দেশৰ ৭৩ সংখ্যক গণৰাজ্য দিৱস উপলক্ষে কামৰূপ জিলা প্ৰশাসনৰ উদ্যোগত আয়োজিত অনুষ্ঠানত মুখ্য অতিথি ৰূপে উপস্থিত থাকে উপায়ুক্ত কৈলাশ কাৰ্তিক এন । আমিনগাঁৱৰ কুমাৰ ভাস্কৰ বৰ্মণ ক্ষেত্ৰত গণৰাজ্য দিৱসৰ ৰাষ্ট্ৰীয় পতাকা উত্তোলন কৰি দিয়া ভাষণ প্ৰসংগত উপাযুক্তগৰাকীয়ে প্ৰতিজন ভাৰতীয় নাগৰিককে গণৰাজ্য দিৱসৰ শুভেচ্ছা জ্ঞাপন কৰে, লগতে দেশৰ স্বাধীনতা সেনানী আৰু ডঃ বি আৰ আম্বেদকাৰকে ধৰি সংবিধান সভাৰ সমুহ সদস্যকে শ্ৰদ্ধা আৰু কৃতজ্ঞতাৰে সোঁৱৰণ কৰে ।
জিলাখনৰ প্ৰগতিৰ খতিয়ান দাঙি ধৰি প্ৰতিজন নাগৰিকৰ বাবে মৰ্যাদাপূৰ্ণ আত্মনিৰ্ভৰ জীৱনযাত্ৰা, দ্ৰুত অৰ্থনৈতিক উন্নতি আৰু সামাজিক ন্যায় প্ৰতিষ্ঠাৰ ক্ষেত্ৰত সহযোগ কৰিবলৈ উপাযুক্তগৰাকীয়ে গণৰাজ্য দিৱসৰ মুখ্য অতিথিৰ আসনৰ পৰা জিলাবাসীক আহ্বান জনায় ৷ অনুষ্ঠানটোৰ আৰম্ভণিতে মহামানৱ মহাত্মা গান্ধীৰ প্ৰতিচ্ছৱিত পুষ্পাঞ্জলি অৰ্পণ কৰে ৷
গণৰাজ্য দিৱস উদযাপনত জিলাখনৰ আৰক্ষী বাহিনীৰ পুৰুষ-মহিলাৰ দল আৰু গৃহৰক্ষী বাহিনীয়ে কুচ-কাৱাজ প্ৰদৰ্শন কৰে ৷ এই অনুষ্ঠানতে উত্তৰ গুৱাহাটীস্থিত ভাৰতীয় প্ৰযুক্তি বিদ্যা প্ৰতিষ্ঠানৰ তৰফৰ পৰা দ্ৰোণ শ্ব’ৰ ব্যৱস্থা কৰে ৷
অনুষ্ঠানটোৰ কাৰ্যসূচীত গুৱাহাটী লোকসভা সমষ্টিৰ সাংসদ কুইন ওজা, ছয়গাঁও আৰু বকো সমষ্টিৰ বিধায়কদ্বয় ক্ৰমে ৰেকিবুদ্দিন আহমেদ আৰু নন্দিতা দাসকে ধৰি জিলা প্ৰশাসনৰ বিষয়া-কৰ্মচাৰীসকলৰ লগতে বিভিন্ন বিভাগৰ বিষয়া-কৰ্মচাৰী, আৰক্ষী প্ৰশাসন, সাধাৰণ নাগৰিক তথা সংবাদকৰ্মীসকল উপস্থিত থাকে ।
