হীৰাখচিত কেক কাটি জন্মদিন উদযাপন কৰিলে কলকাতাৰ এগৰাকী তৰুণীয়ে । পেছাত মডেল হেমশ্ৰীয়ে হীৰাৰ কেক কাটি থকা ভিডিঅ’ ভাইৰেল হৈ পৰিছে। হেমশ্ৰীয়ে নিজেই ইনষ্টাগ্ৰামত প্ৰকাশ কৰা অনুসৰি তেওঁৰ জন্মদিনৰ কেকটোৰ দাম ৮ কোটি টকা। কিছুদিন পূৰ্বে মডেল অভিনেত্ৰী উৰ্বশী ৰৌতেলাই জন্মদিনত হানি সিঙে দিয়া ২৪ কেৰেটৰ সোণৰ কেক কাটি এক নজিৰ গঢ়ি তুলিছিল। সেই কেকটোৰ দাম আছিল প্ৰায় ৩ কোটি টকা। বলীউডৰ অভিনেত্ৰীগৰাকীকো পৰাস্ত কৰে হেমশ্ৰীয়ে।
ভিডিঅ’টোত হেমশ্ৰীয়ে এখন বিলাসী হোটেলত পৰিয়াল আৰু বন্ধু-বান্ধৱীৰ সৈতে জন্মদিন উদযাপন কৰাত ব্যস্ত। ৰঙা পোছাক পৰিধান কৰিছে ৷ সন্মুখৰ টেবুলত হীৰাৰ কেক সজাই থোৱা আছে । কেক কাটি আপোনজনক কেক খুৱাই দিয়াৰ পৰিৱর্তে হাতুৰীৰে কেকটো ভাঙি তাৰ পৰা হীৰা এটা লৈ বন্ধুক উপহাৰ দিলে।
ছ’চিয়েল মিডিয়াত হেমশ্ৰী এগৰাকী চিনাকি মুখ। ইনষ্টাগ্ৰামত তেওঁৰ আঠ লাখৰো অধিক ফ’ল’ৱাৰ আছে। এই ভিডিঅ’ ভাইৰেল হোৱাৰ লগে লগে নেটিজেনসকলে বিভিন্ন ধৰণৰ মন্তব্য কৰিবলৈ আৰম্ভ কৰিছে। কোনোবাই লিখিছে, “ইমান দামী কেক কাটি কি প্ৰমাণ কৰিবলৈ চেষ্টা কৰিছা? ” আন এজন ব্যক্তিয়ে লিখিছে, “এই কেকটোৰ মূল্য ১২০০ টকাও নহয়, মিছা কথা বিয়পাই দিয়া বন্ধ কৰক।”
