তিনিচুকীয়াত দেওবাৰে নিশা এক ভয়ংকৰ অগ্নিকাণ্ড সংঘটিত হয়। অগ্নিকাণ্ডত ২০খনৰো অধিক দোকান ভস্মীভূত হয় ৷ চহৰখনৰ জিএনবি ৰোডৰ নিউ মাৰ্কেটত এই অগ্নিকাণ্ড সংঘটিত হৈছে।
জানিব পৰা মতে অগ্নিনিৰ্বাপক বাহিনী এঘণ্টা পলমকৈ ঘটনাস্থলীত উপস্থিত হোৱাৰ ফলত জুই বিয়পি পৰে ৷ ইয়াৰ লগে লগে ক্ষয়-ক্ষতিৰ পৰিমানো বৃদ্ধি পায় ৷ ইফালে জুই লগা স্থানডোখৰ সংযোগী পথছোৱা ঠেক হোৱাৰ বাবে অগ্নিনিৰ্বাপক বাহিনীৰ বাহন প্ৰেৱশ কৰিব পৰা নাছিল। অৱশেষত ১০খন অগ্নিনিৰ্বাপকৰ বাহনে বিভিন্ন কাৰিকৰী কৌশল ব্যৱহাৰ কৰি জুই নিৰ্বাপিত কৰিবলৈ সক্ষম হয়।
এই অগ্নিকাণ্ডই ভয়ংকৰ ৰূপ ৰূপ লোৱাত ডিগবৈ, দুলীয়াজান, এয়াৰফ’ৰ্চৰ পৰা অগ্নিনিৰ্বাপকৰ বাহন আহিবলগা হৈছিল। এই ঘটনাত নিউ মাৰ্কেটত থকা হোমিঅ’পেথিক, প্লাষ্টিক, জোতা-চেণ্ডেলৰ গুদাম আদি জুইত জাহ যায়। ইয়াৰোপৰিও, অগ্নিকাণ্ডত আন কেইবাখনো দোকান সম্পূৰ্ণৰূপে ভস্মীভূত হয়। অৱশ্যে অগ্নিকাণ্ডৰ কাৰণ এতিয়ালৈ জানিব পৰা হোৱা নাই ৷
