মাইক্ৰ’ ফাইনেন্স উদগনি আৰু ৰেহাই আঁচনি ৰূপায়ন

গুৱাহাটী, ১৬ অক্টোবৰঃ অসম মাইক্ৰ’ ফাইনেন্স উদগনি আৰু ৰেহাই আঁচনিৰ তৃতীয় বৰ্গৰ অন্তৰ্ভুক্ত কামৰূপ মহানগৰ জিলাৰ ঋণী সকলক আজি ঋণমুক্তিৰ প্ৰমাণ পত্ৰ (No Dues Certificate) বিতৰণ কৰা হয়৷ এই উপলক্ষে খানাপাৰাৰ পশু চিকিৎসা বিজ্ঞান মহাবিদ্যালয় খেলপথাৰত আয়োজিত এখন সভাত মুখ্য অতিথি হিচাপে অংশগ্ৰহণ কৰে মন্ত্ৰী কেশৱ মহন্তই৷ সভাখনৰ আদৰণি ভাষণত জিলা আয়ুক্ত পল্লৱ গোপাল ঝাই জনায় যে ২০২১ চনৰ ৩১ মাৰ্চলৈকে যিসকল ঋণীৰ একাউন্ট এন পি এ হৈ আছে, তেওঁলোকক সকাহ দি এই প্ৰমাণ পত্ৰ প্ৰদান কৰা হৈছে ৷ পঁচিশ হেজাৰ টকালৈকে অনাদায় মূলধন পৰিমাণৰ এন পি এ একাউন্ট থকা ঋণীসকলক অগ্ৰাধিকাৰ প্ৰদান কৰা হৈছে৷ কামৰূপ মহানগৰ জিলাত মুঠ ৩,৫৯১ গৰাকী হিতাধিকাৰী এই প্ৰমাণপত্ৰ পাবৰ বাবে বাছনিভুক্ত হৈছে৷ আজিৰ সভাত ১০গৰাকী হিতাধিকাৰীক মঞ্চত আনুষ্ঠানিকভাৱে প্ৰমাণপত্ৰ প্ৰদান কৰা হয় ৷ বাকীসকলক সভাৰ অন্তত প্ৰমাণপত্ৰ দিয়া হয়৷ সভাত ভাষণ দি মন্ত্ৰী কেশৱ মহন্তই কয় যে ৰাজ্য চৰকাৰখনে সমাজৰ প্ৰতিটো শ্ৰেণীৰ লোকৰ উন্নতিৰ বাবে আঁচনি গ্ৰহণ কৰিছে৷ তেওঁ কয়, ‘ ৰাজ্যখনৰ প্ৰত্যেক খন গৃহস্থীৰে সৈতে সম্পৰ্ক গঢ়ি উঠা এনে কোনো ৰাজ্য চৰকাৰ ভাৰতবৰ্ষত নাই৷’ মুখ্যমন্ত্ৰী ড。হিমন্ত বিশ্ব শৰ্মা নেতৃত্বাধীন ৰাজ্য চৰকাৰখনৰ প্ৰথমখন কেবিনেটৰ প্ৰথমটো সিদ্ধান্তই মাইক্ৰ’ ফাইনেন্সৰ ঋণ ৰেহাই সম্পৰ্কীয় আছিল বুলি কয় মন্ত্ৰীগৰাকীয়ে৷ আজি ঋণ নথকাৰ প্ৰমাণ পত্ৰ লাভ কৰা মহিলাসকলক উদেশ্যি তেওঁ কয়, ‘এই প্ৰমাণ পত্ৰই আপোনালোকৰ ঘৰলৈ শান্তি আনিব৷ ঋণমুক্ত হোৱাৰ আনন্দ দিব৷ ধাৰৰ বোজাৰ পৰা আপোনালোক আজি মুক্ত হ’ল৷’ ৰাজ্য চৰকাৰে ৰাইজৰ স্বাস্থ্যবীমাৰ ক্ষেত্ৰত লোৱা পদক্ষেপৰ বিষয়ে সদৰি কৰি স্বাস্থ্য আৰু পৰিয়াল কল্যাণ বিভাগৰ মন্ত্ৰী মহন্তই কয়, ‘যিসকল দৰিদ্ৰ লোকৰ ৰেচন কাৰ্ড নাই তেওঁলোকে অহা ডিচেম্বৰত কাৰ্ড পাব৷ ৰেচন কাৰ্ডত বিনামূলীয়া চাউল দিয়াৰ লগতে পৰিয়ালটোৰ সদস্যসকলক পাঁচ লাখ টকাৰ স্বাস্থ্য বীমাও দিয়া হৈছে৷ অসম চৰকাৰৰ কৰ্মচাৰীক কেন্দ্ৰীয় চৰকাৰৰ কৰ্মচাৰীৰ নিৰিখত চিকিৎসা সাহায্য দিয়াৰ পদক্ষেপ লোৱা হৈছে৷ মুখ্যমন্ত্ৰী ডাঙৰীয়াৰ ‘সকলোৰে বাবে স্বাস্থ্য’ৰ সপোন দিঠকত পৰিণত কৰি অসমৰ ৯০ শতাংশ লোকক স্বাস্থ্য বীমাৰ অন্তৰ্ভুক্ত কৰাৰ পদক্ষেপ লোৱা হৈছে৷’ সভাখনত পশ্চিম গুৱাহাটী সমষ্টিৰ বিধায়ক ৰমেন্দ্ৰ নাৰায়ণ কলিতায়ো ভাষণ দিয়ে৷ সভাত জিলা প্ৰশাসন আৰু বিভিন্ন বিভাগৰ জ্যেষ্ঠ বিষয়াসকল আৰু কেবা হেজাৰ ৰাইজ উপস্থিত থাকে৷