গুজৰাটৰ মৰ্বিত এখন ওলমা দলং খহি মৃত্যু হোৱা লোকৰ সংখ্যা বৃদ্ধি পায়েই আছে ৷ উদ্ধাৰ অভিযান ক্ষীপ্ৰতৰ কৰাৰ লগে লগে উদ্ধাৰ কৰা হৈছে অধিক লোকৰ মৃতদেহ ৷ প্ৰাপ্ত তথ্য অনুসৰি এই শোকাৱহ দূর্ঘটনাত মৃত্যু হোৱা লোকৰ সংখ্যা ১৪১ জনলৈ বৃদ্ধি পাইছে ৷ প্ৰায় ১৭৭ জন লোকক জীৱন্তে উদ্ধাৰ কৰা হৈছে ৷ এতিয়াও বহু লোক নিৰুদ্দেশ হৈ আছে।
মহিলা আৰু শিশুকে ধৰি প্ৰায় ৫০০ লোকে ওলমি থকা দলংখনেৰে গৈ থকাৰ সময়তে দলঙখনৰ কেবলবোৰ ছিঙি যায় ৷ আহমেদাবাদৰ পৰা ৩০০ কিলোমিটাৰ নিলগত অৱস্থিত ১৫০ বছৰ পুৰণি দলংখনত ষট্ পূজাৰ বাবে সমাবেত হৈছিল ৷
উল্লেখ্য যে মেৰামতিৰ বাবে ৭ মাহ ধৰি বন্ধ হৈ আছিল মাচচু নদীৰ ওপৰত থকা দলংখন।যোৱা ২৬ অক্টোবৰ অৰ্থাৎ গুজৰাটী নৱবৰ্ষত পুনৰ ৰাইজৰ বাবে মুকলি কৰা হয়।গুজৰাটত থকা প্ৰধানমন্ত্ৰী নৰেন্দ্ৰ মোদীয়ে কয় যে কালিৰে পৰা উদ্ধাৰ আৰু সাহায্য অভিযান চলি আছে আৰু কেন্দ্ৰই ৰাজ্যখনলৈ সকলো সহায় আগবঢ়াইছে।
আজি পুৱা গুজৰাটৰ গৃহমন্ত্ৰী হৰ্ষ সংঘৱীয়ে কয় যে এটা অপৰাধমূলক গোচৰ ৰুজু কৰা হৈছে আৰু পাঁচজনীয়া উচ্চ ক্ষমতাসম্পন্ন কমিটীয়ে দলং ভাঙি পৰা সন্দর্ভত তদন্ত চলাই আছে।
স্থানীয় পৌৰসভা সংস্থাৰ মুৰব্বী সন্দীপসিং জালাই প্ৰকাশ কৰা অনুসৰি শতিকা পুৰণি দলংখনৰ পুনৰ মুকলি কৰাৰ পূৰ্বে নির্মাণকাৰীয়ে সুৰক্ষাৰ প্ৰমাণ পত্ৰ লোৱা নাছিল।
এন ডি আৰ এফৰ পাঁচটা দলে নিশাটোৰ ভিতৰতে নিৰুদ্দেশ হোৱা লোকসকলৰ সন্ধানত উদ্ধাৰ অভিযান আৰম্ভ কৰে ৷ পিছত সেনা, নৌসেনা আৰু বায়ুসেনাও এই অভিযানত যোগদান কৰে।
দুৰ্ঘটনাত মৃত্যু হোৱা প্ৰতিজনৰ পৰিয়ালৰ সদস্যক ৪ লাখ টকা আৰু আহতসকলৰ বাবে ৫০ হাজাৰ টকাৰ ক্ষতিপূৰণ দিয়াৰ কথা ঘোষণা কৰিছে ৰাজ্য চৰকাৰে।লগতে প্ৰধানমন্ত্ৰীয়ে নিহত পৰিয়াললৈ ২ লাখ টকাকৈ আৰ্থিক সাহায্য প্ৰদানৰ কথাও ঘোষণা কৰে।
