৰ স্থানীয় দুজন কৰ্মচাৰীক আটক কৰিছে বুলি জানিব পৰা গৈছে ৷ লগতে তুচ্ছ- তাচ্ছিল্য কৰা কোম্পানীটোৰ স্থানীয় কৰ্মচাৰীকেইজনৰ বিৰূদ্ধে প্ৰতিবাদী মহিলাসকলে পুৰণিগুদাম আৰক্ষী চকীৰ ভাৰপ্ৰাপ্ত আৰক্ষী বিষয়া গৰাকীৰ ওচৰত এখন এজাহাৰ দাখিল কৰিছে ৷ আনহাতে সমগ্ৰ ঘটনাক কেন্দ্ৰ কৰি বৰ্তমান মিকিৰহাট অঞ্চলত এক চেপা উত্তেজনাই বিৰাজ কৰিছে ৷ লগতে যুজোধান স্থিতি আৰক্ষী আৰু জিলা প্ৰশাসনৰ লগত প্ৰতিবাদী মহিলা সকলৰ মাজত কি পৰিস্থিতি সৃষ্টি হয় সেইয়া সময়তহে লক্ষণীয় হ’ব বুলি স্থানীয় সচেতনমহলে মত প্ৰকাশ কৰিছে ৷
