ৰাজ্যত সমাগত উপ নিৰ্বাচন। মাজত মাথোঁ এসপ্তাহ। জোৰদাৰ হৈছে প্ৰচাৰ অভিযান। কিন্তু আপুনি জানেনে এইবাৰ ৫ উপ নিৰ্বাচনত প্ৰতিদ্বন্দিতা কৰা ৩১ গৰাকী প্ৰাৰ্থীৰ ভিতৰত কেইগৰাকী কোটি টকাৰ সম্পত্তিৰ মালিক? মুঠ ৯ গৰাকী প্ৰাৰ্থীযেই হৈছে কোটিপতি। প্ৰাৰ্থীসকলৰ ভিতৰত সৰ্বাধিক ধনী প্ৰাৰ্থী হৈছে ভৱানীপুৰৰ বিজেপিৰ প্ৰাৰ্থী ফণীধৰ তালুকদাৰ।
তেওঁৰ মুঠ সম্পত্তিৰ পৰিমাণ হৈছে প্ৰায় ১০.৭৮ কোটি । এই তথ্য প্ৰকাশ কৰিছে এ ডি আৰ নামৰ সংস্থাই। প্ৰাৰ্থীসকলে দাখিল কৰা শপতনামাত উল্লেখ কৰা তথ্যৰ ভিত্তিত এই কথা প্ৰকাশ কৰিছে। ফণীধৰ তালুকদাৰৰ উপৰি নিৰ্দলীয়ভাবে সমষ্টিটোৰ পৰা প্ৰতিদ্বন্দ্বিতা কৰা চৌকত আলী আহমেদৰ সম্পত্তিৰ পৰিমাণ হৈছে ১.৭০ কোটি টকা।ইপিনে তামুলপুৰ সমষ্টিৰ নিৰ্দলীয় প্ৰাৰ্থী গণেশ কছাৰীও কোটিপাতি প্ৰাৰ্থী। তেঁওৰ সম্পত্তিৰ পৰিমাণ হৈছে প্রায় ৭ কোটি টকা।
আনহাতে গোসাঁইগাঁও সমষ্টিৰ বিপিএফ প্ৰাৰ্থী ধ্ৰুৱ কুমাৰ ব্ৰহ্ম নাৰ্জাৰী আৰু এ আই ইউ ডি এফৰ প্ৰাৰ্থী খাইৰুল খণ্ডকাৰৰো আছে কোটি টকাৰ সম্পত্তি। নাৰ্জাৰী আৰু খণ্ডকাৰৰ সম্পত্তিৰ পৰিমাণ হৈছে ক্ৰমে ৬.৬০ কোটি আৰু ১.৯৩ কোটি । থাওৰাৰ কংগ্ৰেছ প্ৰাৰ্থী মনোৰঞ্জন কোঁৱৰ আৰু বিজেপিৰ প্ৰাৰ্থী সুশান্ত বৰগোহাঁইও কোটিপতি। এ ডি আৰৰ তথ্য অনুসৰি কোঁৱৰ আৰু বৰগোহাঁইৰ সম্পত্তিৰ পৰিমান হৈছে ক্রমে ৩.৫০ আৰু ২.৪৮ কোটি টকা। মৰিয়নীৰ বিজেপি প্ৰাৰ্থী ৰূপজ্যোতি কুৰ্মী আৰু কংগ্ৰেছ প্ৰাৰ্থী লোহিত কোঁৱৰৰ সম্পত্তিৰ পৰিমান হৈছে ক্ৰমে ১.৬১ কোটি আৰু ১.৮৫ কোটি টকা।
আনহাতে এইবাৰ প্ৰতিদ্বন্দিতা কৰা প্ৰাৰ্থীসকলৰ ভিতৰত ৫ গৰাকীৰ বিৰূদ্ধে আছে অপৰাধজনিত গোচৰ। ইয়াৰে ৪ গৰাকীৰ বিৰূদ্ধে আছে গুৰুতৰ অভিযোগ। যিসকল প্ৰাৰ্থীৰ বিৰুদ্ধে গোচৰ ৰুজু হৈ আছে তেওঁলোক হৈছে থাওৰাৰ ৰাইজৰ দলৰ প্ৰাৰ্থী ধৈৰ্য্য কোঁৱৰ, ভৱানীপুৰৰ বিজেপি প্ৰাৰ্থী ফণীধৰ তালুকদাৰ, মৰিয়নীৰ বিজেপি প্ৰাৰ্থী ৰূপজ্যোতি কুৰ্মী, গোসাঁইগাঁওৰ এ আই ইউ ডি এফৰ প্ৰাৰ্থী খাইৰুল আনম খণ্ডকাৰ আৰু গোসাঁইগাঁৱৰ নিৰ্দলীয় প্ৰাৰ্থী কমল ৰয়। শিক্ষাৰ ফালৰ পৰা চাবলৈ গ’লে এজন পঞ্চম শ্ৰেণী উত্তীৰ্ণ আৰু আন এজন অষ্টম শ্ৰেণী উত্তীৰ্ণ। তদুপৰি ৫ গৰাকীয়ে দশম শ্ৰেণী আৰু ৪ গৰাকীয়ে দ্বাদশ শ্ৰেণী উত্তীৰ্ণ হৈছে।
