অসমীয়া সাহিত্যৰ প্ৰবাদপুৰুষ সাহিত্যৰথী লক্ষ্মীনাথ বেজবৰুৱাৰ ৮৫ সংখ্যক মৃত্যু দিৱস আজি অসমৰ লগতে ওড়িশাৰ সম্বলপুৰস্থিত লক্ষ্মীনাথ বেজবৰুৱাৰ নৱনিৰ্মিত সাধনা গৃহত দিন যোৰা কাৰ্যসূচীৰে পালন কৰা হয়। ‘সাহিত্যৰথী লক্ষ্মীনাথ বেজবৰুৱা স্মৃতি ৰক্ষা সমিতি’ৰ উদ্যোগত কেন্দ্ৰীয়ভাবে যুগনায়কগৰাকীৰ একালৰ কৰ্মভূমি সম্বলপুৰত তেওঁৰ মৃত্যু দিৱস পালন কৰা হয়। আজি পুৱা ১০ বজাত শ্ৰদ্ধাঞ্জলি অনুষ্ঠানত সম্বলপুৰ জিলাৰ অতিৰিক্ত উপায়ুক্ত অজামবৰ মহান্তি আৰু স্মৃতি ৰক্ষা সমিতিৰ সভাপতি প্ৰদ্যুত কুমাৰ চৌধুৰীয়ে বন্তি প্ৰজ্বলন কৰে। লক্ষ্মীনাথ বেজবৰুৱাৰ প্ৰতিমূৰ্তিত মাল্যাপন কৰে ওড়িশাৰ ভূৱনেশ্বৰ নিবাসী অসমীয়া লেখিকা নিৰ্মালি মহন্তই ।অনুষ্ঠানত বিশিষ্ট অতিথি হিচাপে উপস্থিত থাকে বেজবৰুৱাৰ সম্বলপুৰৰ ঐতিহাসিক ভৱনৰ সংৰক্ষণ, নবনিৰ্মান অভিযানৰ গুৰি ধৰোতা জ্যেষ্ঠ সাংবাদিক দীপক কুমাৰ পাণ্ডাসহ কেইবাগৰাকীও সাংবাদিক ,অসম চৰকাৰৰ প্ৰশাসনীয় বিষয়া ৰাকেশ আগৰৱালা, তাৰিণী পাণ্ডা সহিতে সম্বলপুৰ আৰু অসমৰ কেইবাগৰাকীও ব্যক্তি।
অনুষ্ঠানত অতিৰিক্ত উপায়ুক্তজনে বেজবৰুৱাৰ সমলসমূহৰ সংৰক্ষণ তথা স্মৃতিৰ সুৰক্ষাৰ বাবে কাম কৰি যাব বুলি মন্তব্য আগবঢ়ায়।আনহাতে নিৰ্মালি মহন্তই অহা দিনবোৰত অসমীয়া সাহিত্য আৰু ওড়িয়া সাহিত্যৰ মাজত সমন্বয়ৰ সেঁতু গঢ়ি তোলাৰ বাবে কাম কৰি যাব বুলি ব্যক্ত কৰে।
সন্ধিয়া ৫ বজাত সম্বলপুৰৰ বিশিষ্টব্যক্তি ,সাহিত্যিক ,সাংবাদিকৰ উপস্থিতিত ৮৫ গছি বন্তি প্ৰজ্বলনেৰে বেজবৰুৱা দেৱৰ নিৰ্মীয়মান বাসগৃহটিত অনুষ্ঠানৰ সামৰণি পেলোৱা হয়। অনুষ্ঠানত লক্ষ্মীনাথ বেজবৰুৱা স্মৃতিৰক্ষা সমিতিৰ অসমৰ প্ৰতিনিধিৰূপে সম্পাদক ৰন্টু ডেকা, সহকাৰী সম্পাদক কমলেন্দ্ৰ ভৰালী, সাংস্কৃতিক সম্পাদক গোপাল জালান আৰু স্বপন শিল শৰ্মা আৰু উপস্থিত থাকে।
গুৱাহাটীৰ আমবাৰীৰ লক্ষ্মীনাথ বেজবৰুৱা চ’ক তথা উদ্যানতো আজি সন্ধিয়া স্মৃতি ৰক্ষা সমিতিয়ে চমু অনুষ্ঠানত বেজবৰুৱাৰ প্ৰতি শ্ৰদ্ধা তৰ্পণ কৰে। বিশিষ্ট লেখক, ভাষাবিদ প্ৰমোদ চন্দ্ৰ ভট্টাচাৰ্যই পুষ্পাঞ্জলি অৰ্পণ আৰু বন্তি প্ৰজ্বলন কৰি অনুষ্ঠানৰ সূচনা কৰে ।শ্ৰী ভট্টাচাৰ্যই চমু বক্তব্যৰে সাহিত্যৰথীক স্মৰণ কৰে। তাৰ পাছতে চাৰিটি শিশু— কৃষ্ণিকা ৰয়, শ্ৰীআঞ্চ ৰয়, মৌচুমী নায়ক আৰু প্ৰণয়া বৰাই পৰিবেশন কৰে জাতীয় সংগীত। আয়োজক সমিতিৰ প্ৰচাৰ সম্পাদক মণি মহন্তই আঁতধৰা অনুষ্ঠানত সমিতিৰ কৰ্মকৰ্তা ড৹ ধ্ৰুৱজ্যোতি দাস, নন্দিতা বৰঠাকুৰ আৰু ভালেমান ব্যক্তিয়ে ভাগ লয়।
ইপিনে কলকাতাৰ অসম হাউছতো অসমীয়া ভাষা উন্নতি সাধিনী সভা আৰু অসম হাউছৰ প্ৰাধিকাৰীসকলে সাহিত্যৰথী বেজবৰুৱাৰ প্ৰতি শ্ৰদ্ধা জ্ঞাপন কৰে।
